نئی دہلی/ آواز دی وائس
ساون کے مہینے کا آغاز جمعہ یعنی آج سے ہو چکا ہے۔ ملک بھر کے شیو مندروں میں خصوصی پوجا کا سلسلہ شروع ہو گیا ہے۔ ہندو عقیدے کے مطابق، اس مہینے میں بھولے ناتھ کی پوجا سے تمام مرادیں پوری ہوتی ہیں۔ یہی وجہ ہے کہ صبح سے ہی شیو مندروں میں عقیدت مندوں کا ہجوم نظر آ رہا ہے۔ اسی کے ساتھ، آج سے کانوڑ یاترا کا بھی آغاز ہو گیا ہے، جو 9 اگست تک جاری رہے گی۔ اس 28 روزہ یاترا کے دوران ہریدوار سے تقریباً ساڑھے چار کروڑ کانوڑیوں کے آنے کی امید ہے۔
گنگا گھاٹوں پر کانوڑیوں کا رش
ساون کے پہلے دن سے ہی ہزاروں شیو بھگت کندھوں پر کانوڑ اٹھائے گنگا جل کے ساتھ اپنے سفر پر روانہ ہو گئے ہیں۔ ہریدوار میں ہر کی پیڑی سے لے کر گنگا کے دیگر گھاٹوں تک کانوڑیوں کی زبردست بھیڑ جمع ہو رہی ہے۔
اس یاترا کے پیش نظر دہلی، اتر پردیش اور اتراکھنڈ میں خاص انتظامات کیے گئے ہیں۔ کانوڑ روٹ پر سخت حفاظتی بندوبست کیے گئے ہیں۔ پورے راستے پر سکیورٹی اہلکار تعینات ہیں اور سی سی ٹی وی کیمروں سے کڑی نگرانی کی جا رہی ہے۔
کھانے پینے کی دکانوں کی مسلسل جانچ ہو رہی ہے، اور فوڈ اینڈ سیفٹی ڈپارٹمنٹ کے اہلکار سیمپل لے رہے ہیں۔ کانوڑ کے راستے پر نان ویج دکانیں بند کر دی گئی ہیں تاکہ یاترا کی پاکیزگی برقرار رکھی جا سکے۔
کانوڑ روٹ پر گوشت کی دکانوں پر سختی
غازی آباد میں کانوڑ روٹ پر گوشت کی دکانیں کھلی دیکھ کر مقامی بی جے پی ایم ایل اے نند کشور گجر نے سخت رویہ اختیار کیا۔ انہوں نے پولیس کو ڈانٹتے ہوئے کہا کہ کانوڑ شروع ہو چکی ہے، ساون لگ چکا ہے، پورنیما ہے۔ کانوڑ راستے پر گوشت کی دکانوں کا کوئی لائسنس اب قابل قبول نہیں ہے۔ فوراً کارروائی کیجیے، ورنہ اگر لوگ قانون ہاتھ میں لیں گے تو پھر آپ ہی کہیں گے کہ کیا ہو گیا۔
ایم ایل اے نے پولیس سے ہدایت دی کہ تھانے کے انچارج سے جواب طلب کریں اور تمام دکانیں فوراً بند کرائیں۔
ہندو دکانوں پر لگے پوسٹر
اتر پردیش کے مراد نگر میں کانوڑ روٹ پر پڑنے والی ہندو دکانداروں کی دکانوں پر پوسٹر لگا دیے گئے ہیں۔ گنگا نگر اور آس پاس کے علاقوں میں ہندو رکشا دل کے کارکنان تعینات ہیں۔ ان کا الزام ہے کہ کانوڑ لے کر جانے والی خواتین کے ساتھ دوسرے مذاہب کے لوگ بدتمیزی کرتے ہیں۔
ہندو رکشا دل کے گورو سسودیا نے کہا کہ ہم کانوڑیوں کی حفاظت اور یاترا کی پاکیزگی یقینی بنانے کے لیے تعینات ہیں۔
کانوڑ بنانے کو لے کر تنازعہ
ہریدوار میں کانوڑ بنانے کو لے کر تنازعہ بھی سامنے آیا ہے۔ کچھ سنتوں اور مہامندلیشوروں نے اتراکھنڈ کے وزیر اعلیٰ پشکر سنگھ دھامی کو خط لکھ کر مطالبہ کیا ہے کہ مسلمانوں کو ہریدوار کی حدود کے باہر کانوڑ بنانے کی اجازت دی جائے۔ ان کا کہنا ہے کہ ہریدوار میں مسلمانوں کو کانوڑ بنانے کی اجازت نہیں دی جانی چاہیے۔
سوامی یتندرانند گری، جونا اکھاڑے کے مہامندلیشور، نے اس مطالبے کو زور دار طریقے سے اٹھایا ہے۔
اس کے جواب میں، ہریدوار کے جولاپور علاقے کی اندرا نگر کالونی میں کانوڑ بنانے والے مسلم کاریگروں نے کہا کہ وہ نسلوں سے یہ کام کرتے آ رہے ہیں۔ تقریباً 50 مسلم خاندان اب بھی اس کام سے وابستہ ہیں۔
اتراکھنڈ حکومت نے تاحال اس معاملے میں کوئی پابندی عائد نہیں کی ہے۔
گزشتہ سال 4 کروڑ کانوڑیوں نے یاترا کی تھی
دہلی پولیس نے کانوڑیوں سے اپیل کی ہے کہ وہ صرف مقررہ راستوں کا ہی استعمال کریں۔ ایڈیشنل کمشنر دنیش کمار گپتا نے کہا ہم نے کانوڑیوں کی حفاظت اور سہولت کے لیے تمام ضروری انتظامات کیے ہیں، براہِ کرم مقررہ راستوں کی پابندی کریں۔
قابلِ ذکر ہے کہ ساون کے مہینے میں 23 جولائی کو ساون کی شیو راتری منائی جائے گی۔ اس کے بعد بھی 9 اگست تک عقیدت مند گنگا جل چڑھاتے رہیں گے۔ گزشتہ سال 4 کروڑ سے زائد کانوڑیوں نے اس یاترا میں حصہ لیا تھا، اور اس سال اس تعداد کے مزید بڑھنے کا امکان ہے۔ یہی وجہ ہے کہ انتظامیہ نے اس بار پہلے سے زیادہ سخت اور وسیع انتظامات کیے ہیں۔
