آمنہ فاروق۔ نئی دہلی
محرم الحرام کا مقدس مہینہ شروع ہوتے ہی حیدرآباد میں عقیدت، احترام اور سوگ کی فضا گہری ہو گئی ہے۔ شہر کی صدیوں پرانی روایات کے مطابق اس سال بھی عاشورہ کے موقع پر تاریخی بی بی کا علم کا جلوس نکالا جائے گا، جس میں کیرالہ سے لائی گئی ہتھنی "سری دیوی" خصوصی توجہ کا مرکز بنے گی۔ یہ روایت نہ صرف مذہبی وابستگی کی علامت ہے بلکہ حیدرآباد کی گنگا جمنی تہذیب، باہمی احترام اور مختلف برادریوں کے درمیان محبت و ہم آہنگی کی خوبصورت مثال بھی پیش کر رہی ہے۔محرم کے موقع پر جہاں امام حسینؑ کی عظیم قربانی کو یاد کیا جاتا ہے، وہیں یہ منظر انسانیت، اتحاد اور باہمی ہم آہنگی کا بھی پیغام دیتا ہے۔
سری دیوی کو کیرالہ سے حیدرآباد منتقل کیا گیا ہے اور جلوس کے منتظمین نے اسے پرانے شہر میں ایک مخصوص مقام پر رکھا ہے۔ ہفتہ کے روز ایک آزمائشی مشق (ٹرائل رن) بھی کی جائے گی تاکہ ہتھنی کو جلوس کے راستے سے واقف کرایا جا سکے۔ اسلامی (ہجری) کیلنڈر کا پہلا مہینہ محرم منگل کی رات نئے چاند کی رویت کے بعد شروع ہوا۔ اسلامی تاریخ میں اس مہینے کو خصوصی اہمیت حاصل ہے۔
تاریخی معرکۂ کربلا محرم کی دسویں تاریخ، یعنی عاشورہ کے دن 61 ہجری (10 اکتوبر 680 عیسوی) کو موجودہ عراق کے شہر کربلا میں پیش آیا تھا۔ اس جنگ میں حضرت امام حسینؑ نے اپنے اہلِ خانہ اور وفادار ساتھیوں کے ساتھ ظلم، جبر اور ناانصافی کے خلاف ڈٹ کر مقابلہ کیا۔
بی بی کا علم نصب کرنے کی روایت قطب شاہی دور سے چلی آ رہی ہے۔ محمد قطب شاہ کی اہلیہ حیات بخش بیگم نے بی بی فاطمہؑ کی یاد میں گولکنڈہ میں ایک علم نصب کروایا تھا۔ بعد ازاں آصف جاہی دور میں اس علم کو دبیراپورہ میں واقع "بی بی کا الاوہ" منتقل کیا گیا، جو خاص طور پر اسی مقصد کے لیے تعمیر کیا گیا تھا۔ شیعہ یوتھ کانفرنس کے صدر سید حامد حسین جعفری کے مطابق، اس علم میں اس لکڑی کے تختے کا ایک حصہ محفوظ ہے جس پر حضرت فاطمہؑ کو تدفین سے قبل آخری غسل دیا گیا تھا۔ یہ متبرک یادگار گولکنڈہ کے حکمراں عبداللہ قطب شاہ کے دور میں عراق کے شہر کربلا سے گولکنڈہ پہنچی تھی۔
دارالشفا، دبیراپورہ، نور خان بازار، زہرہ نگر اور رین بازار جیسے شیعہ اکثریتی علاقوں میں عاشور خانے تیار کر لیے گئے ہیں، جہاں مجالس، دعاؤں اور دیگر مذہبی رسومات کا اہتمام کیا جائے گا۔ حیدرآباد میں شیعہ آبادی کا تخمینہ تقریباً چار لاکھ ہے، جو پرانے شہر، مولا علی، حیات نگر، سکندرآباد اور راجندر نگر سمیت مختلف علاقوں میں مقیم ہے۔
وکیل سید علی جعفری نے بتایا کہ نئے چاند کی رویت کے بعد منگل کی رات بی بی کا علم دبیراپورہ کے بی بی کا الاوہ میں نصب کر دیا گیا تھا۔ مرکزی جلوس محرم کی دسویں تاریخ، یعنی 26 جون بروز جمعہ، روایتی انداز میں نکالا جائے گا اور علم کو ہتھنی پر سوار کر کے جلوس کا حصہ بنایا جائے گا۔
انہوں نے مزید بتایا کہ ہتھنی کو لانے اور اس کی دیکھ بھال کے تمام اخراجات حضور نظام کے اوقاف کمیٹی کی جانب سے برداشت کیے جا رہے ہیں۔بدھ کے روز اقلیتی بہبود کے وزیر محمد اظہرالدین نے متعلقہ محکموں کے افسران کے ساتھ بی بی کا الاوہ کا دورہ کیا اور زائرین و عزاداروں کے لیے کی جانے والی انتظامات کا جائزہ لیا۔
محرم کا پیغام صرف ایک مذہبی واقعے کی یاد تک محدود نہیں بلکہ حق، انصاف، صبر اور انسانیت کے آفاقی اصولوں کی یاد دہانی بھی ہے۔ حیدرآباد میں بی بی کا علم کے تاریخی جلوس میں کیرالہ سے آنے والی سری دیوی کی شرکت ایک بار پھر یہ ثابت کرتی ہے کہ ہندوستان کی اصل طاقت اس کی گنگا جمنی تہذیب، باہمی احترام اور مذہبی ہم آہنگی میں پوشیدہ ہے۔ جب مختلف مذاہب، ثقافتوں اور برادریوں کے لوگ ایک دوسرے کی روایات کا احترام کرتے ہوئے ساتھ کھڑے ہوتے ہیں تو اتحاد، محبت اور بھائی چارے کا وہ خوبصورت منظر سامنے آتا ہے جو پورے ملک کے لیے ایک روشن مثال بن جاتا ہے۔
_(1)_(1)_(1).webp "کیرالہ کی ہتھنی")
