ازبکستان کے صدر عزت مآب شوکت مرزیایف کی دعوت پر ہندوستان کے وزیر اعظم عزت مآب نریندر مودی نے 29 سے 30 اگست 2026 تک جمہوریہ ازبکستان کا سرکاری دورہ کیا۔صدر شوکت مرزیایف اور وزیر اعظم نریندر مودی نے دوستانہ، خوشگوار اور تعمیری ماحول میں بات چیت کی۔ دونوں رہنماؤں نے ازبکستان اور ہندوستان کے دوطرفہ تعلقات کی موجودہ صورت حال اور مستقبل کے امکانات کا جامع جائزہ لیا، باہمی دلچسپی کے علاقائی اور بین الاقوامی امور پر تبادلہ خیال کیا اور عملی تعاون کے لیے ترجیحی شعبوں کی نشاندہی کی۔دونوں رہنماؤں نے ہندوستان اور ازبکستان کے درمیان مضبوط تعاون پر اطمینان کا اظہار کیا۔ انہوں نے کہا کہ دونوں ملکوں کے تعلقات دیرینہ دوستی، گہرے تاریخی اور ثقافتی روابط پر مضبوطی سے قائم ہیں۔ دونوں رہنماؤں نے دوطرفہ تعلقات کو مزید گہرا کرنے اور تعاون کو جامع اسٹریٹجک شراکت داری کی سطح تک لے جانے کے عزم کا اعادہ کیا، جو دونوں ملکوں کے بنیادی مفادات اور عوام کے لیے مفید ہو۔

دونوں رہنماؤں نے وسطی ایشیا کی بڑھتی ہوئی اہمیت اور کئی معاملات پر دونوں ملکوں کے مؤقف میں ہم آہنگی کا خیرمقدم کیا۔ پیچیدہ جغرافیائی سیاسی صورت حال کے درمیان انہوں نے آزاد، کھلے اور قوانین پر مبنی عالمی نظام کی ضرورت پر زور دیا۔ دونوں ممالک نے تجارت، معیشت اور سرمایہ کاری، ٹرانسپورٹ رابطے، ڈیجیٹل تبدیلی، آئی ٹی، مصنوعی ذہانت، خلائی تحقیق، سائبر سکیورٹی، توانائی کی منتقلی، اہم معدنیات، غذائی تحفظ، صحت، ادویہ سازی اور تعلیم سمیت مختلف شعبوں میں طویل مدتی اور باہمی مفاد پر مبنی تعاون کو مزید گہرا کرنے پر اتفاق کیا۔

سیاسی، پارلیمانی اور سکیورٹی تعاون

دونوں رہنماؤں نے اعلیٰ سطح اور ادارہ جاتی سطح پر باقاعدہ اور اعتماد پر مبنی مذاکرات جاری رکھنے کی اہمیت پر زور دیا اور دوطرفہ سطح کے ساتھ ساتھ بین الاقوامی اجلاسوں کے موقع پر بھی باہمی دوروں اور رابطوں کا سلسلہ جاری رکھنے پر اتفاق کیا۔

دونوں ممالک نے وزرائے خارجہ کی سربراہی میں ایک میکانزم قائم کرنے پر اتفاق کیا، جو دونوں ممالک کے درمیان طے پانے والے معاہدوں اور انتظامات پر عمل درآمد کی اعلیٰ سطحی نگرانی اور رابطہ کاری کرے گا، نیز ترجیحی دوطرفہ منصوبوں اور اقدامات کو بروقت عملی شکل دینے میں مدد دے گا۔

دونوں رہنماؤں نے پارلیمانی سفارت کاری کے بڑھتے ہوئے کردار کو تسلیم کیا اور ازبکستان کی اولی مجلس اور ہندوستانی پارلیمنٹ کے ایوانوں کے درمیان بڑھتے ہوئے روابط کا خیرمقدم کیا۔

دونوں رہنماؤں نے مختلف شعبوں میں دوطرفہ تعاون کے قانونی ڈھانچے کو مزید مضبوط بنانے کی اہمیت پر زور دیا۔ انہوں نے موجودہ دوطرفہ قانونی معاہدوں کا جامع جائزہ لینے اور انہیں موجودہ ترجیحات اور حالات کے مطابق جدید بنانے پر اتفاق کیا۔

دونوں رہنماؤں نے دہشت گردی، بشمول سرحد پار دہشت گردی، کی ہر شکل اور مظہر کی واضح مذمت کی۔ انہوں نے دہشت گردی کے خلاف زیرو ٹالرنس کی پالیسی کا اعادہ کیا اور کسی بھی بنیاد پر دہشت گردی کے جواز کو مسترد کیا۔

دونوں رہنماؤں نے دہشت گرد تنظیموں کے خلاف مشترکہ کارروائی، دہشت گردی کی مالی معاونت کے نیٹ ورکس، محفوظ پناہ گاہوں اور بنیادی ڈھانچے کو ختم کرنے پر زور دیا۔ انہوں نے کہا کہ دہشت گردی کے ذمہ داروں، ان کے سرپرستوں، سہولت کاروں اور معاونین کو انصاف کے کٹہرے میں لایا جانا چاہیے۔

دونوں ممالک نے قانون نافذ کرنے والے اداروں کے درمیان تعاون، انٹیلی جنس معلومات کے تبادلے، پرتشدد انتہا پسندی، غیر قانونی منشیات کی اسمگلنگ، منظم جرائم اور سائبر خطرات سے نمٹنے میں تعاون مضبوط کرنے کی اہمیت پر زور دیا۔ دہشت گردی کے خلاف مشترکہ ورکنگ گروپ کے تحت تعاون جاری رکھنے کی بھی تصدیق کی گئی۔

دونوں رہنماؤں نے ہندوستان اور ازبکستان کے دفاعی و سکیورٹی اداروں کے درمیان بڑھتے ہوئے تعاون کو سراہا۔ اس میں باقاعدہ تبادلے، ادارہ جاتی نظام، استعداد سازی اور مشترکہ سرگرمیاں شامل ہیں۔

دونوں رہنماؤں نے ازبکستان-ہندوستان مشترکہ فوجی مشق ’دوستلیک‘ کے کامیاب انعقاد کا خیرمقدم کیا۔ اس مشق کا تازہ ترین ایڈیشن اپریل 2026 میں ازبکستان کے نامنگان خطے میں منعقد ہوا تھا۔

تجارت، معیشت اور سرمایہ کاری

دونوں رہنماؤں نے ازبکستان اور ہندوستان کے درمیان مضبوط اقتصادی شراکت داری کا خیرمقدم کیا اور دوطرفہ تجارت اور سرمایہ کاری میں مزید توسیع کے وسیع امکانات کو تسلیم کیا۔دونوں ممالک نے نئی مواقع کی نشاندہی کرتے ہوئے دوطرفہ تجارت کو مزید بڑھانے اور متنوع بنانے کی اہمیت پر اتفاق کیا۔ ازبکستان میں کام کرنے والی ہندوستانی کمپنیوں کی بڑھتی ہوئی تعداد کو دونوں ملکوں کے درمیان اقتصادی تعاون کے وسیع امکانات کی علامت قرار دیا گیا۔

دونوں ممالک نے تجارت کی جانے والی اشیا کی تعداد بڑھانے، غیر محصولاتی رکاوٹوں کو دور کرنے اور صنعتی تعاون کو فروغ دینے کے لیے مشترکہ اقدامات کرنے پر اتفاق کیا۔ اس مقصد کے لیے غیر محصولاتی مسائل اور سرمایہ کاری کی راہ میں حائل رکاوٹوں سے نمٹنے کے لیے ایک مشترکہ ورکنگ گروپ قائم کرنے کا فیصلہ کیا گیا۔

دونوں ممالک نے ای کامرس، تجارتی طریقہ کار کی ڈیجیٹلائزیشن اور چھوٹے و درمیانے درجے کے کاروباری اداروں کے لیے ڈیجیٹل پلیٹ فارم متعارف کرانے میں تعاون مضبوط کرنے میں دلچسپی ظاہر کی۔

ازبک فریق نے عالمی تجارتی تنظیم (WTO) میں ازبکستان کی شمولیت کے لیے ہندوستان کی حمایت کو سراہا۔ دونوں ممالک نے عالمی تجارتی نظام، جس کا مرکز WTO ہو، کو مضبوط بنانے کے لیے مل کر کام کرنے پر اتفاق کیا۔دونوں ممالک نے مینوفیکچرنگ اور برآمدی صلاحیتوں کو مضبوط بنانے، ریگولیٹری اداروں کے درمیان مذاکرات اور ایک دوسرے کی منڈیوں تک تیز اور وسیع تر رسائی کے لیے باہمی شناخت کے انتظامات تلاش کرنے پر اتفاق کیا۔

دونوں رہنماؤں نے جون 2026 میں تاشقند انٹرنیشنل انویسٹمنٹ فورم کے موقع پر منعقدہ بین الحکومتی کمیشن کے اجلاس اور ازبکستان-ہندوستان بزنس فورمز کے نتائج کو سراہا۔

دونوں رہنماؤں نے ازبک اور ہندوستانی کمپنیوں کے درمیان تعاون کو فروغ دینے، دونوں معیشتوں کی باہمی تکمیلات سے فائدہ اٹھانے اور ویلیو ایڈڈ سپلائی چینز کے درمیان رابطوں کو مضبوط بنانے پر اتفاق کیا۔

دونوں فریقوں نے برقی مصنوعات، انجینئرنگ مصنوعات، آٹوموبائل اور ادویہ سازی کے شعبوں میں دوطرفہ تجارت کے وسیع امکانات کو تسلیم کیا اور ان شعبوں میں کاروباری اداروں کے درمیان قریبی روابط پر اتفاق کیا۔

دونوں ممالک نے باہمی مفاد کی سرمایہ کاری کے مواقع تلاش کرنے اور سرمایہ کاروں کے مسائل حل کرنے اور کاروبار میں آسانی پیدا کرنے کے لیے ادارہ جاتی نظام قائم کرنے پر اتفاق کیا۔

دونوں رہنماؤں نے ازبکستان-ہندوستان ترجیحی تجارتی معاہدے سے متعلق مشترکہ فزیبلٹی اسٹڈی مکمل ہونے کا بھی خیرمقدم کیا اور متعلقہ وزارتوں کو آئندہ اقدامات مقررہ مدت میں طے کرنے کی ہدایت دی۔

توانائی، قدرتی وسائل اور سپلائی چین

دونوں رہنماؤں نے قابل تجدید توانائی، توانائی کے بنیادی ڈھانچے کی جدید کاری اور ممکنہ سرمایہ کاری کے منصوبوں میں تعاون آگے بڑھانے پر ہونے والی بات چیت کا خیرمقدم کیا۔دونوں ممالک نے ارضیات، کان کنی، جوہری توانائی، صنعتی تعاون اور اہم و اسٹریٹجک معدنیات کے شعبوں میں تعاون کے امکانات تلاش کرنے پر اتفاق کیا۔اس میں معدنی وسائل کی پروسیسنگ، ویلیو ایڈڈ مصنوعات کی تیاری اور ری سائیکلنگ کے منصوبے بھی شامل ہوں گے۔

دونوں رہنماؤں نے اہم معدنیات کے شعبے میں مشترکہ منصوبوں کے ذریعے ارضیاتی تحقیق، کان کنی، معدنیات کی پروسیسنگ اور مربوط ویلیو چینز کی ترقی میں تعاون بڑھانے پر اتفاق کیا۔

زراعت

دونوں ممالک نے زرعی ویلیو چینز کی ترقی، برآمدی صلاحیتوں کو مضبوط بنانے اور زراعت و مویشی پالن کے شعبوں میں تکنیکی صلاحیت بڑھانے پر اتفاق کیا۔

دونوں رہنماؤں نے زراعت اور غذائی تحفظ کے شعبے میں تعاون مضبوط بنانے کے عزم کا اعادہ کیا، جس میں جدت اور وسائل کے مؤثر استعمال والی ٹیکنالوجیز پر خصوصی توجہ دی جائے گی۔

دونوں ممالک نے زرعی سائنس کے شعبے میں تبادلے جاری رکھنے اور خطے میں جدید اور پائیدار زراعت کے فروغ کے لیے کثیر ملکی و علاقائی پلیٹ فارمز سے مؤثر استفادہ کرنے پر اتفاق کیا۔

ٹرانسپورٹ، لاجسٹکس اور رابطہ کاری

دونوں رہنماؤں نے کثیر جہتی ٹرانسپورٹ روٹس اور لاجسٹکس کوریڈورز کی ترقی کے ذریعے ازبکستان اور ہندوستان کے درمیان ٹرانسپورٹ اور لاجسٹکس رابطے بہتر بنانے کے عزم کا اعادہ کیا۔

انہوں نے مال برداری کے نظام کی بحالی کے لیے تعاون جاری رکھنے پر اتفاق کیا تاکہ نقل و حمل کے اخراجات کم کیے جا سکیں۔

دونوں ممالک نے جدید ٹیکنالوجی کے ذریعے سڑکوں کی تعمیر کے شعبے میں تجربات کے تبادلے اور سڑکوں کے بنیادی ڈھانچے کی تعمیر نو و جدید کاری کے مشترکہ منصوبوں کے امکانات تلاش کرنے پر اتفاق کیا۔

ازبکستان کے عوامی ٹرانسپورٹ کے شعبے میں ماحول دوست اور توانائی کے مؤثر استعمال والے حل تیار کرنے کے لیے بھی مشترکہ منصوبوں کے امکانات تلاش کیے جائیں گے۔

ڈیجیٹل ٹیکنالوجی، جدت اور خلائی تعاون

دونوں رہنماؤں نے تاشقند میں پہلے آئی ٹی پارک کے کامیاب آپریشن کا خیرمقدم کیا، جو 2019 میں ہندوستان کے ماڈل پر ہندوستانی سافٹ ویئر ٹیکنالوجی پارکس کی فعال معاونت سے قائم کیا گیا تھا۔

دونوں ممالک نے ٹیکنالوجی پارکس، کمپنیوں، اسٹارٹ اپس اور تعلیمی اداروں کے درمیان شراکت داری مزید بڑھانے پر اتفاق کیا۔

دونوں رہنماؤں نے اعلیٰ ٹیکنالوجی اور ڈیجیٹل تبدیلی کے شعبوں میں دوطرفہ تعاون کو مضبوط بنانے کا خیرمقدم کیا۔

انہوں نے محفوظ، قابل اعتماد اور ذمہ دار مصنوعی ذہانت (AI) نظام کی ترقی اور فروغ میں تعاون بڑھانے پر اتفاق کیا، جس میں تجربات اور بہترین طریقہ کار کا تبادلہ بھی شامل ہوگا۔

دونوں ممالک نے پائیدار اقتصادی ترقی، جدت پر مبنی ترقی اور سماجی مسائل کے مؤثر حل کے لیے مصنوعی ذہانت کی صلاحیتوں سے فائدہ اٹھانے پر زور دیا۔

دونوں رہنماؤں نے خلائی تحقیق اور بیرونی خلا کے پُرامن استعمال میں عملی تعاون بڑھانے، سائنسی معلومات کے تبادلے اور مشترکہ ورکشاپس و تربیتی پروگراموں کے ذریعے استعداد سازی میں دلچسپی کا اظہار کیا۔

تعلیم، انسانی وسائل، صحت، ثقافت، کھیل اور سیاحت

دونوں رہنماؤں نے ازبکستان میں تعلیم حاصل کرنے والے ہندوستانی طلبہ کے دونوں ملکوں کے درمیان دیرینہ عوامی روابط مضبوط کرنے میں اہم کردار کو تسلیم کیا۔انہوں نے ازبکستان میں انڈیا اسٹڈیز اور ہندوستان میں ازبک اسٹڈیز کے فروغ کا خیرمقدم کیا۔

دونوں رہنماؤں نے انسانی وسائل کی ترقی میں تعاون مضبوط کرنے پر اتفاق کیا، جسے ہندوستان اور ازبکستان کے درمیان ایک اہم پل قرار دیا گیا۔

دونوں ممالک نے طب، ادویہ سازی، کیمسٹری، نینو ٹیکنالوجی اور بایو ٹیکنالوجی سمیت مختلف شعبوں میں استعداد سازی اور انسانی وسائل کی ترقی کے لیے دیرینہ شراکت داری کو سراہا۔

اب تک 2,700 سے زائد ازبک شہری ہندوستانی تکنیکی و اقتصادی تعاون پروگرام (ITEC) میں شرکت کر چکے ہیں، جب کہ 400 سے زائد ازبک طلبہ کو انڈین کونسل فار کلچرل ریلیشنز (ICCR) کی اسکالرشپس کے لیے منتخب کیا گیا ہے۔

اس موقع پر ازبک فریق نے ازبکستان میں ہندی زبان کے لیے لال بہادر شاستری اسکالرشپ کے اعلان کا خیرمقدم کیا۔دونوں رہنماؤں نے انسانی وسائل کی ترقی کے لیے ITEC پروگرام کے تحت تعاون مزید بڑھانے کے عزم کا اعادہ کیا۔

ارال سمندر کے خطے کی ماحولیاتی بحالی

ازبکستان اور ہندوستان نے آئندہ نسلوں کے لیے ایک زیادہ سرسبز اور صحت مند کرۂ ارض چھوڑنے کی خواہش کا اظہار کیا۔ اس مقصد کے لیے ازبکستان کے ’یَشِل ماکون‘ اور ہندوستان کے ’ایک پیڑ ماں کے نام‘ جیسے اقدامات کا حوالہ دیا گیا۔

اسی مشترکہ عزم کے تحت ہندوستان اور ازبکستان ارال سمندر کے خطے کو سرسبز بنانے اور ماحولیاتی بحالی کے لیے تعاون کریں گے۔

اس مقصد کے لیے 10 لاکھ امریکی ڈالر کی امداد فراہم کی جائے گی، جس میں ضروری تکنیکی تعاون بھی شامل ہوگا۔ یہ اقدامات ہندوستان کے گرانٹ اِن ایڈ فریم ورک کے تحت کیے جائیں گے۔

دونوں رہنماؤں نے بایومیڈیکل تحقیق اور طبی جدت سمیت عوامی صحت کے نظام کو مضبوط بنانے میں تعاون بڑھانے پر اتفاق کیا۔

دونوں رہنماؤں نے ادویہ سازی کے شعبے میں بڑھتے ہوئے تعاون کو سراہا اور تاشقند فارما پارک کو مشترکہ منصوبوں، جدید ادویہ سازی میں سرمایہ کاری، ٹیکنالوجی کی منتقلی اور ہنرمند افرادی قوت کی تیاری کے لیے ایک مؤثر پلیٹ فارم قرار دیا۔

دونوں ممالک نے ازبکستان میں ہندوستانی کمپنیوں کے تعاون سے نئے طبی مراکز، لیبارٹریز، تحقیقی ادارے اور مشترکہ ادویہ ساز یونٹس قائم کرنے کی حمایت کی۔

ثقافتی تعاون

دونوں رہنماؤں نے ہندوستان اور ازبکستان کے درمیان صدیوں پرانے تاریخی روابط، مشترکہ ثقافتی و تہذیبی ورثے اور باہمی احترام کی دیرینہ روایات کو تسلیم کرتے ہوئے ثقافتی اور انسانی تعاون مزید بڑھانے کے عزم کا اعادہ کیا۔

دونوں ممالک ثقافتی دنوں، تہواروں، نمائشوں اور فنکاروں کے دوروں کے انعقاد کے ساتھ ساتھ ثقافتی اداروں کے درمیان براہ راست روابط کو مضبوط کریں گے۔دونوں رہنماؤں نے 2026-2030 کے ثقافتی تبادلے کے پروگرام اور محفوظات کے شعبے میں ازبکستان-ہندوستان تعاون کے معاہدے کا خیرمقدم کیا۔دونوں ممالک نے عالمی ثقافتی ورثے کے مقامات کے تحفظ، مطالعے، بحالی اور فروغ کے شعبے میں تعاون بڑھانے میں دلچسپی ظاہر کی۔

اس میں ثقافتی ورثے کے مقامات کی ڈیجیٹلائزیشن، آثار قدیمہ کے نوادرات کے 3D ماڈلز کی تیاری اور جدید ٹیکنالوجی کے ذریعے ان کے تحفظ جیسے اقدامات شامل ہوں گے۔دونوں رہنماؤں نے فایاز تیپا اور کارا تیپا کے قدیم بدھ مت کے مقامات کے تحفظ اور بحالی سے متعلق مفاہمتی ارادے کے خط کا بھی خیرمقدم کیا۔

کھیل اور یوگا

دونوں ممالک نے کھیلوں کے شعبے میں تعاون مضبوط کرنے پر اتفاق کیا، جس میں کھلاڑیوں کی تیاری اور کوچز کی تربیت کے تجربات کا تبادلہ شامل ہے، خصوصاً بیڈمنٹن، تیر اندازی اور شطرنج کے شعبوں میں۔دونوں رہنماؤں نے صحت مند طرز زندگی کے فروغ اور عوامی روابط مضبوط بنانے میں یوگا کے کردار کو سراہا اور 21 جون کو عالمی یومِ یوگا کی اہمیت پر زور دیا۔دونوں ممالک نے یوگا انسٹرکٹرز کی تربیت میں ازبکستان کی یوگا فیڈریشن اور ہندوستان کی وزارتِ آیوش کے درمیان تعاون کا خیرمقدم کیا۔

بین الاقوامی تعاون

دونوں رہنماؤں نے اس بات کا اعادہ کیا کہ اقوام متحدہ کو عالمی امن اور سلامتی کے قیام میں مرکزی کردار ادا کرنا چاہیے۔انہوں نے اقوام متحدہ اور دیگر بین الاقوامی و علاقائی تنظیموں میں باہمی حمایت سمیت تعاون مضبوط کرنے پر اتفاق کیا۔دونوں رہنماؤں نے اقوام متحدہ میں جامع اصلاحات کا مطالبہ کیا، جس میں سلامتی کونسل بھی شامل ہے، تاکہ اسے موجودہ عالمی حقائق کا عکاس، زیادہ نمائندہ اور بین الاقوامی امن و سلامتی کے مسائل سے نمٹنے میں زیادہ مؤثر بنایا جا سکے۔

ازبکستان نے اقوام متحدہ کی سلامتی کونسل کی مستقل رکنیت کے لیے ہندوستان کی امیدواری کی حمایت کا اعادہ کیا۔دونوں رہنماؤں نے عالمی جنوب کے ممالک کے مشترکہ مفادات کو آگے بڑھانے کے لیے بین الاقوامی فورمز میں رابطہ کاری مزید مضبوط کرنے کے عزم کا اعادہ کیا۔دونوں رہنماؤں نے شنگھائی تعاون تنظیم (SCO) کے اندر تعاون مزید مضبوط کرنے کے عزم کا بھی اعادہ کیا۔ انہوں نے اسے باہمی اعتماد، علاقائی امن، سلامتی و استحکام اور تجارت، معیشت، سرمایہ کاری اور ثقافتی و انسانی تبادلے کے فروغ کے لیے اہم پلیٹ فارم قرار دیا۔

صدر شوکت مرزیایف نے 2026 میں برکس کی ہندوستانی صدارت پر وزیر اعظم نریندر مودی کو مبارک باد دی اور برکس سربراہی اجلاس کی میزبانی کے لیے نیک خواہشات کا اظہار کیا۔وزیر اعظم نریندر مودی نے 2027 سے 2030 تک ناوابستہ تحریک (NAM) کی ازبکستانی صدارت کی کامیابی پر اعتماد کا اظہار کیا اور تحریک کے بانی رکن کی حیثیت سے ہندوستان کی جانب سے مسلسل حمایت کا یقین دلایا۔

دونوں رہنماؤں نے انٹرنیشنل بگ کیٹ الائنس (IBCA) اور انٹرنیشنل سولر الائنس (ISA) کے اہم کردار کو تسلیم کیا۔ ہندوستان نے ان دونوں فریم ورک میں شامل ہونے میں ازبکستان کی دلچسپی کا خیرمقدم کیا اور ضروری مشاورت و کارروائی میں فعال تعاون کی یقین دہانی کرائی۔

وزیر اعظم نریندر مودی نے ازبکستان کے صدر شوکت مرزیایف، حکومت اور عوام کا دورے کے دوران پرتپاک استقبال اور شاندار میزبانی پر تہہ دل سے شکریہ ادا کیا۔وزیر اعظم نریندر مودی نے ازبکستان کے صدر شوکت مرزیایف کو ہندوستان کے دورۂ ازبکستان کے جواب میں ہندوستان آنے کی دعوت دی۔ دورے کی تاریخ سفارتی ذرائع سے طے کی جائے گی۔