جبل پور: جبل پور (مدھیہ پردیش) کے ردی چوکی علاقے کے انصار نگر میں جمعہ کی نماز کے دوران بھاری ہنگامہ ہو گیا تھا۔ یہاں کی مسجد میں امام کے انتخاب کو لے کر دو گروہ آمنے سامنے آ گئے، جس سے علاقے میں کشیدگی پھیل گئی۔ تنازعہ اتنا بڑھ گیا کہ صورتحال کو کنٹرول کرنے کے لیے انتظامیہ نے مسجد کے دروازے تالے لگا کر اسے سیل کر دیا۔

معلومات کے مطابق، باقاعدہ امام مولانا ریاض احمد کی طبیعت خراب ہونے کی وجہ سے مسجد کمیٹی نے نماز پڑھانے کے لیے دوسرے مولانا کو مدعو کیا تھا۔ اس پر دوسرے محلے کے لوگوں نے سخت اعتراض کیا اور انہیں وہابی قرار دیتے ہوئے نماز پڑھانے سے روک دیا۔

دیکھتے ہی دیکھتے تنازعہ شدت اختیار کر گیا اور بڑی تعداد میں لوگ جمع ہو گئے۔ اطلاع ملتے ہی تین تھانوں کی پولیس اور ایس ڈی ایم پنکج مشرا موقع پر پہنچے۔ پولیس نے غصہ اور اشتعال میں مبتلا بھیڑ کو سمجھانے کی کوشش کی، لیکن دونوں فریق اپنی بات پر اڑے رہے۔ بگڑتی ہوئی صورتحال اور سماجی حساسیت کو مدنظر رکھتے ہوئے انتظامیہ نے احتیاطاً مسجد کے تمام دروازے سیل کر دیے۔

ایس ڈی ایم پنکج مشرا نے بتایا کہ امن و امان قائم رکھنے کے لیے یہ قدم اٹھایا گیا ہے۔ فی الحال دونوں فریقوں کو تھانے طلب کیا گیا ہے اور آپسی اتفاق رائے کے بعد ہی مسجد دوبارہ کھولی جائے گی۔ علاقے میں پولیس تعینات ہے اور صورتحال کنٹرول میں ہے۔