تلنگانہ / آواز دی وائس

تلنگانہ ہائی کورٹ نے سرکاری اسکولوں اور ہاسٹلز میں بار بار پیش آنے والے فوڈ پوائزننگ کے واقعات پر تشویش کا اظہار کیا ہے۔ تلنگانہ ہائی کورٹ کے چیف جسٹس اپریش کمار سنگھ نے بدھ کے روز کہا کہ طلبہ کا اپنی پلیٹیں، برتن اور حتیٰ کہ بیت الخلا خود صاف کرنا کوئی شرم کی بات نہیں ہے۔ چیف جسٹس سنگھ نے یہ تبصرہ حیدرآباد کے کیتھنیڈی کے اخیل سری گرو تیجا کی جانب سے دائر کی گئی ایک عوامی مفاد کی عرضی  پر سماعت کے دوران کیا، جس میں سرکاری اداروں میں صفائی اور غذائی تحفظ پر تشویش ظاہر کی گئی تھی۔

جسٹس جی ایم محی الدین کی بینچ نے حکومت سے صفائی کے معیارات، کھانے کی تیاری اور کچن کی دیکھ بھال کے بارے میں تفصیلات طلب کیں۔ چیف جسٹس کمار نے اپنے اسکول کے دنوں کو یاد کرتے ہوئے کہا کہ اسکول کے زمانے میں ہم کھانا بانٹتے تھے، اپنی تھالی خود صاف کرتے تھے، فرش پونچھتے تھے اور حتیٰ کہ بیت الخلا بھی صاف کرتے تھے۔ ان میں سے کوئی بھی کام کرنے میں شرم نہیں ہے، بلکہ ایسے کام کرنے پر فخر محسوس کرنا چاہیے۔

چیف جسٹس نے کہا کہ اس طرح کے کام طلبہ کو محنت کی عظمت کے بارے میں سکھاتے ہیں، انہیں خود انحصار بننے میں مدد کرتے ہیں اور ان کے روزمرہ کے کاموں میں مدد کرنے والوں کے تئیں احترام کو فروغ دیتے ہیں۔ یعنی سرکاری اسکولوں اور ہاسٹلز میں بار بار فوڈ پوائزننگ کے واقعات پر تشویش کا اظہار کیا گیا ہے۔

عرضی گزار کے وکیل چککوڈو پربھاکر نے دلیل دی کہ عدالت کے پچھلے احکامات اور ہدایات کے باوجود فوڈ پوائزننگ کے واقعات لگاتار پیش آ رہے ہیں، جس سے طلبہ کی صحت خطرے میں ہے۔

ایڈیشنل ایڈووکیٹ جنرل محمد عمران خان نے اس کی مخالفت کرتے ہوئے کہا کہ یہ محض چھٹ پٹ واقعات ہیں اور حکومت نے ایسی صورتحال سے نمٹنے کے لیے بہتر ایس او پیز  نافذ کر رکھی ہیں۔ انہوں نے کہا کہ کسی بھی واقعے کی اطلاع ملتے ہی ذمہ دار ملازمین اور ٹھیکیداروں کے خلاف فوری کارروائی کی جاتی ہے۔

آنے والے مہینوں میں اصلاحی اقدامات دکھائی دینے کی امید ظاہر کرتے ہوئے، تلنگانہ ہائی کورٹ نے ریاستی حکومت کو ایک تفصیلی رپورٹ پیش کرنے کی ہدایت دی۔ عدالت نے کہا کہ رپورٹ میں فی طالب علم خوراک کی تقسیم، کھانے کی غذائی قدر اور مرکزی حکومت کے مقررہ معیارات پر کس طرح عمل ہو رہا ہے، اس کی تفصیلات شامل ہونی چاہئیں۔ چیف جسٹس کمار نے ایس او پیز کو نافذ کرنے کے ذمہ دار اہلکاروں کے بارے میں بھی معلومات طلب کیں۔ عدالت نے اگلی سماعت 19 ستمبر کے لیے مقرر کی ہے۔