بنگلورو،سرینگر: جموں و کشمیر کے وزیر اعلیٰ عمر عبداللہ نے کلگام میں ہونے والے دہشت گرد حملے کی سخت مذمت کرتے ہوئے کہا ہے کہ معاوضے کی رقم ان خاندانوں کے غم اور نقصان کی تلافی نہیں کر سکتی، جو دیانت داری سے روزگار کمانے کے لیے کشمیر آئے تھے۔

حکام کے مطابق جنوبی کشمیر کے کلگام ضلع کے کیلم علاقے میں جمعہ کی شام ایک اینٹ بھٹے پر دہشت گرد حملے میں دیپک راترے اور بھوپیندر (دونوں کی عمر تقریباً 20 سے 25 سال) ہلاک ہو گئے۔ بنگلورو میں ایک پروگرام کے بعد صحافیوں سے گفتگو کرتے ہوئے عمر عبداللہ نے کہا، "وہ روزگار کی تلاش میں کشمیر آئے تھے۔ ریاست سے باہر کے یہ لوگ ایمانداری سے محنت مزدوری کر رہے تھے، لیکن ایسے بے گناہ افراد کو نشانہ بنایا گیا۔ اس حملے کی جتنی بھی مذمت کی جائے کم ہے۔

" انہوں نے کہا کہ کوئی بھی مالی امداد اس سانحے کے زخم نہیں بھر سکتی اور نہ ہی متاثرہ خاندانوں کے درد کو کم کر سکتی ہے۔ انہوں نے مزید کہا، "تاہم ہماری طرف سے یہ ایک چھوٹی سی کوشش ہے تاکہ اس مشکل وقت میں متاثرہ خاندانوں کی کچھ مدد کی جا سکے۔"

عمر عبداللہ نے حملے میں ہلاک ہونے والے چھتیس گڑھ کے دونوں مہاجر مزدوروں کے اہلِ خانہ کے لیے 10،10 لاکھ روپے کی امدادی رقم دینے کا اعلان کیا ہے۔ یہ رقم ضلع انتظامیہ کی جانب سے پہلے سے اعلان کردہ 6،6 لاکھ روپے کی فوری امداد کے علاوہ ہوگی۔نیشنل کانفرنس کے صدر فاروق عبداللہ، کشمیر کے میرواعظ عمر فاروق اور دیگر سیاسی رہنماؤں نے کلگام ضلع میں ایک روز قبل دہشت گرد حملے میں چھتیس گڑھ سے تعلق رکھنے والے دو مہاجر مزدوروں کے قتل کی سخت مذمت کرتے ہوئے اسے انتہائی غیر انسانی قرار دیا ہے۔

نیشنل کانفرنس نے سوشل میڈیا پلیٹ فارم ایکس پر جاری بیان میں کہا کہ پارٹی صدر فاروق عبداللہ اور وزیر اعلیٰ عمر عبداللہ نے کلگام کے دیوسر علاقے میں دو غیر مقامی مزدوروں کے قتل کی شدید الفاظ میں مذمت کی ہے۔ نیشنل کانفرنس نے سوگوار خاندانوں سے گہری تعزیت کا اظہار کرتے ہوئے دعا کی کہ اللہ تعالیٰ انہیں یہ ناقابلِ تلافی صدمہ برداشت کرنے کی ہمت عطا کرے۔ پارٹی نے کہا، ایسے بے بس اور معصوم لوگوں کو نشانہ بنانا انتہائی غیر انسانی عمل ہے اور اس کی سخت مذمت ہونی چاہیے۔

جنوبی کشمیر کے کلگام ضلع کے کیلم علاقے میں جمعہ کی شام ایک اینٹ بھٹے پر ہونے والے دہشت گرد حملے میں دو مہاجر مزدور دیپک راترے اور بوپیندر جاں بحق ہو گئے۔ حکام کے مطابق دیپک راترے اسپتال پہنچنے سے پہلے ہی دم توڑ گئے، جبکہ بوپیندر کو پہلے گورنمنٹ میڈیکل کالج اننت ناگ اور بعد میں ایس کے آئی ایم ایس، صورہ منتقل کیا گیا، جہاں دورانِ علاج ان کا انتقال ہو گیا۔ مارکسی کمیونسٹ پارٹی (سی پی آئی ایم) کے رہنما اور کلگام کے رکن اسمبلی ایم وائی تاریگامی نے اس واقعے کو وحشیانہ قرار دیتے ہوئے کہا کہ یہ مزدور اپنے خاندانوں کی کفالت اور ایمانداری سے روزی کمانے کے لیے ہزاروں کلومیٹر دور کشمیر آئے تھے۔

انہوں نے کہا، "ان پر حملہ کرنا بدترین سفاکی ہے۔ ایسی بربریت کسی بھی صورت قابلِ قبول نہیں اور اس کے ذمہ داروں کو قانون کے کٹہرے میں لایا جانا چاہیے۔" میرواعظ عمر فاروق نے بھی اس قتل کی مذمت کرتے ہوئے کہا کہ ہر صورت میں تشدد کو ترک کیا جانا چاہیے۔ انہوں نے کہا کہ ہر بے گناہ انسانی جان مقدس ہے اور معصوم افراد کے قتل کی غیر مشروط مذمت کی جانی چاہیے۔

بھارتیہ جنتا پارٹی کی جموں و کشمیر یونٹ کے ترجمان الطاف ٹھاکر نے بھی حملے کی مذمت کرتے ہوئے اسے امن کو خراب کرنے کی نیت سے کیا گیا بزدلانہ اور وحشیانہ اقدام قرار دیا۔ انہوں نے کہا کہ امرناتھ یاترا جاری ہے اور وادی میں بڑی تعداد میں سیاح آ رہے ہیں، ایسے میں اس قسم کے حملوں کا مقصد کشمیر کی معیشت کو نقصان پہنچانا ہے۔

اپنی پارٹی کے رہنما اور سابق وزیر اشرف میر نے کہا کہ حملہ آوروں کے خلاف سخت کارروائی ہونی چاہیے، تاہم بے گناہ لوگوں کو اس کی سزا نہیں ملنی چاہیے۔ واضح رہے کہ کلگام کا یہ حملہ اننت ناگ میں دس روز سے بھی کم عرصہ قبل ہونے والے دہشت گرد حملے کے بعد پیش آیا، جس میں ایک پولیس افسر کو گولی مار کر ہلاک کر دیا گیا تھا۔