نئی دہلی: بھارتیہ جنتا پارٹی (بی جے پی) کے سینئر رہنما مرلی منوہر جوشی نے پیر کے روز سنسکرت کے وسیع فروغ اور یہاں تک کہ “کوانٹم کمپیوٹنگ” میں اس کے استعمال کی وکالت کرتے ہوئے کہا کہ بھارت اب “وشوگرو” (عالمی استاد) نہیں رہا اور اس اصطلاح کا استعمال نہیں کرنا چاہیے۔
انہوں نے یہاں ایک پروگرام کے دوران صحافیوں سے بات کرتے ہوئے سنسکرت کو بھارت کی راج بھاشا بنانے کی بھی بھرپور وکالت کی اور کہا کہ بھیمراؤ امبیڈکر سمیت کئی افراد نے ماضی میں اس کے لیے کوششیں کی تھیں، لیکن ان تجاویز کو منظوری نہیں مل سکی۔
وہ راشٹریہ سویم سیوک سنگھ (آر ایس ایس) سے منسلک سنسکرت بھارتی کے مرکزی دفتر کے افتتاح کے موقع پر صحافیوں سے گفتگو کر رہے تھے۔ جب ان سے بھارت کے “وشوگرو” کے طور پر ابھرنے اور مصنوعی ذہانت کے مرکز کے طور پر اپنی شناخت بنانے کے دوران سنسکرت کے فروغ کے بارے میں سوال کیا گیا تو سابق مرکزی وزیر نے کہا، “یہ تصور کہ ہم وشوگرو ہیں… میرا ذاتی خیال ہے کہ فی الحال ہمیں اس لفظ کے استعمال سے گریز کرنا چاہیے۔ ہم اس وقت وشوگرو نہیں ہیں۔ ہمیں وشوگرو بننے کی خواہش رکھنی چاہیے۔”
بی جے پی کے سینئر رہنما نے کہا، “حقیقت یہ ہے کہ ایک وقت ہم واقعی وشوگرو تھے، لیکن آج صورت حال یہ ہے کہ ہم اس مقام پر نہیں ہیں۔” انہوں نے کہا کہ اسی تناظر میں سنسکرت آج بہت اہمیت رکھتی ہے اور اس کے فروغ کی ضرورت ہے۔ انہوں نے سنسکرت کو جدید سائنسی شعبوں، بشمول کوانٹم کمپیوٹنگ، میں استعمال کرنے کی بھی وکالت کی۔
