سری نگر: جموں و کشمیر کے وزیر اعلیٰ عمر عبداللہ نے جمعرات کو کہا کہ کشمیر کو صرف خوبصورت فلمی مناظر کی عکس بندی کے لیے استعمال ہونے والے مقام تک محدود نہیں رہنا چاہیے بلکہ اسے ایک ایسے زندہ دل اور فعال تخلیقی مرکز کے طور پر ترقی دینی چاہیے جہاں اپنی کہانیاں لکھی اور سوچی جائیں اور ان پر فلمیں بھی بنائی جائیں۔

سری نگر میں ڈل جھیل کے کنارے واقع شیرِ کشمیر انٹرنیشنل کنونشن سینٹر (ایس کے آئی سی سی) میں پہلے بین الاقوامی جموں و کشمیر فلم فیسٹیول کے اختتامی پروگرام سے خطاب کرتے ہوئے عمر عبداللہ نے کہا کہ جموں و کشمیر کے پاس اپنی خوبصورت وادیوں اور دلکش مناظر کے علاوہ بھی فلمی دنیا کو دینے کے لیے بہت کچھ ہے۔ اس موقع پر مرکزی وزیر مملکت برائے اطلاعات و نشریات ایل مروگن بھی موجود تھے۔

عمر عبداللہ نے ڈل جھیل پر کھلے آسمان تلے ’جنگلی‘، ’آرزو‘، ’کشمیر کی کلی‘ اور ’کبھی کبھی‘ جیسی یادگار فلموں کی خصوصی نمائش کا ذکر کرتے ہوئے کہا، ’’کئی دہائیوں تک کشمیر سنیما کے پردے کے ذریعے ناظرین تک پہنچتا رہا۔ اس ہفتے، ایک طرح سے، وہ پردہ واپس کشمیر آ گیا۔ مجھے امید ہے کہ سنیما جموں و کشمیر کے پہلے فلم فیسٹیول کی سب سے یادگار یادوں میں سے ایک رہے گا۔‘‘

انہوں نے کہا کہ ہماری خواہش صرف ایک خوبصورت فلمی مقام بنے رہنے تک محدود نہیں ہونی چاہیے۔ جموں و کشمیر کو مسلسل ایسی جگہ بنانا ہوگا جہاں سے نئی کہانیاں جنم لیں، نئی صلاحیتوں کو تلاش کیا جائے اور فلموں کا تصور پیش کرنے سے لے کر ان کی تیاری تک کا کام یہیں ہو۔

چار روزہ فلم فیسٹیول میں 30 سے زیادہ ملکوں کی 120 سے زائد فلمیں دکھائی گئیں۔ اس دوران ٹیکنالوجی، فنِ کاری، فلم سازی اور کہانی بیان کرنے جیسے موضوعات پر ماہرین کے سیشن، مباحثے اور باہمی تعاون پر مبنی پروگرام بھی منعقد کیے گئے۔

اس موقع پر نیشنل کانفرنس کے صدر فاروق عبداللہ نے امید ظاہر کی کہ جموں و کشمیر کے نوجوان اس پہلے بین الاقوامی فلم فیسٹیول سے فائدہ اٹھاتے ہوئے مرکز کے زیر انتظام علاقے میں بالی ووڈ جیسی فلمی صنعت قائم کریں گے۔ فاروق عبداللہ نے صحافیوں سے بات کرتے ہوئے کہا، ’’مجھے لگتا ہے کہ یہ بہت شاندار کام ہوا ہے۔ مجھے امید ہے کہ ہمارے لڑکے اور لڑکیاں اس کا بھرپور فائدہ اٹھائیں گے۔ یہیں سے ہمارے اپنے فنکار، مصنف، موسیقی کے ہدایت کار اور فلم ڈائریکٹر سامنے آئیں گے۔ ہمارے نوجوان ہر شعبے میں آگے آئیں گے۔‘‘ پہلے بین الاقوامی جموں و کشمیر فلم فیسٹیول کا اختتام بھی شاندار انداز میں ہوا۔

مشہور پاپ اور پسِ پردہ گلوکارہ اوشا اتھپ نے اپنی زبردست پرفارمنس سے اختتامی تقریب کو یادگار بنا دیا۔ دگج گلوکارہ نے ہندی فلموں کے مقبول گانوں، مغربی جاز اور پاپ دھنوں کے خوبصورت امتزاج سے پورے ماحول کو جشن میں تبدیل کر دیا۔ ان کی پرفارمنس پر نوجوانوں سے لے کر بزرگوں، فلم سازوں، غیر ملکی مندوبین اور مقامی معززین تک، بڑی تعداد میں لوگ اپنی نشستوں سے اٹھ کر جھومنے لگے۔

اوشا اتھپ نے اپنی منفرد اور بھاری آواز میں ’ہری اوم ہری‘ اور ’ڈارلنگ‘ جیسے اپنے انتہائی مقبول اور جوشیلے گانے پیش کیے۔ وہ ایک گھنٹے سے زیادہ دیر تک یکے بعد دیگرے گانے گاتی رہیں اور وہاں موجود، خاص طور پر نوجوان، ناظرین مسلسل محظوظ ہوتے رہے۔ اوشا اتھپ کی شاندار پرفارمنس کے دوران جموں و کشمیر کے وزیر اعلیٰ عمر عبداللہ اور ان کے والد فاروق عبداللہ بھی اپنی نشستوں سے اٹھ کر جھومنے لگے۔ اس طرح چار روزہ فلم فیسٹیول کا اختتام موسیقی، سنیما اور جشن کے یادگار ماحول میں ہوا۔