ہندوستانی فوج کو 5 سال تک جاری رہنے والی جنگ کے لیے تیار رہنا چاہیے: راج ناتھ سنگھ
نئی دہلی/ آواز دی وائس
وزیرِ دفاع راج ناتھ سنگھ نے بدھ کے روز کہا کہ غیر متوقع جیو-سیاسی حالات کو دیکھتے ہوئے ملک کی مسلح افواج کو قلیل مدتی جھڑپوں سے لے کر پانچ سال تک جاری رہنے والی جنگ سمیت ہر طرح کے سلامتی چیلنجز کے لیے تیار رہنا چاہیے۔
مدھیہ پردیش کے مہو فوجی چھاؤنی کے آرمی وار کالج میں تینوں افواج کی مشترکہ کانفرنس "رن سنواد 2025" کے دوسرے اور آخری دن مکمل اجلاس سے خطاب کرتے ہوئے سنگھ نے کہا کہ ہندوستان کسی کی زمین نہیں چاہتا، لیکن اپنی علاقائی سالمیت کے تحفظ کے لیے کسی بھی حد تک جانے کو تیار ہے۔
راج ناتھ سنگھ نے کہا کہ آج کے دور میں جنگیں اتنی اچانک اور غیر متوقع ہو گئی ہیں کہ یہ اندازہ لگانا بہت مشکل ہے کہ کوئی جنگ کب ختم ہوگی اور کتنے وقت تک چلے گی۔ انہوں نے کہا کہ ہندوستانی مسلح افواج کو ہر صورتحال کے لیے تیار رہنا چاہیے۔
وزیرِ دفاع نے کہا کہ اس کا مطلب یہ ہے کہ اگر کوئی جنگ دو ماہ، چار ماہ، ایک سال، دو سال، یا حتیٰ کہ پانچ سال تک بھی چلتی ہے تو ہمیں اس کے لیے پوری طرح تیار رہنا ہوگا۔ سنگھ نے زور دے کر کہا کہ قومی سلامتی اب صرف فوج کا معاملہ نہیں رہا، بلکہ یہ پورے ملک کے نقطۂ نظر کا مسئلہ بن چکا ہے۔ انہوں نے کہا کہ ہمیں کسی کی زمین نہیں چاہیے، لیکن ہم اپنی زمین کی حفاظت کے لیے کسی بھی حد تک جانے کو تیار ہیں۔
وزیرِ دفاع نے یہ بات چیف آف ڈیفنس اسٹاف (سی ڈی ایس) جنرل انل چوہان، ائیر چیف مارشل اے پی سنگھ اور بحریہ کے سربراہ ایڈمرل دنیش کے تریپاٹھی سمیت ہندوستان کے اعلیٰ فوجی افسران کی موجودگی میں کہی۔ انہوں نے "آپریشن سندور" کے لیے تینوں افواج کی تعریف کی اور کہا کہ یہ آپریشن ہندوستان کے دیسی پلیٹ فارمز، آلات اور اسلحہ جاتی نظاموں کی کامیابی کی ایک بہترین مثال بن کر سامنے آیا ہے۔
راج ناتھ سنگھ نے کہا کہ اس مہم کی کامیابی نے ایک بار پھر اس حقیقت کو اجاگر کیا ہے کہ آنے والے وقت میں خود انحصاری ایک لازمی ضرورت ہے۔ ہم نے خود انحصاری کے راستے پر اہم پیش رفت کی ہے، لیکن اب بھی ہمیں ایک لمبا سفر طے کرنا ہے۔
وزیرِ دفاع نے کہا کہ "آپریشن سیندور" کی کامیابی اس بہادری اور تیز رفتاری کی ’’بہترین مثال‘‘ ہے جس کے ساتھ ہندوستانی مسلح افواج نے پاکستان میں دہشت گردوں کے خلاف کارروائی کی۔ انہوں نے کہا کہ یہ مہم ایسی تھی جس کا ان دہشت گردوں نے کبھی تصور بھی نہیں کیا ہوگا۔
سنگھ نے کہا کہ اگر ہم آپریشن سیندور کی بات کریں تو یہ دراصل ٹیکنالوجی سے چلنے والی جنگ کا ایک شاندار مظاہرہ تھا۔ ’’جنگی فن پر ٹیکنالوجی کے اثرات‘‘ کے موضوع پر یہ دو روزہ کانفرنس "آپریشن سیندور" کے بعد منعقد کی گئی۔ تاہم فوجی افسران نے یہ واضح کیا ہے کہ اس پروگرام کی منصوبہ بندی ’’آپریشن سیندور‘‘ شروع ہونے سے کافی پہلے کر لی گئی تھی۔
رن سنواد 2025" میں تینوں افواج کے افسران نے دفاعی شعبے کے موجودہ اور آئندہ چیلنجز اور ان سے نمٹنے کے طریقوں پر تبادلۂ خیال کیا۔ اس دوران کچھ مشترکہ اصول بھی جاری کیے گئے۔
