نئی دہلی/ آواز دی وائس

ملک بھر میں ہفتہ، یعنی 9 اگست کو رکشا بندھن منایا جائے گا۔ اس موقع پر کئی ریاستوں کی سرکاری بسوں میں خواتین سے ٹکٹ نہیں لیا جائے گا۔ کچھ ریاستوں میں دو دن تو کچھ ریاستوں میں تین دن خواتین کے لیے بس سفر مفت رہے گا۔ تاہم پنجاب اور کرناٹک میں خواتین کے لیے پہلے سے ہی سرکاری بس سروس مفت ہے، وہیں دہلی کی ڈی ٹی سی بسوں میں صرف دہلی کی خواتین مفت سفر کرتی ہیں۔ آئیے جانتے ہیں کن ریاستوں میں بس سروس مفت رہے گی۔

اتر پردیش میں خواتین کے لیے تین دن مفت بس سروس

رکشا بندھن پر اتر پردیش اسٹیٹ روڈ ٹرانسپورٹ کارپوریشن (یوپی ایس آر ٹی سی) اور شہری بس سروس کی بسوں میں خواتین مفت سفر کر سکیں گی۔ اس کا اعلان خود وزیر اعلیٰ یوگی آدتیہ ناتھ نے کیا ہے۔ ان کے دفتر سے جاری بیان کے مطابق، مائیں اور بہنیں 8 اگست کی صبح 6 بجے سے 10 اگست کی رات 12 بجے تک بغیر کسی کرائے کے سفر کریں گی۔ تہوار کے دوران آسان اور محفوظ سفر کو یقینی بنانے کے لیے دیہی و شہری علاقوں میں مناسب تعداد میں بسیں چلائی جائیں گی۔

ہریانہ کی سرکاری بسوں میں دو دن مفت سہولت

رکشا بندھن کے موقع پر خواتین اور ان کے 15 سال تک کے بچوں کو ہریانہ روڈویز کی بسوں میں مفت سفر کی سہولت دی جائے گی۔ ہریانہ کے ٹرانسپورٹ وزیر انیل وج نے بتایا کہ اس تجویز کو وزیر اعلیٰ نایاب سنگھ سینی نے منظوری دے دی ہے۔ یہ سہولت ہریانہ کے اندر چلنے والی ’سادہ بسوں‘ کے ساتھ چنڈی گڑھ اور دہلی جانے والی بسوں پر بھی لاگو ہوگی۔ یہ سروس 8 اگست کی دوپہر 12 بجے سے 9 اگست کی رات تک دستیاب ہوگی۔

راجستھان کی سرکاری بسوں میں خواتین کو مفت سفر کی سہولت

راجستھان کے وزیر اعلیٰ بھجن لال شرما نے 9 اگست رکشا بندھن کے دن اور اگلے دن خواتین کے لیے ریاستی ٹرانسپورٹ کارپوریشن کی بسوں میں مفت سفر کی سہولت کا اعلان کیا ہے۔ ایک سرکاری بیان کے مطابق یہ سہولت 9 اور 10 اگست کو راجستھان کی سرحد کے اندر لاگو ہوگی۔ اس بار خواتین کو لگاتار دو دن مفت سفر کی اجازت دی گئی ہے، جب کہ پہلے صرف رکشا بندھن کے دن ہی یہ سہولت دی جاتی تھی۔

چنڈی گڑھ میں مفت بس سروس

چنڈی گڑھ میں بھی خواتین رکشا بندھن پر مفت سفر کر سکیں گی۔ یہ سہولت چنڈی گڑھ ٹرانسپورٹ انڈرٹیکنگ اور چنڈی گڑھ سٹی بس سروسز سوسائٹی کے ذریعہ ٹرائی سٹی علاقہ (چنڈی گڑھ، موہالی اور پنچکولہ) میں چلنے والی تمام مقامی اے سی اور نان اے سی بسوں پر دستیاب ہوگی۔ تاہم، یہ سہولت ان طویل فاصلے کی بسوں پر لاگو نہیں ہوگی جو ٹرائی سٹی کی حدود سے باہر جاتی ہیں۔

اتراکھنڈ میں بھی خواتین کا مفت سفر

رکشا بندھن کے موقع پر اتراکھنڈ ٹرانسپورٹ کارپوریشن کی بسوں میں خواتین مفت میں سفر کر سکیں گی۔ اتراکھنڈ میں ہر سال رکشا بندھن پر خواتین اور چھوٹے بچے مفت سفر کرتے ہیں، اور اس سال بھی یہ روایت جاری رہے گی۔

کرناٹک، پنجاب اور دہلی میں بھی مفت سفر

کرناٹک، پنجاب اور دہلی میں پہلے سے ہی سرکاری بسوں میں خواتین کے لیے مفت سفر کی سہولت موجود ہے۔ اس لیے رکشا بندھن پر بھی خواتین ان ریاستوں کی سرکاری بسوں میں مفت سفر جاری رکھیں گی۔

مدھیہ پردیش کی خواتین کے لیے خوشخبری

مدھیہ پردیش میں بھی رکشا بندھن پر خواتین کے لیے خوشخبری ہے۔ 9 اگست کو بھوپال سٹی لنک لمیٹڈ خواتین کو مفت سفر کی سہولت دے گا۔ وہیں اندور کی میئر نے بھی اعلان کیا ہے کہ رکشا بندھن کے موقع پر خواتین مفت میں سفر کر سکیں گی۔

رکشا بندھن پر "لاڈلی بہنوں" کو وزیر اعلیٰ موہن یادو کی طرف سے بڑا تحفہ دیا گیا ہے۔ آج لاڈلی بہن یوجنا کی 27ویں قسط کے تحت 1500 روپے بہنوں کے کھاتوں میں منتقل کیے جائیں گے۔ اس کے ساتھ رکشا بندھن کے شگن کے طور پر 250 روپے اضافی دیے جائیں گے۔ 28 لاکھ سے زیادہ بہنوں کو گیس سلینڈر کے لیے بھی 43.90 کروڑ روپے دیے جائیں گے۔