ریاسی/ آواز دی وائس
ریاسی کے ضلعی انتظامیہ نے ہفتہ کے روز 11ویں بین الاقوامی یومِ یوگا 2025 کے موقع پر دنیا کے سب سے اونچے ریلوے پل — مشہور چناب ریل پل — پر ایک خصوصی یوگا پروگرام کا انعقاد کیا۔ دنیا کے اس بلند ترین ریلوے پل پر منعقدہ اس پروگرام میں سول انتظامیہ، شمالی ریلوے، سی آر پی ایف کے افسران، مقامی رہائشیوں اور یوگا کے شوقین افراد نے شرکت کی۔ چناب وادی کے پرامن مناظر کے بیچ یہ یوگا پروگرام منعقد ہوا، جہاں شرکاء نے مختلف آسن کیے۔
۔9 جون کو وزیر اعظم نریندر مودی نے چناب ندی پر دنیا کے سب سے اونچے ریلوے آرچ پل کا افتتاح کیا تھا۔ یہ پل فنِ تعمیر کا ایک شاہکار ہے، جو دریا کی سطح سے 359 میٹر کی بلندی پر واقع ہے۔ یہ 1,315 میٹر لمبا اسٹیل آرچ پل ہے، جسے زلزلوں اور تیز ہوا کی صورت حال کا سامنا کرنے کے لیے ڈیزائن کیا گیا ہے۔
۔11ویں بین الاقوامی یومِ یوگا کے موقع پر ملک کی تمام ریاستوں میں بھرپور شرکت دیکھنے کو ملی۔ اس سال کا تھیم تھا: ایک زمین، ایک صحت کے لیے یوگا۔ یہ تھیم ہندوستان کے عالمی فلاح و بہبود کے نظریے کی عکاسی کرتا ہے اور ایک ہمہ گیر نقطۂ نظر کو فروغ دیتا ہے۔ یہ خیال "سروے سنتو نرامیا" (یعنی سبھی لوگ تندرست رہیں) کے ہندوستانی جذبے سے متاثر ہے اور انسان اور کرۂ ارض کی صحت کے درمیان باہمی تعلق پر زور دیتا ہے۔
اسی دوران، وزیر اعظم نریندر مودی نے 11ویں بین الاقوامی یومِ یوگا کی مرکزی تقریب میں شرکت کی، جہاں انہوں نے یوگا کو "عمر سے ماورا" ایک ایسا تحفہ قرار دیا جو تمام سرحدوں کو پار کر کے انسانیت کو "صحت اور ہم آہنگی" کے راستے پر متحد کرتا ہے۔
وزیر اعظم مودی نے بین الاقوامی برادری سے اپیل کی کہ "اندرونی سکون" کو "عالمی پالیسی" کے طور پر اپنایا جائے اور یوگا کو ایک اجتماعی عالمی ذمے داری بنایا جائے۔ وشاکھاپٹنم میں منعقدہ مرکزی یوگا تقریب میں خطاب کرتے ہوئے وزیر اعظم نے دنیا کے ممالک سے اپیل کی کہ یوگا کو صرف ایک انفرادی یا ثقافتی عمل نہ سمجھا جائے بلکہ اسے انسانیت کو جوڑنے والی طاقت کے طور پر اپنایا جائے۔
یہ تقریب وشاکھاپٹنم کے خوبصورت سمندر کنارے منعقد ہوئی، جہاں ہندوستانی بحریہ کے جہاز ساحل کے قریب تعینات تھے، جس سے اس جشن کی عظمت میں مزید اضافہ ہوا۔
وزیر اعظم مودی کے ساتھ آندھرا پردیش کے لاکھوں یوگا شوقین، مقامی باشندے اور معزز شخصیات موجود تھیں۔ وزیر اعظم نے اقوامِ متحدہ میں 21 جون کو بین الاقوامی یومِ یوگا کے طور پر تسلیم کرانے کے 2014 کے ہندوستانی اقدام پر بھی روشنی ڈالی اور بتایا کہ کس طرح ریکارڈ وقت میں 170 سے زائد ممالک نے اس تجویز کی حمایت کی۔ انہوں نے کہا کہ تب سے یوگا ایک عالمی تحریک بن چکی ہے، جو امن، توازن اور تعاون کی علامت ہے۔ اس سال کی تقریب میں ملک بھر کی ریاستوں سے لاکھوں افراد نے شرکت کی۔
