نئی دہلی: اتر پردیش کے وزیر اعلیٰ یوگی آدتیہ ناتھ نے پیر کے روز سماجوادی پارٹی (ایس پی) اور کانگریس پر شدید تنقید کرتے ہوئے کہا کہ اگر سناتن دھرم پر کوئی خطرہ آیا تو کوئی بھی محفوظ نہیں رہے گا۔ بارہ بنکی ضلع کے دریاآباد اور رام نگر اسمبلی حلقوں میں 542 کروڑ روپے سے زائد مالیت کے 82 ترقیاتی منصوبوں کا افتتاح اور سنگ بنیاد رکھنے کے بعد عوامی جلسے سے خطاب کرتے ہوئے یوگی نے کہا، "ہمارا روشن مستقبل سناتن کی مضبوط بنیاد پر قائم ہوگا۔

اگر سناتن محفوظ ہے تو ہم سب محفوظ ہیں۔" انہوں نے کہا، "اگر سناتن پر کوئی خطرہ آیا تو کوئی نہیں بچے گا۔ جو لوگ سماج کو تقسیم کرنے کی کوشش کرتے ہیں، چاہے وہ سماجوادی پارٹی ہوں یا کانگریس، جب عوام پر مصیبت آتی ہے تو ان سب کی بولتی بند ہو جاتی ہے۔"

یوگی آدتیہ ناتھ نے الزام لگایا کہ اگرچہ یہ جماعتیں کچھ بھی دعوے کریں، لیکن ان کا حقیقی کردار سناتن مخالف ہے اور ان کی سیاست عوام کے حقوق اور ترقیاتی منصوبوں کے خلاف رہی ہے۔ انہوں نے سابقہ حکومتوں پر عوامی پیسے کے غلط استعمال کا الزام عائد کرتے ہوئے کہا، "پیسہ عوام کا تھا، لیکن اسے قبرستانوں کی چہار دیواری بنانے پر خرچ کیا جاتا تھا، جبکہ مہادیوا اور ایودھیا جیسے مذہبی اور ثقافتی مقامات کے لیے فنڈ نہیں دیا جاتا تھا۔ اگر ان مقامات کے لیے رقم مانگی جاتی تو اسے فرقہ وارانہ قرار دیا جاتا تھا۔"

یوگی نے کانگریس اور سماجوادی پارٹی پر وراثت اور ترقی مخالف ہونے کا الزام عائد کرتے ہوئے کہا کہ عوام کو ان سے ہوشیار رہنا چاہیے۔ انہوں نے مزید کہا، "ان کے لیے قبرستان کی چہار دیواری بنانا سیکولرزم کی علامت تھا، لیکن کانور یاترا پر پابندی، جنم اشٹمی کی تقریبات روکنا، رام نومی کے جلوسوں پر قدغن لگانا اور درگا پوجا کے پنڈالوں پر پابندی عائد کرنا بھی وہ سیکولرزم ہی سمجھتے تھے۔"