مرادآباد: چیف الیکشن کمشنر گیانیش کمار نے جمعرات کو دعویٰ کیا کہ ہندوستان کا انتخابی نظام دنیا کے سب سے مؤثر، شفاف اور قابلِ اعتماد انتخابی نظاموں میں شمار ہوتا ہے۔ پاکبڑا میں واقع تیرتھنکر مہاویر یونیورسٹی (ٹی ایم یو) میں ایک تقریب کے بعد صحافیوں سے گفتگو کرتے ہوئے انہوں نے کہا کہ آزادانہ اور منصفانہ انتخابات اور غلطیوں سے پاک ووٹر فہرست ہی مضبوط جمہوریت کی بنیاد ہیں، اور اس مقصد کے لیے بوتھ سطحی افسران (بی ایل او) کا کردار نہایت اہم ہے۔

گیانیش کمار نے کہا کہ 2026 میں ہندوستان دنیا کی معروف تنظیم انٹرنیشنل انسٹی ٹیوٹ فار ڈیموکریسی اینڈ الیکٹورل اسسٹنس کی صدارت کر رہا ہے، جو ملک کے جمہوری نظام پر عالمی اعتماد کا ثبوت ہے۔ انہوں نے کہا کہ آئندہ وہ جہاں بھی انتظامی دورے پر جائیں گے، وہاں بی ایل اوز سے براہِ راست بات چیت کریں گے تاکہ ووٹر فہرست کو مزید درست، شفاف اور غلطیوں سے پاک بنایا جا سکے۔

چیف الیکشن کمشنر کے مطابق انتخابی عمل کے تینوں اہم مراحل، یعنی ووٹر فہرست کی تیاری، ووٹنگ اور ووٹوں کی گنتی مکمل شفافیت کے ساتھ انجام دیے جاتے ہیں۔ انہوں نے کہا کہ مختلف سیاسی جماعتیں اور انتخاب لڑنے والے امیدوار ان تمام مراحل کی مسلسل نگرانی کرتے ہیں، یہی وجہ ہے کہ ہندوستان کا انتخابی نظام اپنی غیر جانبداری، شفافیت اور قابلِ اعتماد ہونے کی وجہ سے دنیا بھر میں پہچانا جاتا ہے۔ ٹی ایم یو پہنچنے پر چیف الیکشن کمشنر کو گارڈ آف آنر پیش کیا گیا۔ بعد ازاں انہوں نے بی ایل اوز اور مبصرین سے ملاقات کر کے ووٹر فہرست کی تطہیر، انتخابی عمل کی شفافیت اور آزادانہ انتخابات سے متعلق ضروری ہدایات دیں۔