گلمرگ ۔ سری نگر  ::جموں و کشمیر کے ضلع بارہ مولا میں واقع مشہور سیاحتی مقام گلمرگ تازہ برف باری کے بعد ایک حسین سفید وادی میں تبدیل ہو گیا ہے۔ سرسبز گھاس کے میدانوں اور دلکش مناظر کے لیے مشہور یہ پہاڑی مقام اب نرم اور چمکدار برف کی تہہ میں ڈھک چکا ہے جس نے سیاحوں کو اپنی جانب کھینچ لیا ہے۔

یہ اس موسم کی پہلی بڑی برف باری ہے جس سے وادی کشمیر میں سردیوں کی باضابطہ آمد کا اشارہ ملا ہے۔ برف سے ڈھکی چوٹیوں اور خوبصورت مناظر کی وجہ سے گلمرگ موسم سرما کی تفریحی سرگرمیوں جیسے اسکیئنگ، اسنوبورڈنگ اور سنو شوئنگ کے لیے مشہور ہے۔ سردیوں کے آغاز کے ساتھ ہی یہاں سیاحوں کی آمد میں اضافے کی توقع ہے۔ برف سے ڈھکی پہاڑیاں اور دلکش وادیاں دیکھنے والوں کے لیے ایک شاندار نظارہ پیش کرتی ہیں۔

گلمرگ کے پہاڑ، درخت اور میدان سفید برف کی چادر میں لپٹے ہوئے ہیں اور سورج کی کرنوں میں چمک رہے ہیں جیسے ہیروں سے ڈھک گئے ہوں۔ یہ منظر گلمرگ کو ایک جادوئی سفید وادی میں بدل دیتا ہے۔

یہ علاقہ فوٹوگرافی اور قدرتی سیر کے شوقین افراد کے لیے خاص مقام رکھتا ہے۔ برف سے ڈھکنے کے بعد درختوں نے سفید لباس اوڑھ لیا ہے اور پورا منظر خواب جیسا معلوم ہوتا ہے۔ برف پوش پہاڑیاں، لہراتی ڈھلوانیں اور پُرسکون فضا نے ایک دلکش منظرنامہ پیدا کیا ہے جو واقعی دیدنی ہے۔

ریجنل موسمیات مرکز جموں و کشمیر کے مطابق گلمرگ میں آج کم از کم درجہ حرارت منفی 2 ڈگری سیلسیس جبکہ زیادہ سے زیادہ 10 ڈگری سیلسیس ریکارڈ کیا گیا ہے۔ موسم کے لیے پیش گوئی ’’جزوی طور پر ابر آلود آسمان اور ہلکی بارش‘‘ کی گئی ہے۔

6 اور 7 نومبر کو علاقے میں ’’زیادہ تر صاف آسمان‘‘ رہے گا۔ ان دنوں زیادہ سے زیادہ درجہ حرارت 13 ڈگری سیلسیس اور کم از کم 0 ڈگری سیلسیس رہنے کا امکان ہے۔

جبکہ 8 سے 10 نومبر تک علاقے میں ’’صاف آسمان‘‘ کے ساتھ زیادہ سے زیادہ درجہ حرارت 12 ڈگری سیلسیس اور کم از کم 1 ڈگری سیلسیس رہنے کی توقع ہے۔