نئی دہلی

دہلی کی ایک عدالت نے منگل کے روز کشمیری علیحدگی پسند رہنما اور ‘دخترانِ ملت’ کی سربراہ آسیہ اندرابی کو عمر قید کی سزا سنا دی۔ عدالت نے غیر قانونی سرگرمیاں (روک تھام) ایکٹ (یو اے پی اے) کے ایک مقدمے میں مجرم قرار دیے جانے کے بعد انہیں عمر قید کی سزا سنائی۔ ایڈیشنل سیشن جج چندر جیت سنگھ نے یہ فیصلہ سنایا۔ عدالت نے اندرابی کی دو ساتھیوں صوفی فہمیدہ اور ناہیدہ نسرین کو بھی اسی کیس میں مجرم قرار دیتے ہوئے 30 سال قید کی سزا سنائی۔

یو اے پی اے کی دفعات کے تحت سزا

اس سے قبل 14 جنوری کو اندرابی، فہمیدہ اور نسرین کو یو اے پی اے کی دفعات 20 (دہشت گرد تنظیم یا گروہ کا رکن ہونے پر سزا)، 38 (دہشت گرد تنظیم کی رکنیت) اور 39 (دہشت گرد تنظیم کی حمایت) کے تحت قصوروار ٹھہرایا گیا تھا۔ عدالت نے ان تینوں کو آئی پی سی کی دفعات 153اے (مختلف گروہوں کے درمیان دشمنی کو فروغ دینا)، 153بی (قومی یکجہتی کے خلاف بیانات یا دعوے)، 120بی (مجرمانہ سازش)، 505 (عوامی اشتعال انگیزی پھیلانے والے بیانات) اور 121اے (ریاست کے خلاف جرم کی سازش) کے تحت بھی مجرم قرار دیا۔

مجرم قرار دیے جانے کے بعد قومی تحقیقاتی ایجنسی (این آئی اے) نے اندرابی کے لیے عمر قید کی سزا کا مطالبہ کیا تھا۔ این آئی اے نے کہا تھا کہ آسیہ اندرابی نے ہندوستان کے خلاف جنگ چھیڑی ہے اور یہ ضروری ہے کہ ملک کے خلاف سازش کرنے والوں کو سخت ترین سزا دی جائے۔

کون ہیں آسیہ اندرابی؟

۔64 سالہ آسیہ اندرابی ‘دخترانِ ملت’ (ڈی ای ایم) کی بانی اور سربراہ ہیں۔ یہ خواتین پر مبنی ایک علیحدگی پسند تنظیم ہے، جسے ابتدا میں ایک سماجی و مذہبی اصلاحی تحریک کے طور پر پیش کیا گیا تھا۔ سال 2018 میں مرکزی حکومت نے ڈی ای ایم کو دہشت گرد تنظیم قرار دیتے ہوئے پورے ملک میں اس پر پابندی عائد کر دی تھی۔

۔1963 میں پیدا ہونے والی اندرابی نے سری نگر سے ہوم سائنس میں گریجویشن کیا ہے۔ ابتدا میں وہ جموں و کشمیر سے باہر جا کر اعلیٰ تعلیم حاصل کرنا چاہتی تھیں، لیکن بعد میں ان کا رجحان اسلامی ادب کی طرف ہو گیا، جس نے ان کے نظریاتی سفر کو کافی متاثر کیا۔ بعد ازاں وہ جماعتِ اسلامی کی خواتین شاخ میں شامل ہو گئیں۔ اس تنظیم پر بھی 2019 میں مرکزی حکومت نے انتہاپسندی اور علیحدگی پسند نظریات کو فروغ دینے کے الزام میں پابندی لگا دی تھی۔

۔1985 میں تنظیم کی بنیاد

1985 میں اندرابی نے جماعتِ اسلامی سے علیحدگی اختیار کر کے ‘دخترانِ ملت’ کی بنیاد رکھی۔ اس تنظیم کو 1990 کی دہائی کے اوائل، خاص طور پر 1991 میں اس وقت زیادہ پہچان ملی جب اس نے وادی کے کئی علاقوں میں برقعہ لازمی کرنے اور سخت مذہبی اصولوں کو نافذ کرنے کے لیے مہم چلائی۔

سکیورٹی ایجنسیوں کا ماننا ہے کہ ڈی ای ایم نے نظریاتی انتہاپسندی کو فروغ دینے میں اہم کردار ادا کیا اور شدت پسند و علیحدگی پسند تحریکوں کے لیے معاون ڈھانچے کے طور پر کام کیا۔ 1990 میں آسیہ اندرابی نے عاشق حسین فکتو سے شادی کی، جو ایک سزا یافتہ شدت پسند کمانڈر ہیں اور اس وقت عمر قید کی سزا کاٹ رہے ہیں۔ دو بچوں کی ماں اندرابی کو پہلی بار 1993 میں گرفتار کیا گیا تھا اور اس کے بعد انہیں پبلک سیفٹی ایکٹ (پی ایس اے) اور دیگر سکیورٹی قوانین کے تحت کئی بار حراست میں لیا جا چکا ہے۔ خفیہ ایجنسیوں کے مطابق ان کی بار بار گرفتاریوں سے علیحدگی پسند سیاست اور ملک مخالف سرگرمیوں میں ان کی طویل شمولیت ظاہر ہوتی ہے۔