نئی دہلی/ آواز دی وائس
ورلڈ کپ جیتنے والی ہندوستانی خواتین کرکٹ ٹیم کی کپتان ہرمن پریت کور کی آنکھیں اُس وقت خوشی سے بھر آئیں جب انہوں نے اپنی پہلی کمائی 90 ہزار روپے کو یاد کیا۔ ہرمن پریت نے کہا کہ پہلی کمائی نے انہیں دنیا کی ’سب سے امیر انسان‘ جیسا احساس دلایا تھا۔
اُن کے اُتار چڑھاؤ سے بھرے کیریئر کا سب سے یادگار لمحہ بلاشبہ دو نومبر کو جیتا گیا ورلڈ کپ ہے، لیکن اس مقام تک پہنچنے سے پہلے کئی پڑاؤ ایسے آئے جنہوں نے اُن کا حوصلہ مضبوط کیا، خاص طور پر اُن کے ڈیبیو میچ کی تنخواہ اُس وقت ان کے لیے بہت بڑی رقم تھی۔
جب ہرمن پریت سے اس بارے میں پوچھا گیا تو انہوں نے کہا کہ اُن دنوں ہماری ٹور فیس ایک لاکھ روپے ہوا کرتی تھی۔ چاہے ہم کتنے بھی میچ کھیلیں، ہمیں اتنی ہی رقم ملتی تھی۔ ٹی ڈی ایس کٹ کر یہ تقریباً 90 ہزار روپے رہ جاتی تھی۔ہرمن پریت نے کرکٹ کھیلنا شروع کرنے کے بعد ہی ہندوستانی ٹیم کی جرسی پہننے کا خواب سنبھالا تھا اور اپنی پہلی کمائی کو یاد کرتے ہوئے ان کی آنکھوں میں خوشی کے آنسو آ گئے۔
انہوں نے کہا کہ اُس وقت مجھے لگا جیسے میں دنیا کی سب سے امیر انسان ہوں، کیونکہ یہ میری پہلی کمائی تھی۔ 36 سالہ ہرمن پریت نے 2009 میں ون ڈے اور ٹی ٹوئنٹی بین الاقوامی کرکٹ میں ڈیبیو کیا، لیکن ٹیسٹ ٹیم میں 2014 کے انگلینڈ دورے کے دوران جگہ ملی۔ اس ٹیم میں آٹھ نئے کھلاڑی شامل تھے، پھر بھی ہندوستان نے ایک دلچسپ میچ میں انگلینڈ کی مضبوط ٹیم کو چھ وکٹ سے شکست دی تھی۔
پنجاب کے موگا کی اس جارحانہ بلے باز نے بتایا کہ جب ان کی پہلی کمائی کا چیک گھر پہنچا تو انہوں نے وہ اپنے والد ہرمن در سنگھ بھلر کو دے دیا۔ بھلر مقامی عدالت میں کلرک کے طور پر کام کرتے تھے، کھیلوں کے شوقین تھے اور کرکٹ، باسکٹ بال اور والی بال بھی کھیلتے تھے۔
بھلر نے ہرمن پریت کو کرکٹ سے جوڑے رکھنے میں بہت اہم کردار ادا کیا اور آج بھی ان کے لیے ایک مضبوط سہارا ہیں۔ کھیل کے لیے ان کا جنون ایسا تھا کہ انہوں نے ہرمن پریت کے لیے "اچھی بیٹنگ" لکھا ہوا ایک ٹی شرٹ خریدا تھا، حالانکہ وہ اُس وقت تھوڑی بڑی تھی۔
ہرمن پریت نے کہا کہ اُن دنوں چیک گھر بھیج کر ہی ادائیگی کی جاتی تھی۔ میں نے چیک اپنے والد کو دیا۔ اس لمحے سے پہلے تک میرے والد ہی مجھ پر سرمایہ لگا رہے تھے، اور یہ پہلی بار تھا جب میں انہیں کچھ واپس دے رہی تھی۔ انہوں نے کہا کہ چاہے وہ رقم کتنی ہی بڑی یا چھوٹی کیوں نہ ہو، وہ اس کے مجھ سے زیادہ حقدار تھے۔
