نئی دہلی:اداکارہ اور بی جے پی رکن پارلیمنٹ کنگنا رناوت نے جمعہ کو سپریم کورٹ سے اپنی وہ درخواست واپس لے لی جس میں انہوں نے 2020-21 کے کسان تحریک کے تعلق سے مبینہ طور پر توہین آمیز تبصرہ کرنے پر ان کے خلاف درج شکایت کو خارج کرنے سے ہائی کورٹ کے انکار کو چیلنج کیا تھا۔ سپریم کورٹ نے ان سے کہا، ’’یہ صرف ایک عام ری ٹویٹ نہیں تھا بلکہ آپ نے اس میں مرچ مصالحہ لگا دیا تھا۔‘‘

یہ معاملہ جسٹس وکرم ناتھ اور جسٹس سندیپ مہتا کی بنچ کے سامنے سماعت کے لیے آیا۔ بنچ نے سماعت میں عدم دلچسپی ظاہر کرتے ہوئے کہا کہ متعلقہ ٹویٹ یا ری ٹویٹ کی تعبیر پر کم از کم مقدمہ خارج کرنے کی درخواست میں غور نہیں کیا جا سکتا۔ کنگنا کے وکیل نے بنچ سے کہا کہ اداکارہ نے صرف ایک ٹویٹ کو ری ٹویٹ کیا تھا۔

وکیل نے کہا، ’’انہوں نے بس ٹویٹ کو ری ٹویٹ کیا تھا۔ اصل ٹویٹ پر پہلے ہی کئی لوگوں کے ری ٹویٹس موجود تھے۔‘‘ جسٹس مہتا نے کہا، ’’صفحہ 35 پر اپنی رائے کے بارے میں آپ کیا کہیں گی؟ جیسا کہ آپ کہتی ہیں، یہ کوئی عام ری ٹویٹ نہیں ہے۔ آپ نے کچھ اور جوڑا تھا، آپ نے پہلے کی بات میں مرچ مصالحہ ڈال دیا تھا۔‘‘

جب وکیل نے ری ٹویٹ کا ذکر کیا تو بنچ نے کہا، ’’اس کا کیا مطلب ہے؟ یہ تو مقدمے کا موضوع ہے۔‘‘ وکیل نے کہا کہ انہوں نے مقدمہ خارج کرنے کی درخواست دائر کی ہے اور رناوت نے وضاحت بھی دی ہے۔ جسٹس مہتا نے کہا کہ وضاحت نچلی عدالت میں دی جا سکتی ہے، مقدمہ خارج کرنے کی کارروائی میں نہیں۔ وکیل نے کہا کہ آج ان کی مؤکلہ کی حالت یہ ہے کہ وہ پنجاب میں سفر نہیں کر سکتیں۔ بنچ نے کہا کہ وہ پیشی سے چھوٹ کی درخواست کر سکتی ہیں۔

وکیل نے کہا کہ نچلی عدالت نے رناوت کو سمن جاری کرتے وقت ان کی وضاحت پر غور نہیں کیا۔ بنچ نے کہا، ’’ممکن ہے شکایت کنندہ نے اسے آگے نہ بڑھانے کا فیصلہ کیا ہو۔ یہ آپ کے لیے ایک درست دفاع ہو سکتا ہے۔‘‘ بنچ نے مزید کہا، ’’صفحہ 35 پر جو لکھا ہے اس پر ہمیں تبصرہ کرنے کے لیے نہ کہیں۔

اس سے آپ کے مقدمے پر منفی اثر پڑ سکتا ہے۔ ہمیں تبصرہ کرنے کے لیے نہ کہیں۔ آپ کے پاس ایک درست دفاع ہو سکتا ہے، ہم اس پر غور نہیں کر رہے ہیں۔ لیکن ایسا کرنے کے اور بھی طریقے ہیں۔‘‘ جسٹس ناتھ نے وکیل سے پوچھا کہ کیا درخواست گزار اپنی درخواست واپس لینا چاہتی ہیں۔ وکیل نے کہا، ’’میری مؤکلہ درخواست واپس لیں گی۔‘‘

تب بنچ نے اس کی اجازت دے دی۔ اداکاری سے سیاست میں آنے والی کنگنا نے اپنے خلاف شکایت کو خارج کرنے سے انکار کرنے والے پنجاب اور ہریانہ ہائی کورٹ کے حکم کو چیلنج کرنے کے لیے سپریم کورٹ کا رخ کیا تھا۔ انہوں نے ہتک عزت کی اس شکایت کو چیلنج کیا تھا جو ان کے اس ری ٹویٹ پر مبنی تھی جس میں اب منسوخ ہو چکے زرعی قوانین کے خلاف 2020-21 کے کسان مظاہروں کے دوران ایک خاتون مظاہرہ کار کے بارے میں ان کا اپنا تبصرہ شامل تھا۔

شکایت کنندہ مہندر کور (73)، جو پنجاب کے بٹھنڈہ ضلع کے بہادرگڑھ جانڈیاں گاؤں کی رہائشی ہیں، نے جنوری 2021 میں بٹھنڈہ میں شکایت درج کرائی تھی۔ بٹھنڈہ کی ایک عدالت میں ان کی شکایت میں کہا گیا تھا کہ اداکارہ نے ایک ری ٹویٹ میں ان کے خلاف ’’جھوٹے الزامات اور تبصرے‘‘ کیے تھے، جن میں کہا گیا تھا کہ وہ وہی ’’دادی‘‘ ہیں جو شاہین باغ میں ہوئے احتجاج میں شامل تھیں۔ کنگنا کے وکیل نے پنجاب اور ہریانہ ہائی کورٹ میں دلیل دی تھی کہ بٹھنڈہ عدالت کا سمن آرڈر ضابطہ فوجداری کی خلاف ورزی کی بنیاد پر برقرار نہیں رہ سکتا۔