جلنا: مراٹھا ریزرویشن کے لیے منوج جارنگے کی تحریک ہفتے کے روز آٹھویں دن میں داخل ہوگئی۔ انہوں نے الزام عائد کیا کہ مہاراشٹر حکومت اپنے دیے گئے وعدے پورے کرنے میں ناکام رہی ہے۔ اس کے احتجاج میں انہوں نے پانی اور طبی علاج لینے سے انکار کرتے ہوئے اپنی تحریک مزید تیز کردی ہے۔ ہفتے کے آغاز میں ریاستی حکومت کے ایک وفد کی اپیل کے بعد جارنگے پانی پینے اور نس کے ذریعے سیال لینے پر رضامند ہوگئے تھے، لیکن اب انہوں نے اپنی رضامندی واپس لے لی ہے۔

انہوں نے یہاں انترولی ساراتی میں احتجاجی مقام پر ڈاکٹروں سے طبی معائنہ کرانے سے بھی انکار کردیا اور کہا کہ جب تک ان کے مطالبات عملی طور پر پورے نہیں ہوجاتے، وہ کوئی علاج نہیں کرائیں گے۔ جارنگے نے میڈیا سے کہا، ’’جب تک حکومت ہمارے تمام مطالبات کو زمینی سطح پر نافذ نہیں کرتی، تب تک میں نہ کچھ لوں گا اور نہ ہی کوئی علاج کراؤں گا۔‘‘ اس دوران ایک طبی ٹیم نے انہیں اپنا فیصلہ تبدیل کرنے پر آمادہ کرنے کی کوشش کی۔

انہوں نے الزام لگایا کہ مہایوتی حکومت نے انہیں یقین دہانی کرائی تھی کہ تقریباً 58 لاکھ مراٹھوں سے متعلق دستاویزات پر کام شروع کیا جائے گا، تاکہ برادری کو ملازمتوں اور تعلیمی اداروں میں ریزرویشن کا فائدہ مل سکے، لیکن اب تک اس سمت میں کوئی قدم نہیں اٹھایا گیا ہے۔ انہوں نے دعویٰ کیا کہ حیدرآباد گزٹ سے متعلق کارروائی بھی ابھی تک شروع نہیں کی گئی ہے۔

انہوں نے صحافیوں سے کہا کہ حکومت نے ریزرویشن کے معاملے سے متعلق معلومات گاؤں گاؤں تک عوامی اعلانات کے ذریعے پہنچانے کا وعدہ بھی کیا تھا، لیکن اسے بھی اب تک نافذ نہیں کیا گیا۔ حکومت کے ایک وفد نے اس سے قبل کہا تھا کہ ان کے مطالبات پر فیصلے سے ایک یا دو دن کے اندر انہیں آگاہ کردیا جائے گا۔ تاہم، جارنگے نے کہا ہے کہ مطالبات پورے ہونے تک وہ اپنی تحریک واپس نہیں لیں گے۔

انہوں نے یہ بھی دہرایا کہ اگر ان کے مطالبات پر توجہ نہیں دی گئی تو وہ 12 ستمبر کو ممبئی جانے کے اپنے فیصلے پر قائم رہیں گے۔ جارنگے کا مطالبہ ہے کہ 12 ستمبر تک اہل مراٹھوں کو کنبی سرٹیفکیٹ جاری کرنے کے لیے حکومت ایک حکومتی حکم نامہ (جی آر) جاری کرے۔ اس سے برادری کے افراد کو دیگر پسماندہ طبقات (او بی سی) کے تحت ریزرویشن کا فائدہ مل سکے گا۔