ممبئی/ آواز دی وائس

شاہ رخ خان اس وقت اپنی فلم کے ساتھ ساتھ بچوں کے کیریئر پر بھی توجہ دے رہے ہیں۔ جہاں ان کے بیٹے آریان خان جلد ہی ڈائریکشن میں ڈیبیو کرنے جا رہے ہیں، وہیں بیٹی سُہانا خان اپنی آنے والی فلم کنگ کے ذریعے تھیٹر میں ڈیبیو کرنے والی ہیں۔ لیکن اسی دوران کروڑوں کی ایک زمین کی ڈیل کو لے کر سُہانا خان کی مشکلات بڑھتی دکھائی دے رہی ہیں۔ کچھ وقت پہلے ہی شاہ رخ خان کی لاڈلی نے علی باغ میں زمین خریدی تھی، اب خبر سامنے آئی ہے کہ اس کروڑوں کی ڈیل کے لیے سُہانا خان نے اجازت نہیں لی تھی۔

دراصل، سُہانا نے علی باغ کے تھال گاؤں میں زمین خریدی تھی۔ بتایا گیا کہ تقریباً 12.91 کروڑ روپے میں یہ زمین لی گئی۔ اب اسی گاؤں سے یہ اطلاع سامنے آئی ہے کہ یہ زمین دراصل حکومت نے کسانوں کو کاشتکاری کے لیے دی تھی، جسے سُہانا خان نے بغیر اجازت خرید لیا۔ یعنی انہوں نے اجازت لیے بغیر ہی علی باغ میں زمین خریدی۔

مشکل کیوں بڑھ رہی ہے؟

سُہانا خان کی یہ ڈیل کافی چرچے میں رہی تھی۔ میڈیا رپورٹس کے مطابق سُہانا نے تین بہنوں انجلی، ریکھا اور پریا سے یہ زمین خریدی تھی، جو انہیں والدین سے وراثت میں ملی تھی۔ زمین خریدتے وقت سُہانا نے 77.46 لاکھ روپے کی اسٹامپ ڈیوٹی بھی ادا کی تھی۔ لیکن اب نئی جانکاری سے پتا چلا کہ وہ زمین کسانوں کو صرف کھیتی کے مقصد کے لیے دی گئی تھی اور سُہانا نے بغیر اجازت یہ سودا کیا۔ اس معاملے کی جانچ جاری ہے اور علی باغ کے تحصیلدار سے ایک غیرجانبدار رپورٹ طلب کی گئی ہے۔

اس کیس میں ریزیڈنٹ ڈپٹی کلیکٹر سندیش نے حکم جاری کیا ہے۔ ساتھ ہی سُہانا خان کی اس کروڑوں کی ڈیل کی رپورٹ بھی جلد سامنے آئے گی۔ جانچ کے دوران یہ بھی سامنے آیا ہے کہ زمین کے رجسٹرڈ دستاویزات میں سُہانا خان کو ’’کسان‘‘ بتایا گیا تھا۔ جس نام پر یہ پراپرٹی رجسٹر ہوئی، وہ ہے ڈیجا وو فارم پرائیویٹ لمیٹڈ۔ اس کمپنی کی ڈائریکٹر اور کوئی نہیں بلکہ گوری خان کی ماں اور بھابھی ہیں۔

یہ علی باغ میں سُہانا کی پہلی پراپرٹی تھی، جس کے بعد انہوں نے ایک اور انویسٹمنٹ کیا۔ اداکارہ نے ایک سال کے اندر دوسری بار علی باغ کے بیچ فرنٹ  پر 10 کروڑ روپے کی پراپرٹی بھی خریدی۔