جموں: جموں میں بین الاقوامی سرحد پر ہفتہ کے روز سرحد پار سے منشیات کی اسمگلنگ کی ایک بڑی کوشش ناکام بناتے ہوئے 20 کروڑ روپے سے زائد مالیت کی چار کلوگرام سے زیادہ ہیروئن ضبط کی گئی۔ حکام نے یہ اطلاع دی۔ حکام کے مطابق سرحد پار سے ڈرون کے ذریعے سامان گرائے جانے کی اطلاع موصول ہوئی تھی، جس کے بعد سرحدی حفاظتی فورس (بی ایس ایف) اور پولیس نے آر ایس پورہ سیکٹر کے ایک سرحدی گاؤں میں مشترکہ کارروائی انجام دی۔

اس کارروائی کے دوران یہ کھیپ برآمد کی گئی۔ انہوں نے بتایا کہ آپریشن کے دوران ہیروئن سے بھرے دو پیکٹ ملے، جنہیں ضبط کر لیا گیا۔ پولیس نے اس سلسلے میں مقدمہ درج کر لیا ہے اور سرحد پار اسمگلنگ کے ریکیٹ میں ملوث افراد کی شناخت اور گرفتاری کے لیے مزید تحقیقات شروع کر دی ہیں۔ یہ برآمدگی ضلع کٹھوعہ کے سرحدی علاقوں میں ڈرون کے ذریعے پاکستان سے ہیروئن اسمگل کرنے کے الزام میں دو افراد کی گرفتاری کے ایک دن بعد عمل میں آئی ہے۔

پنجاب کے پٹھانکوٹ کے رہائشی جتین اور کٹھوعہ کے رہائشی دانش ڈوگرا عرف ساجن کو نگڑی کے قریب ڈرون کے ذریعے گرائی گئی 150 گرام ہیروئن کی برآمدگی کے معاملے میں گرفتار کیا گیا تھا۔ دونوں ملزمان وی او آئی پی (وائس اوور انٹرنیٹ پروٹوکول) کال کے ذریعے پاکستان میں مقیم ایک اسمگلر کے رابطے میں تھے۔