جموں: جموں و کشمیر کے لیفٹیننٹ گورنر منوج سنہا نے ہفتہ کے روز سرحد پار سے منشیات کی اسمگلنگ میں ملوث گروہوں کو ختم کرنے کے لیے قانون کی مکمل طاقت استعمال کرنے کا اعلان کیا۔ انہوں نے ملزمان کی جائیداد ضبط کرنے، ان کے آدھار کارڈ جیسے اہم دستاویزات منسوخ کرنے سمیت سخت تعزیری اقدامات کی وارننگ دی۔

جموں و کشمیر کو منشیات سے پاک بنانے کے لیے 100 روزہ مہم کے آغاز کے موقع پر لیفٹیننٹ گورنر نے ایم اے اسٹیڈیم سے پریڈ گراؤنڈ تک ایک پیدل مارچ کی قیادت کی۔ اس دوران انہوں نے کہا، “ہمارا پڑوسی ملک سرحد پار اسمگلنگ کے ذریعے ہماری سوسائٹی کو زہر آلود کرنے اور ہمارے ملک کے مستقبل کو کمزور کرنے کی کوشش کر رہا ہے۔”

انہوں نے کہا، “ہر افسر کی ایک ہی ذمہ داری ہے کہ یہ سب اب رکنا چاہیے۔ اب اسمگلروں کے خلاف قانون کی پوری طاقت استعمال کی جائے گی اور ان کے نیٹ ورک کو بغیر کسی تاخیر کے ختم کر دیا جائے گا۔” منوج سنہا نے منشیات کے اسمگلروں کے خلاف فیصلہ کن اور سخت کارروائی کا وعدہ کرتے ہوئے کہا کہ ایسے افراد کی جائیداد ضبط کی جائے گی، سرغنہ افراد کے خلاف مقدمات چلائے جائیں گے اور انہیں فوری سزا دی جائے گی۔

انہوں نے مزید کہا کہ منشیات کے اسمگلروں کے خلاف نئی معیاری آپریٹنگ طریقہ کار (SOP) نافذ کیا گیا ہے، جس کے تحت ملوث افراد کے پاسپورٹ، ڈرائیونگ لائسنس، آدھار نمبر اور اسلحہ لائسنس منسوخ کیے جا سکتے ہیں۔ انہوں نے یہ بھی کہا کہ اگر کوئی ملزم فرار ہو جائے تو اس کے خلاف فوری طور پر لک آؤٹ سرکلر جاری کیا جائے گا۔ لیفٹیننٹ گورنر نے کہا کہ نارکوٹک ڈرگز اینڈ سائیکوٹرپک سبسٹینسز ایکٹ کے تحت ملزمان کی منقولہ اور غیر منقولہ جائیداد ضبط کی جائے گی، بینک اکاؤنٹس منجمد کیے جائیں گے اور مالیاتی تحقیقات بھی شروع کی جائیں گی۔