نئی دہلی:راجیہ سبھا میں اپوزیشن لیڈرملیکارجن کھرگے نے بدھ کے روز ریٹائر ہونے والے اراکین کو وداعی دی اور ایوان کی کارروائی کے قواعد کا وقتاً فوقتاً جائزہ لینے کی ضرورت پر زور دیا۔ کھرگے نے کہا کہ ایوان میں زیادہ اجلاس ہونے چاہئیں تاکہ عوامی اہمیت کے امور پر سنجیدہ غور و خوض کیا جا سکے۔
انہوں نے بل تیار کرنے میں اپوزیشن اراکین کی زیادہ شرکت کی وکالت کرتے ہوئے کہا کہ اگر اس میں رکاوٹ آئے گی تو پارلیمنٹ کی ادارہ جاتی طاقت کمزور ہو جائے گی۔ اعلیٰ ایوان میں لیڈر اپوزیشن نے کہا، "میرا مضبوط یقین ہے کہ راجیہ سبھا کے قواعد کا وقتاً فوقتاً جائزہ لینا ضروری ہے۔ یہ معاملہ اس وقت جنرل پرپز کمیٹی (جی پی سی) کے سامنے زیر غور ہے اور اس پر سنجیدگی سے غور کرنے کی ضرورت ہے۔
کھرگے خود ریٹائر ہو رہے ہیں، مگر انہیں اگلا مدت کار ملے گا۔ انہوں نے کہا، "سیاست میں لوگ کبھی عوامی زندگی سے ریٹائر نہیں ہوتے، اور نہ ہی ملک کی خدمت کے جذبے میں کبھی تھکتے ہیں۔" انہوں نے کہا کہ ادارے مستقل ہوتے ہیں، جبکہ ان میں کام کرنے والے چہرے بدلتے رہتے ہیں۔ "جن ساتھیوں کا دوبارہ انتخاب ہوا ہے، ان کا ہم استقبال کرتے ہیں۔ اور جو اراکین ریٹائر ہو رہے ہیں، مجھے یقین ہے کہ وہ مستقبل میں بھی عوامی زندگی میں بامعنی کردار ادا کریں گے۔ یہاں حاصل تجربہ انہیں اور بھی اہم کردار ادا کرنے کے قابل بنائے گا۔"
ایوان میں وزیراعظمنریندر مودی کے خطاب کے بعد اپنی بات رکھتے ہوئے خرگے نے کہا کہ انہوں نے اپنے فرائض انجام دیتے ہوئے ہمیشہ تمام فریقین کے خیالات سننے کی کوشش کی اور تعمیری تجاویز کو نافذ کرنے کی کوشش کی۔ انہوں نے کہا کہ انہیں اس اعلیٰ ایوان میں خوشگوار اور چیلنجنگ دونوں تجربے حاصل ہوئے۔
"میرا مضبوط یقین ہے کہ اس ایوان کو اور زیادہ بامعنی بنانے کے لیے نئی پہل کی ضرورت ہے، تاکہ یہ معاشرے اور ملک کے لیے مثبت پیغام دے اور مؤثر رہنمائی فراہم کرے۔" خرگے نے کہا کہ آئین ہر پارلیمانی رکن کو بے خوف ہو کر اپنے خیالات کا اظہار کرنے کی آزادی دیتا ہے، اور اگر بحث و مباحثہ نہ ہوگا تو پارلیمانی اداروں کی کوئی حقیقی اہمیت باقی نہیں رہے گی۔
انہوں نے کہا، "اگر اظہار رائے کی آزادی محدود ہوگی، تو کئی راستے بند ہو جائیں گے۔ جب اچھی مقننہ بنتی ہے، تو صرف حاکم جماعت ہی نہیں، بلکہ اپوزیشن اراکین بھی اس کے خاکے میں برابر کا کردار ادا کرتے ہیں۔ وہ پارلیمانی کمیٹیوں میں بھی اہم کردار ادا کرتے ہیں۔ مجھے لگتا ہے کہ ان کرداروں میں کسی بھی قسم کی رکاوٹ پارلیمانی اداروں کو کمزور کرے گی۔" ایوان کے اجلاسوں کی تعداد بڑھانے اور عوامی مفاد کے مسائل پر سنجیدہ غور و خوض کرنے کی ضرورت پر بھی کھرگے نے زور دیا۔
انہوں نے کہا، غریب، حاشیے پر رہنے والے طبقات، کسانوں اور مزدوروں کے مفاد سے متعلق مسائل پر زیادہ بحث ہونی چاہیے۔ اکثر جب ہم یہ مسائل اٹھاتے ہیں، تو حاکم جماعت اسے تنقید سمجھ کر بغیر سنے تردید شروع کر دیتی ہے؛ جبکہ حکومت کو عوامی تشویشات پر سنجیدگی سے غور کرنا چاہیے۔ اپوزیشن لیڈر نے یہ بھی کہا کہ محدود مواقع میں، جب پارلیمانی اراکین اہم نکات اٹھاتے ہیں، تو اکثر ان کے خیالات کو کارروائی سے ہٹا دیا جاتا ہے، حالانکہ وہ غیر پارلیمانی نہیں ہوتے۔ انہوں نے کہا، "خصوصی الفاظ کو ہٹانے سے بیان کے معنی اور مقصد ہی بدل جاتے ہیں۔
