نئی دہلی: ہندوستان کی وزارتِ خارجہ نے جمعرات کو امریکی صدر ڈونلڈ ٹرمپ کے ان دعووں پر ردعمل دیا ہے جن میں انہوں نے کہا تھا کہ ہندوستان جلد ہی روس سے تیل کی خریداری بند کر سکتا ہے۔ وزارتِ خارجہ کے ترجمان رندھیر جیسوال کی جانب سے جاری بیان میں کہا گیا ہے کہ ہندوستان تیل اور گیس کا ایک اہم درآمد کنندہ ہے۔
غیر مستحکم توانائی کے منظرنامے میں ہندوستانی صارفین کے مفادات کا تحفظ ہماری مستقل ترجیح رہی ہے۔ ہماری درآمدی پالیسیاں مکمل طور پر اسی مقصد کے تحت ترتیب دی جاتی ہیں۔ توانائی کی قیمتوں کا استحکام اور سپلائی کا تحفظ ہماری توانائی پالیسی کے دو بنیادی ستون ہیں۔ اس میں ہماری توانائی کی سپلائی کے ذرائع کو وسیع بنانا اور مارکیٹ کی صورتحال کے مطابق تنوع لانا شامل ہے۔
بیان میں مزید کہا گیا کہ "جہاں تک امریکہ کا تعلق ہے، ہم کئی برسوں سے اپنی توانائی کی خریداری کو وسعت دینے کی کوشش کر رہے ہیں، اور گزشتہ دہائی میں اس میں مسلسل پیش رفت ہوئی ہے۔ موجودہ امریکی انتظامیہ نے ہندوستان کے ساتھ توانائی کے شعبے میں تعاون کو مزید گہرا کرنے میں دلچسپی ظاہر کی ہے، اور اس حوالے سے بات چیت جاری ہے۔
امریکی صدر ڈونلڈ ٹرمپ نے وائٹ ہاؤس کے اوول آفس میں صحافیوں کے سوالات کے جوابات دیتے ہوئے کہا کہ ہندوستان کے وزیرِ اعظم نریندر مودی ان کے اچھے دوست ہیں اور دونوں کے درمیان شاندار تعلقات ہیں۔ انہوں نے مزید کہا کہ ہندوستان جلد ہی روس سے تیل کی خرید بند کر دے گا۔
انہوں نے یہ بھی دعویٰ کیا کہ انہیں یہ یقین دہانی خود وزیرِ اعظم مودی نے ذاتی طور پر کرائی ہے۔ ٹرمپ نے کہا کہ ہندوستان کا یہ قدم ایک "بڑا قدم" ہوگا۔ اب ہمیں چین سے بھی یہی کرنے کے لیے کہنا ہوگا۔ اس موقع پر ٹرمپ نے ہندوستان میں نئے امریکی سفیر سرجیو گور اور وزیرِ اعظم مودی کی حالیہ ملاقات پر بھی تبصرہ کیا۔ انہوں نے کہا کہ "مجھے لگتا ہے کہ وہ (مودی) ایک شاندار اور عظیم شخصیت ہیں۔
سرجیو نے مجھے بتایا کہ مودی مجھے پسند کرتے ہیں۔ میں برسوں سے ہندوستان کو دیکھ رہا ہوں۔ پہلے ہر سال نیا لیڈر آتا، کچھ مہینوں یا چند برسوں کے لیے۔ لیکن اب میرا دوست (مودی) کافی عرصے سے اقتدار میں ہے، اور انہوں نے مجھے یقین دلایا ہے کہ وہ روس سے تیل نہیں خریدیں گے۔" مزید بات کرتے ہوئے ٹرمپ نے کہا کہ یہ تبدیلیاں فوری طور پر نافذ نہیں ہوں گی، لیکن کچھ وقت میں ان کے اثرات ضرور دکھائی دیں گے۔
