شری ہری کوٹا: خلائی تحقیقاتی ادارہ (اسرو) اپنے آئندہ ایل وی ایم-3 ایم6 مشن کے تحت 24 دسمبر کو ’بلو برڈ بلاک-2‘ سیٹلائٹ کو مدار میں قائم کرے گا۔ یہ مشن امریکہ میں قائم کمپنی اے ایس ٹی اسپیس موبائل کے ساتھ ہونے والے تجارتی معاہدے کا حصہ ہے۔

اس تاریخی مشن کے تحت اگلی نسل کا مواصلاتی سیٹلائٹ تعینات کیا جائے گا، جسے دنیا بھر میں براہِ راست اسمارٹ فونز تک ہائی اسپیڈ سیلولر براڈبینڈ فراہم کرنے کے لیے ڈیزائن کیا گیا ہے۔ اے ایس ٹی اسپیس موبائل (اے ایس ٹی اینڈ سائنس، ایل ایل سی) پہلا اور واحد خلاء پر مبنی سیلولر براڈبینڈ نیٹ ورک تیار کر رہا ہے، جو براہِ راست اسمارٹ فون کے ذریعے قابلِ رسائی ہوگا اور تجارتی و سرکاری دونوں طرح کے استعمال کے لیے ڈیزائن کیا گیا ہے۔

کمپنی نے اپنی ویب سائٹ پر کہا، ہم اس مشن پر ہیں کہ آج تقریباً چھ ارب موبائل صارفین کو درپیش کنیکٹیویٹی کے مسئلے کو حل کریں اور اُن اربوں لوگوں تک براڈبینڈ سہولت پہنچائیں جو اب بھی انٹرنیٹ سے محروم ہیں۔ اے ایس ٹی اسپیس موبائل نے ستمبر 2024 میں پانچ سیٹلائٹس — بلو برڈ 1 سے 5 — لانچ کیے تھے، جو امریکہ اور چند دیگر منتخب ممالک میں مسلسل انٹرنیٹ کوریج کو ممکن بناتے ہیں۔

امریکہ میں قائم اس کمپنی نے اپنے نیٹ ورک سپورٹ کو مزید مضبوط بنانے کے لیے اسی نوعیت کے مزید سیٹلائٹس لانچ کرنے کا منصوبہ بنایا ہے، اور اس مقصد کے لیے دنیا بھر کے 50 سے زائد موبائل آپریٹرز کے ساتھ شراکت داری کی ہے۔

آنے والے مشن کے تحت، اے ایس ٹی اسپیس موبائل اپنے اگلی نسل کے مواصلاتی سیٹلائٹ بلو برڈ بلاک-2 کو لانچ کرنے کا ارادہ رکھتا ہے، جو 24 گھنٹے دنیا بھر میں براہِ راست اسمارٹ فونز تک ہائی اسپیڈ سیلولر براڈبینڈ فراہم کرنے کے لیے تیار کیا گیا ہے۔

اسرو کے مطابق، یہ مشن نیواسپیس انڈیا لمیٹڈ اور اے ایس ٹی اسپیس موبائل (اے ایس ٹی اینڈ سائنس، ایل ایل سی) کے درمیان طے پانے والے معاہدے کے تحت ایک مخصوص تجارتی لانچ ہوگا۔ نیواسپیس انڈیا لمیٹڈ، بنگلورو میں قائم اسرو کی تجارتی شاخ ہے۔ بلو برڈ بلاک-2 مشن عالمی لو ارتھ آربٹ (ایل ای او) میں موجود سیٹلائٹس کے ایک مجموعے کا حصہ ہے، جس کا مقصد سیٹلائٹ کے ذریعے براہِ راست موبائل کنیکٹیویٹی فراہم کرنا ہے۔