سرینگر: جموں و کشمیر کے پلوامہ ضلع میں پولیس نے ہفتہ کو تلاشی کے دوران ایک علیحدگی پسند تنظیم کے پوسٹر اور کچھ ممنوعہ لٹریچر سمیت دیگر مواد برآمد کیا۔

پولیس کے ایک ترجمان نے بتایا کہ یو اے پی اے (غیر قانونی سرگرمیاں روکنے) کے تحت ایک کیس میں این آئی اے عدالت پلوامہ کی طرف سے جاری تلاشی وارنٹ پر عمل کرتے ہوئے پولیس نے پلوامہ کے رہائشی محمد عامر راثیر کی دکان کی تلاشی لی۔

ترجمان کے مطابق، مکمل شفافیت اور درست طریقہ کار کو یقینی بنانے کے لیے تلاشی کی کارروائی مجسٹریٹ اور آزاد گواہوں کی موجودگی میں کی گئی۔ ترجمان نے بتایا کہ پولیس نے تلاشی کے دوران ملزم کے احاطے سے جیل میں بند شبیر شاہ کی سربراہی میں جموں و کشمیر ڈیموکریٹک فریڈم پارٹی (جے کے ڈی ایف پی) کے پوسٹر اور ممنوعہ لٹریچر والی کتابیں سمیت دیگر مواد برآمد کیا۔

انہوں نے کہا کہ برآمد شدہ مواد کو مزید تحقیقات کے لیے قبضے میں لے لیا گیا ہے۔ اس کے علاوہ، کیس کے مزید پہلوؤں کی کھوج اور برآمد شدہ مواد سے جڑے کسی اضافی تعلقات کی تصدیق کے لیے تحقیقات جاری ہیں۔