جموں: فوج نے اتوار کو جموں و کشمیر کے کٹھوعہ ضلع میں بادل پھٹنے اور طوفانی سیلاب کے بعد جموں و کشمیر پولیس اور مقامی انتظامیہ کے ساتھ مل کر بڑے پیمانے پر ریسکیو آپریشن شروع کیا۔ حکام نے بتایا کہ اس آفت میں اب تک سات افراد ہلاک ہو چکے ہیں، جب کہ سات افراد زخمی ہوئے ہیں جنہیں ہیلی کاپٹر کے ذریعے پٹھانکوٹ کے فوجی اسپتال میں داخل کرایا گیا ہے۔
کٹھوعہ کے ڈپٹی کمشنر راجیش شرما نے کہا، "کٹھوعہ میں سڑکوں اور مکانات کو کافی نقصان پہنچا ہے۔ اس گاؤں میں پانچ افراد کی موت ہوئی ہے اور سات زخمی ہوئے ہیں۔ زخمیوں کو ہوائی جہاز سے ملٹری اسپتال پہنچایا گیا ہے۔ کئی مکانات کو بھی نقصان پہنچا ہے۔ متاثرہ لوگوں کو خوراک اور امدادی سامان فراہم کیا جا رہا ہے
کٹھوعہ میں فوجی دستے ریسکیو آپریشن میں مصروف
کٹھوعہ ضلع میں زمینی ریسکیو آپریشن کے حوالے سے پی آر او ڈیفنس جموں نے سوشل میڈیا پلیٹ فارم ایکس پر بتایا،“انڈین آرمی کے دستے کٹھوعہ میں موجود ہیں — خاندانوں کو بچا رہے ہیں، امید، خوراک اور نگہداشت فراہم کر رہے ہیں، کلاؤڈ برسٹ کے بعد۔”
اتوار کی صبح سویرے ہونے والی موسلا دھار بارش نے کٹھوعہ ضلع کے جودھ گھاٹی اور جنگلوٹے علاقوں میں اچانک سیلاب اور لینڈ سلائیڈنگ کو جنم دیا، جس کے نتیجے میں سات افراد جاں بحق اور متعدد زخمی ہوگئے۔ فوج، پولیس اور ڈیزاسٹر ریسپانس ٹیموں کی جانب سے ریسکیو آپریشن جاری ہے
۔فوج کے ہیلی کاپٹر بھی ریسکیو میں شامل
پی ٹی آئی کے مطابق فوج نے جموں و کشمیر کے کٹھوعہ ضلع کے جودھ گھاٹی گاؤں میں کلاؤڈ برسٹ سے متاثرہ مقام پر ہیلی کاپٹر اور کئی دستے تعینات کر دیے ہیں۔اہلکاروں کے مطابق متاثرہ علاقوں میں پھنسے ہوئے افراد کو بچانے اور زخمیوں کو اسپتال منتقل کرنے کے لیے فوجی دستے بڑے پیمانے پر کارروائی کر رہے ہیں
۔ہیلی کاپٹروں کے ذریعے چھ زخمیوں کو منتقل کیا گیا
جموں و کشمیر کے کٹھوعہ ضلع میں کلاؤڈ برسٹ کے بعد، مرکزی وزیر جیتندر سنگھ نے بتایا کہ زخمیوں کو قریبی اسپتالوں تک پہنچانے کے لیے ہیلی کاپٹر سروس کا انتظام کیا گیا ہے۔چھ زخمیوں کو پٹھانکوٹ کے مامون اسپتال منتقل کیا گیا ہے، جبکہ ریسکیو ٹیمیں موقع پر کارروائی جاری رکھے ہوئے ہیں۔سنگھ نے ایکس پر لکھا:“زخمیوں کو مناسب اسپتالوں تک پہنچانے کے لیے ہیلی کاپٹر سروس کا انتظام کیا گیا ہے۔ چھ زخمیوں کو مامون، پٹھانکوٹ منتقل کیا گیا ہے، جو نسبتاً قریب سمجھا گیا۔”انہوں نے مزید کہا کہ ڈی آئی جی پولیس شیو کمار شرما اور ان کی ٹیم موقع پر موجود ہیں اور ان سے باقاعدہ رابطے میں ہیں، مزید امداد حسب ضرورت فراہم کی جائے گی۔
