نئی دہلی: گزشتہ ایک سال میں ہندوستان کے مختلف علاقوں میں آگ لگنے کے کئی واقعات سامنے آئے ہیں۔ ایک مطالعے میں معلوم ہوا ہے کہ 2024-25 میں جنگلات میں لگی آگ (وائلڈ فائر) سے ہندوستان میں تقریباً 1.5 کروڑ لوگ متاثر ہوئے۔ اس میں یہ بھی بتایا گیا ہے کہ اتر پردیش اس آگ سے سب سے زیادہ متاثر ریاست رہی، جہاں اب تک کا سب سے شدید جنگلاتی آگ کا موسم درج کیا گیا۔

سائنس دانوں کے مطابق فصلیں جلانے، شدید گرمی، اور خشک گھاس یا ایندھن کے ذخائر کی وجہ سے اتر پردیش میں آگ کے واقعات میں اضافہ ہوا۔ اس کے نتیجے میں اتر پردیش میں تقریباً 46 لاکھ لوگ متاثر ہوئے، جبکہ پنجاب میں تقریباً 35 لاکھ افراد متاثر ہوئے۔ اس کا بڑا اثر دارالحکومت دہلی پر بھی پڑا، جہاں نومبر 2024 میں دھند (سموگ) کی شدت بہت سنگین ہو گئی تھی۔

اس دوران ہوا میں پی ایم 2.5 آلودگی کی سطح عالمی ادارۂ صحت (WHO) کے معیار سے 13 گنا زیادہ، یعنی 200 مائیکرو گرام فی مکعب میٹر سے بھی اوپر پہنچ گئی۔ یہ معلومات "اسٹیٹ آف وائلڈ فائرز" نامی سالانہ رپورٹ میں دی گئی ہیں، جو سائنسی جریدے ارتھ سسٹم سائنس ڈیٹا (Earth System Science Data) میں شائع ہوئی ہے۔ یہ رپورٹ یونیورسٹی آف ایسٹ اینگلیا (برطانیہ) اور یو کے میٹ آفس سمیت کئی اداروں نے مل کر تیار کی ہے۔

رپورٹ کے مطابق، ہندوستان میں سب سے زیادہ جائیداد (تقریباً ₹3.6 لاکھ کروڑ یا 44 ارب امریکی ڈالر) جنگلات کی آگ کے خطرے میں رہی۔ اس کے بعد امریکہ (26 ارب ڈالر) اور چین (17 ارب ڈالر) کا نمبر آیا۔ دنیا بھر میں تقریباً 10 کروڑ لوگ جنگلات کی آگ سے متاثر ہوئے۔ اس کے ساتھ ہی، 3.7 ملین مربع کلومیٹر کا علاقہ جل گیا، جو ہندوستان کے کل رقبے سے بھی زیادہ ہے۔

اس سے 8 ارب ٹن سے زیادہ کاربن ڈائی آکسائیڈ خارج ہوئی، جو معمول کی اوسط سے 10 فیصد زیادہ ہے۔ آگ سے سب سے زیادہ نقصان جنوبی امریکہ اور کینیڈا میں ہوا، جہاں انسانوں کی وجہ سے ہونے والی ماحولیاتی تبدیلیوں نے ان واقعات کو اور بھی بھیانک بنا دیا۔ رپورٹ کے مصنف ڈگلس کیلی نے کہا کہ ہمارے سالانہ اعداد و شمار واضح طور پر دکھاتے ہیں کہ موسمیاتی تبدیلیاں جنگلات میں لگنے والی آگ کو زیادہ بار بار اور شدید بنا رہی ہیں۔