کلکتہ: آئی آئی ٹی کھڑگپور کے طلباء کو 2024-25 کے پلیسمنٹ سیشن میں 1,800 سے زائد ملازمتوں کی پیشکشیں موصول ہوئی ہیں، جن میں بین الاقوامی سطح پر دی گئی 25 آفرز بھی شامل ہیں۔ ادارے نے بدھ کو جاری کردہ ایک بیان میں یہ اطلاع دی۔

بیان کے مطابق، پلیسمنٹ سیشن کے ابتدائی دو دنوں میں 800 سے زیادہ آفرز موصول ہوئیں، جبکہ تیسرے دن یہ تعداد 1,000 تک پہنچ گئی۔ یہ اس بات کا ثبوت ہے کہ آئی آئی ٹی کھڑگپور کے طلباء کی مختلف صنعتوں میں زبردست مانگ ہے۔ اس سیشن میں 9 طلباء کو ایک کروڑ روپے سالانہ سے زائد تنخواہ کی پیشکش کی گئی، جن میں سب سے زیادہ سالانہ تنخواہ 2.14 کروڑ روپے کی پیشکش رہی۔

ادارے کے مطابق، یہ تمام آفرز معروف بین الاقوامی ملٹی نیشنل کمپنیوں کی جانب سے دی گئی ہیں۔آئی آئی ٹی کھڑگپور کے کیریئر ڈیولپمنٹ سینٹر کے چیئرمین راجیب میتی نے طلباء کو دی گئی ان ملازمتوں پر خوشی کا اظہار کرتے ہوئے بتایا کہ اب تک 400 سے زیادہ کمپنیوں نے پلیسمنٹ پراسیس میں حصہ لیا ہے، اور طلباء کو سافٹ ویئر، ڈیٹا اینالٹکس، فائنانس، بینکنگ، کنسلٹنگ اور کور انجینئرنگ جیسے مختلف شعبوں میں آفرز ملی ہیں۔

آئی آئی ٹی کھڑگپور کے ڈائریکٹر امیت پاترا نے کہا 2024-25 سیشن میں 1,800 سے زیادہ ملازمتوں کی پیشکش اس بات کی تصدیق کرتی ہے کہ ہم دنیا میں ان صفِ اول اداروں میں شامل ہیں جو صنعتوں کی ضروریات کے مطابق آئندہ نسل کے ماہرین تیار کر رہے ہیں۔