نئی دہلی: راجیہ سبھا کی رکن سواتی مالیوال نے منگل کو کہا کہ عام آدمی پارٹی چھوڑ کر بھارتیہ جنتا پارٹی میں شامل ہونے کا ان کا فیصلہ مکمل طور پر رضاکارانہ تھا، کیونکہ وہ وزیر اعظم نریندر مودی اور مرکزی وزیر داخلہ امت شاہ کے کام سے کافی متاثر ہیں۔

سواتی مالیوال اور عام آدمی پارٹی کی قیادت کے درمیان اختلافات 2024 میں سامنے آئے تھے۔ وہ ان سات راجیہ سبھا اراکین میں شامل ہیں جنہوں نے حال ہی میں پارٹی سے الگ ہونے اور اپنے گروپ کو بی جے پی میں ضم کرنے کا اعلان کیا۔ سواتی مالیوال منگل کو دہلی بی جے پی کے دفتر پہنچیں جہاں انہیں ریاستی صدر ویرندر سچدیوا، مرکزی وزیر ہرش ملہوترا، رکن پارلیمنٹ یوگیندر چندولیا اور ریاستی جنرل سکریٹری وشنو مِتّل کی موجودگی میں باضابطہ طور پر پارٹی میں شامل کیا گیا۔

انہوں نے صحافیوں سے بات کرتے ہوئے کہا، “میں وزیر اعظم نریندر مودی اور وزیر داخلہ امت شاہ کی جانب سے ملک کے لیے کیے گئے تاریخی کاموں سے بہت متاثر ہوں، اور انہی سے متاثر ہو کر میں نے بی جے پی میں شامل ہونے کا فیصلہ کیا ہے۔” انہوں نے مزید کہا کہ دہلی خواتین کمیشن کی چیئرپرسن کے طور پر کام کرتے ہوئے انہیں بی جے پی کی جانب سے مکمل تعاون ملا اور وہ کسی مجبوری کے تحت پارٹی میں شامل نہیں ہوئیں۔

انہوں نے کہا، “یہ میرا ذاتی فیصلہ ہے۔ میں یہاں ہو رہے کاموں کو دلچسپی سے دیکھ رہی تھی اور اب دہلی کے لیے مزید قوت اور حمایت کے ساتھ کام کروں گی۔” عام آدمی پارٹی پر تنقید کرتے ہوئے انہوں نے الزام لگایا کہ پارٹی سربراہ اروند کیجریوال نے دو ادوار میں دہلی کو “لوٹا” اور دارالحکومت کے بنیادی ڈھانچے کو “تباہ” کر دیا.