نئی دہلی: راشٹریہ جنتا دل (آر جے ڈی) کے ارکانِ پارلیمنٹ نے جمعہ کے روز پارلیمنٹ احاطے میں احتجاج کیا اور مرکزی حکومت سے مطالبہ کیا کہ وہ بہار حکومت کی جانب سے 2023 میں بھیجی گئی اس تجویز کو منظور کرے جس میں 65 فیصد ریزرویشن کو آئین کی نویں شیڈول میں شامل کرنے کی درخواست کی گئی ہے۔

آر جے ڈی کے ارکان پارلیمنٹ پارلیمنٹ کے مکر دروازہ کے قریب جمع ہوئے اور ’’نویں شیڈول میں شامل کرنا ہوگا‘‘ کے نعرے لگائے۔ پارٹی کے راجیہ سبھا رکن سنجے یادو نے کہا، ’’جب تیجسوی یادو بہار حکومت کا حصہ تھے تو 65 فیصد ریزرویشن منظور کیا گیا تھا۔ بہار کابینہ نے ایک تجویز پاس کر کے مرکز کو بھیجی تھی کہ اسے آئین کی نویں شیڈول میں شامل کیا جائے۔‘

‘ انہوں نے کہا، ’’مرکزی حکومت اس تجویز پر خاموش بیٹھی ہے۔ یہ ظاہر کرتا ہے کہ یہ حکومت دلتوں، پسماندہ طبقات اور آدیواسیوں کے خلاف ہے۔ اگر وہ ان طبقات کے خلاف نہیں ہے تو پھر اس تجویز کو قبول کرنے میں کیا دقت ہے؟‘‘ سال 2023 میں بہار کابینہ نے مرکز سے درخواست کی تھی کہ ریاستی سرکاری ملازمتوں اور تعلیمی اداروں میں محروم طبقات کے لیے ریزرویشن کو 50 فیصد سے بڑھا کر 65 فیصد کرنے سے متعلق ترمیم شدہ دفعات کو آئین کی نویں شیڈول میں شامل کیا جائے۔

آئین کی نویں شیڈول میں مرکزی اور ریاستی قوانین کی ایک فہرست شامل ہوتی ہے جنہیں عدالت میں چیلنج نہیں کیا جا سکتا۔ 1992 میں سپریم کورٹ نے پسماندہ طبقات کے لیے ریزرویشن کی حد 50 فیصد مقرر کی تھی۔ بہار میں ذات پر مبنی سروے کے بعد اسمبلی نے ریزرویشن بڑھانے کے لیے دو بل منظور کیے تھے۔ ان بلوں میں درج فہرست ذاتوں (ایس سی) کے لیے ریزرویشن 16 فیصد سے بڑھا کر 20 فیصد، درج فہرست قبائل (ایس ٹی) کے لیے 1 فیصد سے بڑھا کر 2 فیصد، انتہائی پسماندہ طبقات (ای بی سی) کے لیے 18 فیصد سے بڑھا کر 25 فیصد اور دیگر پسماندہ طبقات (او بی سی) کے لیے 15 فیصد سے بڑھا کر 18 فیصد کرنے کی تجویز دی گئی تھی، جس کے بعد مجموعی ریزرویشن 50 فیصد سے بڑھ کر 65 فیصد ہو گیا۔