نئی دہلی: کانگریس کے صدر ملکارجن کھڑگے نے راجیہ سبھا کے رکن کے طور پر دوبارہ منتخب ہونے کے بعد پیر کے روز اپنے عہدے کا حلف اٹھا لیا۔ راجیہ سبھا کے چیئرمین اور نائب صدر سی پی رادھاکرشنن نے پارلیمنٹ ہاؤس میں اپنے چیمبر میں کھڑگے سے حلف لیا۔ کھڑگے نے ہندی زبان میں حلف اٹھایا اور اس دوران اپنے ہاتھ میں آئینِ ہند کا نسخہ تھام رکھا تھا۔

سی پی رادھاکرشنن نے انہیں مبارکباد دیتے ہوئے کہا کہ ایوانِ بالا ان کے طویل پارلیمانی تجربے سے فائدہ اٹھائے گا۔ کرناٹک کی نمائندگی کرنے والے ملکارجن کھڑگے نے بعد میں کہا کہ وہ عوام کے مسائل، امنگوں اور آواز کو پوری دیانت اور عزم کے ساتھ ایوان میں اٹھاتے رہیں گے، اور حکومت کو جوابدہ بنانا بھی ان کی اہم ذمہ داری رہے گی۔

حلف برداری کی تقریب میں کانگریس پارلیمانی پارٹی کی چیئرپرسن سونیا گاندھی، وائناڈ سے رکن پارلیمنٹ پرینکا گاندھی واڈرا، مرکزی وزیر صحت جے پی نڈا، پارلیمانی امور کے وزیر کرن ریجیجو، وزیر قانون ارجن رام میگھوال اور راجیہ سبھا کے نائب چیئرمین ہری ونش بھی موجود تھے۔ نائب صدر کے دفتر نے سوشل میڈیا پلیٹ فارم ایکس پر حلف برداری کی تصاویر شیئر کرتے ہوئے اس کی تصدیق کی۔

کھڑگے نے ایکس پر اپنے پیغام میں کہا کہ انہیں دوبارہ راجیہ سبھا کے رکن اور قائدِ حزبِ اختلاف کے طور پر خدمات انجام دینے کا موقع ملنا باعثِ فخر اور بڑی ذمہ داری ہے۔ انہوں نے نائب صدر سی پی رادھاکرشنن، نائب چیئرمین ہری ونش، کانگریس قیادت خصوصاً سونیا گاندھی اور راہول گاندھی، پارٹی کے ارکانِ پارلیمنٹ، کارکنوں، حامیوں اور دیگر سیاسی جماعتوں، بالخصوص انڈیا اتحاد (INDIA) کے رہنماؤں کا بھی شکریہ ادا کیا۔