پریاگ راج/ آواز دی وائس

الہ آباد ہائی کورٹ کے 13 ججوں نے ملک کی سب سے بڑی عدالت سپریم کورٹ کے ایک فیصلے کے خلاف محاذ کھولتے ہوئے الہ آباد ہائی کورٹ کے چیف جسٹس ارون بھنسالی سے فل کورٹ میٹنگ بلانے کی درخواست کی ہے۔ اس کے لیے ججوں نے ایک خط لکھا ہے جو اب سوشل میڈیا پر وائرل ہو رہا ہے، حالانکہ اس خط کی کوئی سرکاری تصدیق ابھی تک نہیں ہوئی ہے۔ اس خط پر ججوں کے دستخط بھی موجود ہیں۔ الہ آباد ہائی کورٹ کے 13 ججوں نے جسٹس پرشانت کمار کے خلاف سپریم کورٹ کے حالیہ حکم کے اختیار سے متعلق فل کورٹ میٹنگ بلانے کا مطالبہ کیا ہے۔ الہ آباد ہائی کورٹ کے ان 13 معزز ججوں نے چیف جسٹس ارون بھنسالی کو اس سلسلے میں خط لکھا ہے۔

درحقیقت، 4 اگست کو جاری ایک سخت حکم میں سپریم کورٹ کے جسٹس جے بی پاردیوالا اور جسٹس آر مہادیون کی ڈویژن بنچ نے الہ آباد ہائی کورٹ کے چیف جسٹس سے کہا تھا کہ جسٹس پرشانت کمار کو ان کی ریٹائرمنٹ تک فوجداری مقدمات کی سماعت سے ہٹا دیا جائے اور انہیں ایک تجربہ کار سینئر جج کے ساتھ ڈویژن بنچ میں بٹھایا جائے۔

جسٹس پرشانت کمار کے خلاف یہ حکم اور سخت ریمارکس اس فیصلے کی بنیاد پر دیے گئے تھے جس میں انہوں نے کہا تھا کہ دیوانی تنازعات میں رقم کی وصولی کے لیے متبادل ذریعے کے طور پر فوجداری استغاثہ کا استعمال کیا جا سکتا ہے۔ اب الہ آباد ہائی کورٹ کے 13 ججوں نے اپنے دستخط شدہ خط میں جسٹس پرشانت کمار کی حمایت کی ہے اور چیف جسٹس سے فل کورٹ میٹنگ بلانے کا مطالبہ کیا ہے۔

وائرل ہونے والے خط میں کہا گیا ہے کہ 4 اگست 2025 کا متعلقہ حکم، نوٹس جاری کرنے کی ہدایت کے بغیر جاری کیا گیا تھا اور اس میں معزز جج کے خلاف سخت نتائج درج ہیں۔ ججوں نے تجویز پیش کی ہے کہ ہائی کورٹ کی فل کورٹ یہ قرارداد منظور کرے کہ جسٹس پرشانت کمار کو فوجداری مقدمات کی فہرست سے ہٹانے کے حکم پر عمل درآمد نہیں کیا جائے گا کیونکہ سپریم کورٹ کو ہائی کورٹ پر انتظامی نگرانی کا اختیار حاصل نہیں ہے۔ مزید کہا گیا ہے کہ فل کورٹ کو سپریم کورٹ کے اس حکم کے لہجے اور جذبے کے بارے میں اپنی تشویش درج کرانی چاہیے۔

قابل ذکر ہے کہ سپریم کورٹ کا یہ حکم "میزرز شِکھر کیمیکلز بنام ریاست اتر پردیش کے معاملے میں خصوصی اجازت درخواست (فوجداری) نمبر 11445/2025 کے سلسلے میں دیا گیا تھا۔ یہ معاملہ اس وقت شروع ہوا جب ایک مجسٹریٹ نے ایک شکایت کی بنیاد پر ملزم کو طلب کیا، جس میں تعزیرات ہند کی دفعہ 405 کے تحت امانت میں خیانت  کا الزام عائد کیا گیا تھا۔

ملزم نے الہ آباد ہائی کورٹ میں درخواست دائر کر کے اس سمن کو منسوخ کرنے کی استدعا کی تھی۔ ملزم کا مؤقف تھا کہ یہ ایک دیوانی تنازع ہے۔ 5 مئی 2025 کو ایک جج نے سپریم کورٹ کے فیصلوں کا حوالہ دیتے ہوئے درخواست کو خارج کر دیا۔ اس کے بعد خریدار نے آئین کے آرٹیکل 136 کے تحت سپریم کورٹ میں اپیل کی، جس کے نتیجے میں 4 اگست 2025 کا حکم سامنے آیا۔

سپریم کورٹ نے اپنے 4 اگست 2025 کے حکم میں الہ آباد ہائی کورٹ کے جسٹس پرشانت کمار پر سخت تبصرے کیے تھے۔ سپریم کورٹ نے کہا تھا کہ ایک ہائی کورٹ کو ماتحت عدالت کے ججوں کے خلاف تبصرہ کرتے وقت احتیاط برتنی چاہیے کیونکہ جج عدالت میں موجود نہیں ہوتے تاکہ اپنا دفاع کر سکیں۔

سپریم کورٹ نے 4 اگست 2025 کے حکم میں الہ آباد ہائی کورٹ کے 5 مئی 2025 کے حکم کو منسوخ کرتے ہوئے معاملہ دوبارہ سماعت کے لیے ایک دوسرے جج کے پاس بھیج دیا، جسے چیف جسٹس نامزد کریں گے۔ فی الحال اس خط کی حقیقت کیا ہے، یہ کوئی نہیں جانتا کیونکہ اس بارے میں کوئی تصدیق نہیں ہوئی ہے۔