شملہ: حکام نے بتایا کہ ہماچل پردیش میں یکم جون سے 29 جون کے دوران معمول کی 95.4 ملی میٹر بارش کے مقابلے میں 63.8 ملی میٹر بارش ریکارڈ کی گئی، جو 33 فیصد کمی کو ظاہر کرتی ہے۔

شملہ کے محکمہ موسمیات کے اعداد و شمار کے مطابق ریاست کے 12 میں سے 11 اضلاع میں جون کے دوران معمول سے کم بارش ہوئی، جبکہ صرف کنّور ضلع میں معمول سے 7 فیصد زیادہ بارش ریکارڈ کی گئی۔ اعداد و شمار کے مطابق سرمور میں بارش کی کمی 54 فیصد، لاہول-اسپیتی میں 53 فیصد، کلو میں 45 فیصد، منڈی میں 41 فیصد، کانگڑا میں 35 فیصد، بلاس پور میں 33 فیصد، چمبہ اور اونا میں 28، 28 فیصد، ہمی پور میں 27 فیصد، سولن میں 17 فیصد اور شملہ میں 6 فیصد رہی۔

جون سے ستمبر تک جاری رہنے والے مون سون سیزن کے دوران ہماچل پردیش میں معمول کی مجموعی بارش 734.4 ملی میٹر ہوتی ہے۔ شملہ محکمہ موسمیات کے سینئر افسر سندیپ شرما کے مطابق آئندہ تین سے چار دنوں کے دوران ہماچل پردیش کے بعض علاقوں میں مون سون کے داخل ہونے کے لیے حالات سازگار ہیں۔ انہوں نے پی ٹی آئی کو بتایا کہ 2 اور 3 جولائی کو ریاست کے مختلف حصوں میں شدید اور وسیع پیمانے پر بارش ہونے کا امکان ہے۔