سری نگر: وزارت داخلہ کی پارلیمانی کمیٹی کا ایک پینل ستمبر کے پہلے ہفتے میں جموں و کشمیر کا دورہ کرے گا جس کے لیے تمام تر تیاریوں کو حتمی شکل دی جا رہی ہے۔واضح رہے کہ یہ پینل 26 اپریل کو جموں و کشمیر کا دورہ کرنے والا تھا، لیکن 22 اپریل کو پہلگام کی بیسرن وادی میں ہونے والے دہشت گردانہ حملے کے بعد یہ دورہ ملتوی کر دیا گیا تھا۔

ذرائع کے مطابق، پارلیمانی کمیٹی برائے امور داخلہ کا یہ پینل کم و بیش چھ دنوں تک جموں و کشمیر میں قیام کرے گا۔ بی جے پی کے رکن رادھا موہن داس اگروال اس پینل کی قیادت کریں گے، جو 31 ممبروں پر مشتمل ہے۔ اس میں پرینکا گاندھی، کپل سبل اور دیگر ممتاز رہنما شامل ہوں گے۔

دورے کے دوران یہ پینل مختلف وفود سے ملاقات کرے گا اور وادی کے مختلف علاقوں کا دورہ بھی کرے گا۔اس سلسلے میں صوبائی کمشنر کشمیر انشول گرگ نے تیاریوں کا جائزہ لینے کے لیے ایک اجلاس کی صدارت کی۔ اجلاس میں سری نگر، گلمرگ اور سونہ مرگ میں معززین کے لیے رہائش کی سہولیات، گاڑیوں کی الاٹمنٹ اور رابطہ افسران کی تقرری پر تفصیلی غور کیا گیا۔مزید یہ کہ، محکموں کے درمیان قریبی تال میل اور ہم آہنگی کو یقینی بنانے کے لیے ڈپٹی ڈائریکٹر پلاننگ عاشق حسین ملک کو نوڈل آفیسر مقرر کیا گیا ہے۔