نئی دہلی: وزیر اعظم نریندر مودی نے ہفتے کے روز 2025 ورلڈ پیرا ایتھلیٹکس چیمپئن شپ کے آغاز پر کہا کہ ہندوستان کو دہلی میں اس عالمی مقابلے کی میزبانی پر فخر ہے۔ وزیر اعظم نے سماجی پلیٹ فارم ایکس پر اپنے پیغام میں لکھا: "تمام کھلاڑیوں کو دلی خیر مقدم اور نیک تمنائیں۔

یہ ٹورنامنٹ انسانی عزم اور حوصلے کا جشن ہے۔ یہ دنیا بھر میں ایک زیادہ جامع اور پرجوش کھیلوں کی ثقافت کو تحریک دے۔" دنیا کے بہترین پیرا ایتھلیٹس میں سے کئی کھلاڑی دہلی کے جواہر لعل نہرو اسٹیڈیم میں منعقد ہونے والی اب تک کی سب سے بڑی ورلڈ پیرا ایتھلیٹکس چیمپئن شپ کے دوران اپنے عزم اور برداشت کا عملی مظاہرہ کریں گے۔ یہ مقابلے 5 اکتوبر تک جاری رہیں گے۔

ورلڈ پیرا ایتھلیٹکس چیمپئن شپ دنیا کے سب سے بڑے پیرا کھیلوں کے مقابلے ہیں، جن میں جسمانی معذوری کے شکار کھلاڑی مختلف ٹریک اینڈ فیلڈ ایونٹس میں حصہ لیتے ہیں۔ یہ چیمپئن شپ ہر دو سال بعد منعقد ہوتی ہے اور اسے "پیرا اولمپکس" کے بعد سب سے بڑا عالمی پلیٹ فارم مانا جاتا ہے۔ ہندوستان کے لیے یہ ایک تاریخی لمحہ ہے کیونکہ یہ پہلا موقع ہے کہ ملک اس عالمی سطح کے ایونٹ کی میزبانی کر رہا ہے۔

اس سے نہ صرف پیرا کھلاڑیوں کے لیے حوصلہ افزائی کا ماحول پیدا ہوگا بلکہ ہندوستان کو عالمی کھیلوں کے نقشے پر مزید نمایاں مقام ملے گا۔ یہ ایونٹ ہندوستان کے اس عزم کی بھی علامت ہے کہ وہ ایک جامع (Inclusive) کھیل کلچر کو فروغ دینا چاہتا ہے، جہاں معذوری کو رکاوٹ نہیں بلکہ طاقت کے اظہار کے طور پر دیکھا جاتا ہے۔