نئی دہلی: شری رام جنم بھومی تیرتھ شیترا ٹرسٹ بدھ کو ایودھیا میں دو اہم اجلاس منعقد کرے گا، جن میں نذرانے کی مبینہ چوری کے تنازع کے بعد نئے جنرل سکریٹری کی تقرری، ٹرسٹیوں کی تین خالی نشستوں کو پُر کرنے اور رام مندر کے پہلے چیف ایگزیکٹو آفیسر (سی ای او) کی تقرری پر غور کیا جائے گا۔
ٹرسٹ ذرائع کے مطابق، دوپہر تین بجے رام مندر احاطے میں خصوصی اجلاس ہوگا، جس کے بعد شام چار بجے ٹرسٹ کے صدر مہنت نرتیہ گوپال داس کی رہائش گاہ ’’منی رام چھاؤنی‘‘ میں باقاعدہ اجلاس منعقد ہوگا۔ خصوصی اجلاس میں چمپت رائے کے استعفے کے بعد خالی ہونے والے عہدے سمیت ٹرسٹ میں پیدا ہونے والی تین اسامیوں کو پُر کرنے اور نئے جنرل سکریٹری کی تقرری پر غور کیے جانے کا امکان ہے۔
نذرانے کی مبینہ چوری کے معاملے میں چمپت رائے اور ٹرسٹی انل مشرا کے استعفوں اور ٹرسٹی بملیندر موہن پرتاپ مشرا کے انتقال کے بعد یہ نشستیں خالی ہوئی ہیں۔ ذرائع کے مطابق، اجلاس میں نو قائم شدہ سی ای او کے عہدے کے لیے انتظامی ڈھانچے پر بھی تبادلۂ خیال متوقع ہے۔
دوسرے اجلاس میں مالی شفافیت پر خصوصی توجہ دی جائے گی، جس میں نذرانوں کی گنتی، عطیات کے انتظام اور ٹرسٹ کے مالی لین دین کی نگرانی کے نظام کو مزید مضبوط بنانے پر غور ہوگا۔ اس کے علاوہ سکیورٹی انتظامات، وی آئی پی، سہولت اور آرتی پاس جاری کرنے کے طریقۂ کار سمیت دیگر انتظامی امور بھی اجلاس کے ایجنڈے میں شامل ہیں۔
ذرائع نے بتایا کہ بیشتر ٹرسٹی منگل تک ایودھیا پہنچ چکے تھے، جبکہ کچھ اراکین دہلی اور لکھنؤ سے آن لائن اجلاس میں شریک ہوں گے۔ ٹرسٹ نے سی ای او کے عہدے کے لیے 18 جولائی تک درخواستیں طلب کی تھیں۔ بعض میڈیا رپورٹس کے مطابق اس عہدے کے لیے 2500 سے 5500 درخواستیں موصول ہوئی ہیں، اگرچہ ٹرسٹ نے اس بارے میں کوئی سرکاری اعداد و شمار جاری نہیں کیے۔ انتخابی عمل سے وابستہ ذرائع کا کہنا ہے کہ درخواستوں کا غیر معمولی ردعمل سامنے آیا ہے اور متعدد ریٹائرڈ آئی اے ایس، آئی پی ایس افسران، سینئر بیوروکریٹس اور دیگر پیشہ ور افراد نے بھی درخواستیں دی ہیں۔
امکان ظاہر کیا جا رہا ہے کہ ٹرسٹ درخواستوں کی بڑی تعداد کے پیش نظر تین رکنی ماہرین کی کمیٹی کو جانچ پڑتال کے لیے مزید وقت دے سکتا ہے۔ ماہرین کی اس کمیٹی میں ریٹائرڈ جسٹس پرمود کوہلی، ریٹائرڈ لیفٹیننٹ جنرل وشنوکانت چترویدی اور این آئی ٹی رائے پور کے سابق چیئرمین سریش ہوارے شامل ہیں۔ کمیٹی موزوں امیدواروں کی سفارش کرے گی، جبکہ حتمی تقرری کا فیصلہ ٹرسٹ کرے گا۔
