بنگلورو: کرناٹک کے گورنر تھاورچند گہلوت نے 22 جنوری کو ریاستی اسمبلی اور کونسل کے مشترکہ اجلاس سے خطاب کرنے سے انکار کر دیا ہے۔ سرکاری ذرائع نے بدھ کے روز یہ جانکاری دی۔ اس سلسلے میں قانون اور پارلیمانی امور کے وزیر ایچ کے پاٹل کی قیادت میں ایک اعلیٰ سطحی وفد گورنر سے ملاقات کے لیے راج بھون (لوک بھون) جائے گا۔

وزیرِ قانون کے دفتر کی جانب سے جاری بیان میں کہا گیا ہے: “گورنر کی جانب سے کل ہونے والے مشترکہ اجلاس سے خطاب سے انکار کے بعد، وزیرِ قانون کی سربراہی میں آج شام 5:45 بجے ایک اعلیٰ سطحی وفد راج بھون (لوک بھون) جائے گا۔” تاہم گورنر کے انکار کی وجوہات فی الحال واضح نہیں ہو سکی ہیں۔ کرناٹک مقننہ کا مشترکہ اجلاس 22 جنوری سے شروع ہو رہا ہے۔

اس اجلاس کے ہنگامہ خیز رہنے کا امکان ہے، کیونکہ حکمراں کانگریس اور اپوزیشن بی جے پی-جنتا دل (سیکولر) اتحاد کے درمیان کئی اہم معاملات پر ٹکراؤ متوقع ہے، جن میں مرکز کی جانب سے مہاتما گاندھی نیشنل رورل ایمپلائمنٹ گارنٹی ایکٹ (منریگا) کو “ختم” کرنے کا مسئلہ بھی شامل ہے۔ یہ اجلاس 22 سے 31 جنوری تک جاری رہے گا اور روایتی طور پر اس کا آغاز جمعرات کو گورنر کے خطاب سے ہونا تھا۔

حکمراں کانگریس مرکز میں بی جے پی کی قیادت والی این ڈی اے حکومت کے خلاف ایک قرارداد پیش کرنے کا ارادہ رکھتی ہے، جس میں منریگا کو ختم کیے جانے پر اعتراض کرتے ہوئے اس کی بحالی کا مطالبہ کیا جائے گا۔ اس کے ساتھ ہی نئے وکست بھارت روزگار آجیویکا مشن (دیہی) (وی بی-جی رام جی) ایکٹ کو بھی منسوخ کرنے کی مانگ کی جائے گی۔