بریلی جماعت اسلامی ہند کے ایک اعلیٰ سطحی وفد نے حال ہی میں بریلی کا دورہ کیا جہاں من مانی گرفتاریوں، مکانات کی مسماری اور کاروباری اداروں کو سیل کرنے کے حالیہ واقعات نے مقامی باشندوں کی زندگیوں پر گہرا اثر ڈالا ہے۔ وفد کی قیادت جماعت کے نائب صدر ملک معتصم خان نے کی۔ ان کے ساتھ قومی سیکرٹری آئی کریم اللہ، لائق احمد، اے پی سی آر کے قومی سیکرٹری ندیم خان، جماعت اتر پردیش مغربی زون کے صدر ضمیر الدین حسن اور دیگر سینئر اراکین بھی شامل تھے۔

وفد نے متاثرہ علاقوں کا دورہ کیا، متاثرین کے اہل خانہ اور زیر حراست بچوں کے لواحقین سے ملاقات کی۔ تحقیقات کے دوران یہ بات سامنے آئی کہ مسماری اور سیلنگ کے نوٹس بغیر کسی قانونی کارروائی کے جاری کیے گئے۔ کئی افراد کے پاس درست دستاویزات اور ڈیجیٹل شواہد موجود تھے جن سے یہ ثابت ہوتا تھا کہ وہ واقعے کے دن وہاں موجود نہیں تھے اور ان کا کسی بھی غیر قانونی سرگرمی سے کوئی تعلق نہیں تھا۔ اس کے باوجود انہیں پولیس کی من مانی کارروائیوں اور سیاسی دباؤ کا سامنا کرنا پڑا۔

وفد نے وکلاء سے تفصیلی مشاورت کی اور متاثرہ افراد کو انصاف دلانے کے لیے قانونی راستوں کا جائزہ لیا۔ اگرچہ وفد نے ضلع مجسٹریٹ اور پولیس سپرنٹنڈنٹ سے ملاقات کی کوشش کی مگر انتظامیہ کی جانب سے کوئی مثبت جواب نہیں دیا گیا۔

جماعت اسلامی ہند نے ایک بار پھر انصاف، آئینی اقدار اور پرامن شہری شرکت کے عزم کو دہراتے ہوئے مطالبہ کیا کہ سیاسی بنیادوں پر درج کی گئی ایف آئی آر فوری طور پر واپس لی جائیں، بغیر ٹھوس ثبوت کے گرفتار کیے گئے افراد کو رہا کیا جائے اور پولیس زیادتیوں کے خلاف منصفانہ عدالتی کارروائی کی جائے۔ نائب صدر ملک معتصم خان نے حکام سے اپیل کی کہ شہری حقوق کے تحفظ کو یقینی بنایا جائے اور متاثرہ خاندانوں کو فوری مدد فراہم کی جائے۔

اے پی سی آر کے قومی سیکرٹری ندیم خان نے بتایا کہ انتظامیہ نے 27 گھروں کے اہل خانہ کو نوٹس جاری کیے ہیں جبکہ 32 دکانوں کو سیل کر دیا گیا ہے۔ اے پی سی آر ان مقدمات کی عدالتوں میں پیروی کر رہی ہے اور امید ظاہر کی ہے کہ عدالتیں بے گناہ افراد کو جلد انصاف اور ریلیف فراہم کریں گی۔

جماعت اسلامی ہند نے عوام سے اپیل کی ہے کہ وہ اس مشکل گھڑی میں حوصلہ و اتحاد کا مظاہرہ کریں، آئینی اور قانونی دائرے میں رہ کر اپنے حقوق کے لیے جدوجہد جاری رکھیں۔ وفد کے اس دورے نے ایک بار پھر واضح کر دیا کہ جماعت کمزور اور متاثرہ طبقات کی آواز بن کر انصاف کے قیام کے لیے پرعزم ہے۔