ترواننت پورم : کیرالہ کے وزیراعلیٰ وی ڈی ستیشن نے بدھ کے روز اعلان کیا کہ ریاستی حکومت نے سابقہ لیفٹ ڈیموکریٹک فرنٹ (LDF) حکومت کے مجوزہ “سلور لائن سیمی ہائی اسپیڈ ریل کوریڈور” منصوبے کو مکمل طور پر ختم کرنے کا فیصلہ کر لیا ہے۔

پریس کانفرنس سے خطاب کرتے ہوئے انہوں نے کہا کہ منصوبے کے لیے جاری تمام زمین کے حصول کے نوٹیفکیشن واپس لے لیے جائیں گے اور اس منصوبے کے خلاف احتجاج کرنے والوں کے خلاف درج فوجداری مقدمات بھی عدالت کی اجازت سے واپس لینے کی سفارش کی جائے گی۔ کے ریل کے تحت مجوزہ 530 کلومیٹر طویل یہ منصوبہ ترواننت پورم سے کاسرگوڈ تک سفر کا وقت کم کر کے تقریباً چار گھنٹے کرنے کے لیے بنایا گیا تھا۔

یہ منصوبہ ریاستی حکومت اور ریلوے وزارت کے مشترکہ ادارے کے ذریعے تیار کیا گیا تھا۔ تاہم اس منصوبے کے خلاف ریاست بھر میں شدید احتجاج ہوا، خاص طور پر یونائیٹڈ ڈیموکریٹک فرنٹ کی قیادت میں۔ مظاہرین نے زمین کے حصول، ماحولیاتی خدشات اور آبادکاری کے مسائل پر اعتراضات اٹھائے تھے، اور کئی مقامات پر مجوزہ راستے کے نشانات بھی ہٹا دیے گئے تھے۔

وزیراعلیٰ نے کہا کہ حکومت نے یہ فیصلہ اس لیے کیا کیونکہ منصوبہ طویل عرصے سے تعطل کا شکار تھا اور زمین کے مالکان اپنی جائیدادوں کے لین دین سے بھی محروم ہو گئے تھے۔ انہوں نے بتایا کہ مرکزی حکومت نے بھی اس منصوبے کو باضابطہ منظوری نہیں دی تھی۔

وی ڈی ستیشان نے کہا کہ زمین کے حصول سے متعلق تمام نوٹیفکیشنز کو واپس لیا جائے گا اور محکمہ داخلہ احتجاجی مقدمات کا جائزہ لے کر ہر کیس کی نوعیت کے مطابق سفارشات دے گا، جبکہ حتمی فیصلہ عدالت کی منظوری سے مشروط ہوگا۔ ریونیو محکمہ کو بھی ہدایت دی گئی ہے کہ زمین کی نشاندہی کے لیے لگائے گئے پیلے نشانات کو ہٹا دیا جائے۔

وزیراعلیٰ نے وضاحت کی کہ حکومت اصولی طور پر ہائی اسپیڈ ریل کے خلاف نہیں ہے، لیکن سلور لائن منصوبہ ماحولیاتی اور مالیاتی وجوہات کی بنا پر ناقابلِ عمل تھا۔ انہوں نے کہا کہ کچھ حصوں میں 30 فٹ اونچے بند اور دیگر علاقوں میں 10 فٹ اونچی دیواریں تعمیر ہونا تھیں، جو مون سون میں ماحولیاتی مسائل پیدا کر سکتی تھیں۔ کابینہ نے اس کے علاوہ کیرالہ پبلک سروس کمیشن کی ریون لسٹوں کی مدت میں توسیع کی بھی منظوری دی ہے اور “ویژن 2031” کے تحت انتخابی وعدوں پر عملدرآمد کا آغاز کرنے کا اعلان کیا ہے۔