نئی دہلی/ آواز دی وائس
دہلی کی وزیر اعلیٰ ریکھا گپتا نے جمعرات کو چاندنی چوک میں مناسب صفائی انتظامات نہ ہونے پر ناراضگی ظاہر کی اور افسران کو علاقے کو صاف ستھرا رکھنے کی ہدایت دی۔ گپتا نے آج صبح چاندنی چوک میں ’صفائی ہی سیوا‘ مہم کے تحت شردھان میں حصہ لیا۔
وزیر اعلیٰ نے کہا کہ چاندنی چوک علاقے میں صفائی کے انتظام میں بہتری کی ضرورت ہے۔
انہوں نے صحافیوں سے کہا کہ ہم نے چاندنی چوک کو اس لیے منتخب کیا کیونکہ یہ ایک ورثہ مقام ہے۔ یہاں روزانہ لاکھوں لوگ آتے ہیں۔ یہاں مذہبی مقامات بھی ہیں اور نوراتری کے دوران کئی جلوس بھی اس علاقے سے گزرتے ہیں۔
وزیر اعلیٰ نے علاقے میں پان کی پیک کے نشانات اور کوڑے دانوں کی کمی کی جانب اشارہ کیا۔
انہوں نے کہا کہ میں نے افسران کو علاقے میں صفائی یقینی بنانے کی ہدایت دی ہے۔ لیکن لوگوں کو بھی اپنے آس پاس صفائی کا خیال رکھنا ہوگا۔ اگر کسی دکاندار کا ملازم آس پاس کا علاقہ گندا کر رہا ہے، تو انہیں اسے ایسا نہ کرنے کے لیے کہنا ہوگا۔ اگر کوئی دکاندار ایسا کر رہا ہے، تو اس کے پڑوسی دکاندار کو اسے سمجھانا ہوگا۔
گپتا نے یہ بھی کہا کہ انہوں نے کارکنوں کو ہدایت دی ہے کہ وہ ان کے پوسٹر دیواروں پر نہ لگائیں۔
انہوں نے کہا کہ ہم نے صاف ہدایت دی ہیں ہمارے پوسٹر نہ لگائیں۔ مجھے یہ دیکھ کر خوشی نہیں ہوگی۔ کارکن چاہیں تو ہورڈنگ لگا سکتے ہیں، لیکن کچھ دن بعد انہیں ہٹا بھی دینا چاہیے۔
