نئی دہلی: ہندوستانی انسٹی ٹیوٹ آف ٹیکنالوجی (آئی آئی ٹی) بھلائی نے دفاع اور نئی ٹیکنالوجی کے شعبے میں تحقیق، اختراع اور صلاحیت سازی کے فروغ کے لیے ہندوستانی فوج کی جبل پور میں واقع 506 آرمی بیس ورکشاپ کے ساتھ ایک مفاہمتی یادداشت (ایم او یو) پر دستخط کیے ہیں۔

ادارے نے جمعرات کو یہ اطلاع دی۔ آئی آئی ٹی بھلائی کی جانب سے جاری بیان کے مطابق، یہ ایم او یو بدھ کے روز چھتیس گڑھ کے ضلع درگ میں واقع آئی آئی ٹی کیمپس میں ادارے کے ڈائریکٹر پروفیسر راجیو پرکاش اور 506 آرمی بیس ورکشاپ کے کمانڈر و منیجنگ ڈائریکٹر بریگیڈیئر ٹی۔ اے۔ اروند کی موجودگی میں طے پایا۔ بیان میں کہا گیا ہے کہ اس معاہدے کا مقصد باہمی دلچسپی کے شعبوں میں اساتذہ، تکنیکی ماہرین اور محققین کے ذریعے تعلیمی اور تکنیکی معلومات کا تبادلہ کرنا ہے۔

بیان کے مطابق، تعاون کے ممکنہ شعبوں میں ابھرتی ہوئی ٹیکنالوجی اور دفاعی ٹیکنالوجی سے متعلق مشترکہ تحقیق و ترقی (ریسرچ اینڈ ڈیولپمنٹ) کے منصوبے شامل ہیں۔ ادارے نے کہا کہ اس مفاہمتی یادداشت سے دونوں اداروں کے درمیان وسیع پیمانے پر ادارہ جاتی تعاون کو فروغ ملے گا اور دفاعی تحقیق و اختراع کے شعبے میں نئی پیش رفت کی راہ ہموار ہوگی۔