پونے:گورنر عارف محمد خان نے کہا کہ دنیا کی کئی قدیم تہذیبیں ختم ہو گئیں لیکن ہندوستانی تہذیب مسلسل اور غیر منقطع رہی ہے۔ اس کی وجہ یہ ہے کہ ہندوستانی تہذیب کی بنیاد مادیت نہیں بلکہ علم ہے۔ اس کا یہ مطلب نہیں کہ سائنس یا مادی ترقی کو نظرانداز کیا جائے۔ بلکہ جتنا زیادہ علم پھیلے گا اتنا ہی ملک ترقی کرے گا۔ ہندوستانی علمی روایت کا مرکزی نکتہ وحدت ہے۔
وہ فرگوسن کالج ایمفی تھیٹر میں نیشنل بک ٹرسٹ کی جانب سے منعقدہ پونے لِٹ فیسٹ کے افتتاحی اجلاس سے خطاب کر رہے تھے۔ اس موقع پر نیشنل بک ٹرسٹ کے چیئرمین پروفیسر ملند مراٹھے۔ ڈائریکٹر یووراج ملک۔ فیسٹول کوآرڈینیٹر راجیش پانڈے۔ اور لوکمانیہ ملٹی پرپز کوآپ سوسائٹی کے چیئرمین کرن ٹھاکر موجود تھے۔اپنے خطاب میں گورنر خان نے ہندوستانی تہذیب۔ ادب اور عالمی امن پر گہرے خیالات پیش کیے۔
عالمی تشدد پر تبصرہ کرتے ہوئے انہوں نے کہا کہ دنیا میں ہونے والی جنگوں اور تشدد کے ہم خود ذمہ دار ہیں۔ دنیا کی دیگر تمام تہذیبیں نسل۔ مذہب یا زبان سے پہچانی جاتی ہیں۔ ہندوستانی تہذیب واحد تہذیب ہے جس کی بنیاد آتما یعنی روح پر ہے۔ سوامی وویکانند ہمیں مسلسل یاد دلاتے تھے کہ ہندوستان کے پاس دنیا کو دینے کے لیے ایک پیغام ہے۔ ہماری تہذیب ادویت کی تعلیم دیتی ہے۔ یعنی جس شخص کو تم مار رہے ہو وہ دراصل تم خود ہو۔ اگر ہم یہ پیغام دنیا تک پہنچانے میں کامیاب ہو جاتے تو آج دنیا کی حالت بالکل مختلف ہوتی۔ لیکن ہم اس میں ناکام رہے۔
ادب کی اہمیت کو اجاگر کرتے ہوئے انہوں نے سنتوں کے اقوال کا حوالہ دیا۔ انہوں نے کہا کہ فن اور ادب ہمیں برہما گیان یعنی الوہی علم کے قریب لے جاتے ہیں۔ ہماری روایت میں ادب سے لطف اندوز ہونا اور اہل دانش کی صحبت میں رہنا امرت کے تجربے کے برابر سمجھا جاتا ہے۔
کتابوں سے اپنی ذاتی وابستگی کا ذکر کرتے ہوئے انہوں نے بتایا کہ کتابیں ان کی پہلی محبت ہیں۔ بچپن سے ہی انہیں کتابوں کا شوق تھا۔ وہ مسلسل کتابیں پڑھنے پر اپنی دادی سے ڈانٹ اور مار بھی کھاتے تھے۔ لیکن کتابوں نے علم حاصل کرنے کو آسان بنا دیا۔
علم کی ترسیل پر بات کرتے ہوئے انہوں نے کہا کہ ایک زمانہ تھا جب دنیا میں لکھنے کی مخالفت کی جاتی تھی۔ لیکن ہندوستان میں ہمیشہ علم کی روایت رہی ہے۔ آج کمپیوٹر جیسی ٹیکنالوجی سے ڈرنے کی کوئی وجہ نہیں۔ بلکہ یہ علم کو پھیلانے میں مددگار ہیں۔ جتنا زیادہ علم پھیلے گا اتنی ہی قوم ترقی کرے گی۔
ہندوستانی علم کے عالمی اثرات کا ذکر کرتے ہوئے گورنر خان نے کہا کہ عربوں نے سب سے پہلے ہندوستانی ادب کے تراجم کیے۔ یورپ میں خلائی علوم کی بنیاد سوریا سدھانت پر ہے۔ یہ متن عربی تراجم کے ذریعے یورپ تک پہنچا۔ عربی زبان میں لفظ ہند کا مطلب خوبصورت ہے اور اس خوبصورتی سے مراد علم ہے۔ یونیسکو نے رِگ وید کو قدیم ترین متن تسلیم کیا ہے اور اس سے بڑھ کر ہندوستان کی قدیم تہذیب کا کوئی ثبوت نہیں۔ تاہم یہ تشویش کی بات ہے کہ ہمارا اپنا علم ہماری ترقی کی بنیاد نہیں بن پا رہا ہے۔
پونے شہر کی تعریف کرتے ہوئے گورنر نے کہا کہ پونے ثقافتی اور ادبی شعور کا ایک اہم مرکز ہے۔ چھترپتی شیواجی مہاراج۔ لوکمانیہ تلک اور ان کی گیتا رہسیہ۔ گوپال کرشن گوکھلے اور مہاتما پھولے کی یادیں اس شہر کی وجہ سے محفوظ رہیں۔
تقریب کے دوران پروفیسر ملند مراٹھے نے مطالعے کی ثقافت کی اہمیت پر زور دیا۔ جبکہ راجیش پانڈے نے نوجوانوں میں بڑھتی ہوئی مطالعے کی دلچسپی کی تعریف کی۔
