نئی دہلی: کانگریس کے صدر ملکارجن کھڑگے نے منگل کے روز بھارت–امریکا تجارتی معاہدے پر مودی حکومت کو شدید تنقید کا نشانہ بنایا۔ کھڑگے نے اس معاہدے کو بھارت کے اسٹریٹجک قومی مفادات کی قربانی قرار دیتے ہوئے اسے اعتماد شکنی اور شفافیت کے پردے میں لپٹی ہوئی شکست کہا۔

ان کا کہنا تھا کہ معاہدے کی باریک شرائط سے واضح ہو گیا ہے کہ وزیراعظم مودی نے بھارت کے قومی مفادات کو گروی رکھ دیا ہے۔ کھڑگے نے سوشل میڈیا پلیٹ فارم ایکس (سابقہ ٹوئٹر) پر پوسٹ کرتے ہوئے کہا کہ بھارت–امریکا تجارتی معاہدے کی اصل حقیقت اب آہستہ آہستہ سامنے آ رہی ہے اور یہ معاہدہ بھارت کے قومی مفادات کے خلاف ہے۔

انہوں نے دعویٰ کیا کہ اس معاہدے کے تحت بھارت کو روسی تیل پر پابندی لگانے کے لیے مجبور کیا گیا ہے، جو ملک کی اسٹریٹجک خودمختاری پر حملہ ہے۔ ان کا کہنا تھا کہ ہمیں بتایا گیا تھا کہ بھارت–امریکا مشترکہ بیان میں روسی تیل سے متعلق کوئی بات نہیں کی گئی، لیکن وائٹ ہاؤس کی فیکٹ شیٹ میں صاف لکھا ہے کہ بھارت کو روسی تیل کی خریداری بند کرنا ہوگی۔

کھڑگے نے سوال اٹھاتے ہوئے کہا، ’’کیا یہ کامیابی ہے یا پی آر میں لپٹا ہوا ایک ایسا دھوکہ ہے جو بھارت کے اسٹریٹجک قومی مفادات اور برآمدی انجن کی قربانی دے دیتا ہے؟‘‘ کھڑگے نے الزام لگایا کہ مودی حکومت نے پہلی بار بھارت کے زرعی شعبے کو مکمل طور پر غیر ملکی مصنوعات کے لیے کھول دیا ہے۔

انہوں نے کہا کہ اب ہمیں سمجھ آ رہا ہے کہ بھارت–امریکا مشترکہ بیان میں ’اضافی مصنوعات‘ سے کیا مراد تھی۔ ان کے مطابق ’دالیں‘ اچانک وائٹ ہاؤس کی فیکٹ شیٹ میں شامل کی گئیں، جبکہ یہ بھارت–امریکا مشترکہ بیان میں موجود نہیں تھیں۔

انہوں نے بھارتی ڈیری کسانوں کا حوالہ دیتے ہوئے کہا کہ اس تجارتی معاہدے میں امریکی مویشیوں کے چارے کی درآمد کی اجازت دی گئی ہے، جو جینیاتی طور پر ترمیم شدہ (جی ایم) ہوتا ہے، اور اس سے بھارت کے مویشیوں کی نسل اور دودھ کے معیار پر منفی اثر پڑے گا۔ کھڑگے نے کہا کہ امریکی جی ایم مویشی چارے کی درآمد سے بھارت کے مویشی متاثر ہوں گے اور اس فیصلے سے دو کروڑ ڈیری کسانوں کو نقصان پہنچے گا۔

انہوں نے الزام عائد کیا کہ آر ایس ایس اور بی جے پی گائے کے نام پر تشدد کرنے والوں کو شہ دے رہے ہیں، جبکہ اس فیصلے سے ملک کی مویشی نسل کو نقصان پہنچے گا۔ کانگریس صدر نے کہا کہ اس معاہدے سے ٹیکسٹائل صنعت کو بھی بھاری نقصان ہو سکتا ہے۔ ان کا کہنا تھا کہ 18 فیصد ٹیرف کو کوئی ’تاریخی کامیابی‘ نہیں کہا جا سکتا۔

امریکا–بنگلہ دیش معاہدے نے اس صورتحال کو ایک اسٹریٹجک خودسپردگی میں بدل دیا ہے۔ انہوں نے کہا کہ اس معاہدے کے تحت بنگلہ دیش کو امریکی کپاس کے استعمال پر زیرو ڈیوٹی کی سہولت دی گئی ہے، جبکہ بھارتی ٹیکسٹائل صنعت کو 18 فیصد ٹیرف کا سامنا کرنا پڑ رہا ہے۔