نئی دہلی : نریندر مودی حکومت کی طرف سے پاکستان کے ساتھ دریائے سندھو و معاہدے(Indus Water Treaty) کو معطل رکھنے کے جرات مندانہ فیصلے کے بعد، جموں و کشمیر نے اپنی ہائیڈرو پاور پالیسی کو از سرِ نو ترتیب دینا شروع کر دیا ہے تاکہ عام منصوبوں کے ذریعے بجلی پیدا کرنے کی صلاحیت بڑھانے کے لیے نجی شعبے کی حوصلہ افزائی کی جا سکے۔جموں سے شائع ہونے والے اخبار "ڈیلی ایکسلسیئر" کی رپورٹ کے مطابق ایک بین الوزارتی کمیٹی نئی ہائیڈرو الیکٹرک پاور جنریشن پالیسی کے لیے سفارشات کو حتمی شکل دے رہی ہے اور امکان ہے کہ یہ رپورٹ جولائی کے آخر تک حکومت کو پیش کر دی جائے گی۔نئی پالیسی کے ذریعے چھوٹے اور بڑے دونوں قسم کے منصوبوں کے لیے پہلے سے جانچے گئے امکانات سے فائدہ اٹھاتے ہوئے نجی شعبے کی سرمایہ کاری میں اضافہ کیا جائے گا۔

منی کنٹرول" پورٹل کے مطابق مرکز کی کوشش ہے کہ جموں و کشمیر میں واقع ہائیڈرو پاور پلانٹس کو پہلی بار مکمل صلاحیت کے ساتھ چلایا جائے۔ اس اقدام سے یونین ٹیریٹری کی بجلی پیدا کرنے کی صلاحیت میں 30 فیصد تک اضافہ ہو سکتا ہے۔

 مودی حکومت کے پاکستان کے خلاف اس فیصلے کا جموں و کشمیر کو براہِ راست فائدہ ہوگا، کیونکہ انڈس واٹرز ٹریٹی(IWT) کے تحت بھارت کو ان دریاؤں — جہلم، چناب اور سندھو و — پر کوئی ذخیرہ اندوزی کے حقوق حاصل نہیں تھے جو اس خطے سے پاکستان میں داخل ہوتے ہیں۔ اس شق کی وجہ سے جموں و کشمیر کبھی بھی دریاؤں سے پوری توانائی حاصل نہیں کر سکا۔جموں و کشمیر کے موجودہ پاور پلانٹس اپنی ذخیرہ کرنے کی صلاحیت بڑھا سکتے ہیں اور فوری طور پر زیادہ بجلی پیدا کر سکتے ہیں۔چونکہ بھارت نے 1961 میں پاکستان کے ساتھ دستخط شدہIWT معاہدے کو معطل رکھنے کا اعلان کیا ہے، جموں و کشمیر ان دریاؤں پر بنے ہوئے ہائیڈرو الیکٹرک منصوبوں سے بجلی کی پیداوار بڑھا سکتا ہے۔

کمیٹی کی ذمہ داری ہے کہ ایسی سفارشات پیش کرے جو نجی شعبے کی سرمایہ کاری کے لیے سازگار ماحول پیدا کرنے میں مدد دیں اور متعلقہ محکموں کے ساتھ مل کر منصوبوں کی ترقی اور عمل درآمد کے لیے درکار قانونی منظوریوں اور کلیئرنس کے حصول میں تیزی لائیں۔معاملے سے واقف حکام نے ایک انگریزی اخبار کو بتایا کہ کمیٹی اپنا تفویض کردہ کام تقریباً مکمل کر چکی ہے اور جلد ہی جامع ہائیڈرو پاور پالیسی حکومت کے سامنے منظوری اور نوٹیفکیشن کے لیے پیش کی جائے گی۔انہوں نے مزید کہا کہ نئی پالیسی ہائیڈرو پاور منصوبوں کی ترقی کو فروغ دینے اور منصوبہ سازوں اور جموں و کشمیر ایجنسیوں کو درپیش چیلنجز سے نمٹنے کے لیے اسٹریٹجک فریم ورک فراہم کرے گی۔ اس جامع پالیسی کے ذریعے حکومت چھوٹے اور بڑے دونوں منصوبوں کے لیے پہلے سے جانچے گئے امکانات سے فائدہ اٹھاتے ہوئے نجی شعبے کی سرمایہ کاری کو راغب کرنے کا ہدف رکھتی ہے۔"

ذرائع نے مزید بتایا کہ پالیسی کے تحت ہائیڈرو الیکٹرک منصوبوں کو دو زمروں میں تقسیم کیا جائے گا -  چھوٹے ہائیڈرو الیکٹرک منصوبے (25 میگاواٹ تک) اور بڑے ہائیڈرو الیکٹرک منصوبے (25 میگاواٹ سے اوپر اور 100 میگاواٹ تک)۔" انہوں نے مزید کہا کہ "10 میگاواٹ تک کے منصوبوں کے لیے سائنس اینڈ ٹیکنالوجی ڈیپارٹمنٹ نوڈل ایجنسی ہوگی، جبکہ 25 میگاواٹ سے زائد کے منصوبوں کی نگرانی جموں و کشمیر پاور ڈیولپمنٹ ڈیپارٹمنٹ کرے گا۔" اس کے علاوہ، افسران کی کمیٹی نے تمام شراکت داروں سے مشاورت کے بعد چھوٹے اور بڑے ہائیڈرو الیکٹرک منصوبوں کی ترقی کے امکانات کا جائزہ لیا ہے۔پالیسی کے تحت ترقیاتی منصوبوں کے لیے درکار قانونی منظوریوں اور کلیئرنس کو تیز رفتاری سے یقینی بنانے کے لیے طریقہ کار واضح طور پر بیان کیا گیا ہے،" انہوں نے مزید کہا کہ "پہلے یہ پالیسی وزیر اعلیٰ کے سامنے پیش کی جائے گی جو پاور ڈیولپمنٹ ڈیپارٹمنٹ کے وزیر بھی ہیں، اس کے بعد حتمی منظوری کے لیے کابینہ میں رکھی جائے گی۔"

یہاں یہ ذکر کرنا مناسب ہوگا کہ وزیر اعلیٰ عمر عبداللہ نے مارچ میں قانون ساز اسمبلی میں بجٹ پیش کرتے ہوئے اعلان کیا تھا کہ جموں و کشمیر کی مکمل ہائیڈرو پاور صلاحیت کو کھولنے کے لیے ان کی حکومت ایک نئی ہائیڈرو پاور پالیسی متعارف کرائے گی تاکہ ترقی کو تیز کیا جا سکے، نجی سرمایہ کاری کو راغب کیا جا سکے اور پائیدار توانائی کی ترقی کو فروغ دیا جا سکے۔بھارت کے جموں و کشمیر میں چھ فعال ہائیڈرو پاور پلانٹس ہیں جن کی مجموعی صلاحیت 3,030 میگاواٹ (MW) ہے۔ تاہم، ان پلانٹس میں اس سے زیادہ صلاحیت موجود ہے لیکن دریاؤں پر پانی کے ذخیرے پر IWT کی عائد کردہ پابندیوں کی وجہ سے یہ پوری طرح استعمال نہیں ہو سکی۔کم ذخیرے کی گنجائش براہ راست ہائیڈرو پاور پیداوار پر اثر انداز ہوتی ہے کیونکہ اس سے ٹربائنز کے لیے دستیاب پانی کی مقدار کم ہو جاتی ہے، جس کے نتیجے میں بجلی کی پیداوار میں کمی واقع ہوتی ہے۔