رامپور: اتر پردیش کے رامپور سے سابق ایم ایل اے اور سابق وزیر اعظم خان گزشتہ ستمبر ماہ میں ضمانت پر جیل سے رہا ہو کر باہر آئے ہیں۔ جس کے بعد حکومت نے ان کی "وائی" زمرے کی سیکیورٹی بحال کر دی ہے۔ تاہم اب سماج وادی پارٹی کے رہنما اعظم خان نے بغیر تحریری یقین دہانی کے سیکیورٹی لینے سے انکار کر دیا ہے۔

سابق وزیر اعظم خان نے طنز کرتے ہوئے کہا، "میں مرغی چور، بکری چور ہوں، مجھے 21 سال کی سزا ہے، تو مجھے سیکیورٹی کیسے مل رہی ہے؟ مجھے اعتبار نہیں ہے۔" اس کے ساتھ ہی اعظم خان نے اپنے مخصوص انداز میں طنز کرتے ہوئے کہا کہ "اگر سیکیورٹی دینی ہے، تو کم از کم اتنی دی جائے جتنی میرے مخالفین کو ملی ہے۔"

رامپور میں اپنی رہائش گاہ پر میڈیا سے بات کرتے ہوئے سیکیورٹی نہ لینے کے سوال پر اعظم خان نے کہا، "جب تک مجھے کوئی تحریری اطلاع نہیں آ جاتی، تب تک میں اسے قبول کرنے کے لیے تیار نہیں ہوں۔ حالات نے مجھے بہت کچھ سکھا دیا ہے۔"

اعظم خان نے مزید کہا کہ سرکاری زمینوں پر ناجائز قبضے کے معاملے میں انہیں 21 سال کی سزا اور 36 لاکھ روپے کا جرمانہ سنایا گیا، جس پر انہوں نے ناراضگی ظاہر کی۔ انہوں نے طنز کرتے ہوئے کہا: "میڈیا کی خبروں میں میں ایک سزا یافتہ مجرم ہوں، جسے سیکیورٹی نہیں مل سکتی۔ تو میں ابھی کیسے لے لوں؟ میرے پاس کوئی سرکاری اطلاع نہیں ہے، تو ان پر اعتبار کیسے کروں؟"

اعظم خان نے سیکیورٹی کے نظام پر سوال اٹھاتے ہوئے کہا: "جو پہلی بار ایم ایل اے بنے ہیں، انہیں Z+ سیکیورٹی سے لے کر سینٹرل فورس کے کمانڈو تک دیے گئے ہیں۔ اگر مجھے سیکیورٹی دینی ہے، تو اتنی دی جائے جتنی میرے مخالفین کو ملی ہے۔"

انہوں نے کہا کہ پہلے صرف ایک سپاہی دیا گیا تھا، لیکن اب دوروں پر جانے کی ہمت نہیں ہوتی، علاج کے لیے دہلی جاتا ہوں اور تنہا واپس آ جاتا ہوں۔ "اگر کسی دن کوئی حادثہ ہو گیا تو کون ذمہ دار ہوگا؟ صرف اسمبلی اور پارلیمنٹ میں تعزیت کی جائے گی، سب کہیں گے مرنے والا اچھا انسان تھا۔" "وائی" کیٹیگری کی سیکیورٹی سے متعلق سوال پر اعظم خان نے کہا: "سیکیورٹی اہلکاروں کا خرچ اٹھانے کی اس وقت میری مالی حالت اجازت نہیں دیتی۔

ان کے لیے الگ سے گاڑی کہاں سے دوں؟ اس لیے حکومت پہلے تحریری طور پر بتائے کہ کس کیٹیگری کی کون سی سیکیورٹی دی گئی ہے۔" انہوں نے مزید کہا: میں کیسے مان لوں کہ یہ جو خاکی وردی میں ہیں، یہ واقعی اتر پردیش حکومت کے لوگ ہیں؟ وائی کیٹیگری میں سب کچھ مہیا کرایا جاتا ہے، لیکن مجھے کچھ بھی نہیں دیا گیا۔