نئی دہلی/ آواز دی وائس
ہندوستان کے مرکزی وزیر داخلہ امیت شاہ نے جمعرات کے روز جموں و کشمیر میں سیکورٹی صورتحال کا جائزہ لینے کے لیے ایک اعلیٰ سطحی میٹنگ کی صدارت کی۔ حکام نے اس کی اطلاع دی۔
حکام کے مطابق، میٹنگ میں جموں و کشمیر کے لیفٹیننٹ گورنر منوج سنہا، مرکزی داخلہ سیکریٹری گووند موہن، خفیہ بیورو (آئی بی) کے ڈائریکٹر تپن ڈیکا، جموں و کشمیر کے پولیس سربراہ نلن پربھات، مرکزی ریزرو پولیس فورس (سی آر پی ایف) کے ڈائریکٹر جنرل جی پی سنگھ اور بارڈر سیکیورٹی فورس (بی ایس ایف) کے ڈائریکٹر جنرل دلجیت سنگھ چودھری سمیت دیگر سینئر افسران شریک ہوئے۔
حکام نے بتایا کہ میٹنگ کے دوران پیر پنجال پہاڑی سلسلے کے علاقے میں سیکورٹی کی صورتحال اور مرکز کے زیرِ انتظام خطے میں جاری ترقیاتی منصوبوں کا بھی جائزہ لیا گیا۔
انہوں نے یہ بھی بتایا کہ امیت شاہ کی صدارت میں جموں و کشمیر پر پچھلی جائزہ میٹنگ یکم ستمبر کو ہوئی تھی۔
حکام کے مطابق، میٹنگ میں وزیر داخلہ نے دہشت گردی کے خلاف صفر برداشت کی پالیسی پر زور دیا۔ انہوں نے تمام سیکورٹی ایجنسیوں کو چوکنا رہنے اور جموں و کشمیر سے دہشت گردی کے خاتمے کے لیے مربوط انداز میں کام کرنے کی ہدایت دی۔ اپریل میں پہلگام دہشت گردانہ حملے کے بعد جموں و کشمیر میں دہشت گرد نیٹ ورک کو ختم کرنے کے لیے مسلسل کارروائیاں جاری ہیں۔ ساتھ ہی یہ بھی یقینی بنایا جا رہا ہے کہ مرکز کے زیرِ انتظام اس خطے میں سیاحت جلد معمول پر آ جائے۔
