اندور: مدھیہ پردیش کے اندور شہر میں میونسپل کارپوریشن نے مسلم اکثریتی علاقوں میں لگائے گئے نئے سڑکوں کے ناموں والے سائن بورڈز ہٹا دیے ہیں۔ الزام ہے کہ یہ سائن بورڈ متنازعہ ہیں کیونکہ ان راستوں کے نام غیر قانونی طور پر تبدیل کیے گئے تھے۔

بھارتیہ جنتا پارٹی (بی جے پی) کے رہنما اور وزیر کیلاش وجے ورگیہ کے بیٹے، آکاش وجے ورگیہ نے اس پر اعتراض ظاہر کیا تھا اور کہا تھا کہ سڑکوں کے نام ایک "مخصوص مذہب" سے جڑے ہوئے ہیں۔ دراصل، آکاش وجے ورگیہ نے میونسپل کمشنر شِوَم ورما کو ایک خط لکھا، جس میں دعویٰ کیا کہ چندن نگر کی کچھ سڑکوں پر مخصوص مذہب سے جڑے سائن بورڈ نظر آ رہے ہیں، جو بغیر انتظامیہ کی اجازت کے غیر قانونی طور پر لگائے گئے ہیں۔

بی جے پی رہنما آکاش وجے ورگیہ نے میونسپل کمشنر کو خبردار کیا کہ اگر یہ سائن بورڈ فوری طور پر نہ ہٹائے گئے تو سخت احتجاج ہوگا۔ جب معاملہ طول پکڑنے لگا تو اندور کے میئر، پُشیمتر بھارگو نے جمعرات، 21 اگست کو کہا کہ متعلقہ وارڈ کونسلر کے خلاف قانونی کارروائی کی جائے گی۔ وہیں، متعلقہ وارڈ کونسلر کے شوہر، رفیق خان نے تمام الزامات کو بے بنیاد قرار دیا۔

ان کا کہنا تھا کہ ان کی اہلیہ نے مسلم اکثریتی علاقوں میں سڑکوں کے نام تبدیل کرنے کی کوئی اجازت نہیں دی۔ انہوں نے دعویٰ کیا کہ دو سال قبل میونسپل کارپوریشن سے درخواست کی گئی تھی کہ سڑکوں کے ناموں والے سائن بورڈز لگائے جائیں تاکہ عوام کو مقامات تلاش کرنے میں آسانی ہو۔ اس کے بعد، خود میونسپل کارپوریشن نے تقریباً 40 سال سے معروف ناموں کی بنیاد پر سائن بورڈ تیار کر کے لگائے تھے۔

چندن نگر سے جن بورڈز کو ہٹایا گیا، ان میں ایک ہی سڑک کے دو نام درج تھے۔ مثلاً، ایک بورڈ پر سکینہ منزل روڈ کے ساتھ چندن نگر سیکٹر-بی، وارڈ نمبر 2 بھی لکھا تھا۔ اسی طرح رضا گیٹ کے ساتھ لوہا گیٹ روڈ بھی درج تھا۔ مقامی لوگوں کا کہنا ہے کہ یہ بورڈ عام لوگوں کی رہنمائی کے لیے لگائے گئے تھے۔ یہ راستے دونوں ناموں سے جانے جاتے ہیں۔ اگر ایک نام ہٹا دیا گیا تو لوگوں کو مقام تلاش کرنے میں دقت ہوگی۔