نئی دہلی: قومی انسانی حقوق کمیشن (این ایچ آر سی) کے چیئرمین جسٹس (ریٹائرڈ) وی راما سبرمنیم نے حکام سے اپیل کی ہے کہ وہ بندھوا مزدوری کے معاملات سے نمٹتے وقت انتہائی احتیاط سے کام لیں۔ انہوں نے ایسے معاملات کی نشاندہی اور ضرورت پڑنے پر مزدوروں کو فوری مدد فراہم کرنے کے لیے ایک ہیلپ لائن شروع کرنے کی ضرورت پر بھی زور دیا۔

این ایچ آر سی نے جمعہ کو جاری ایک بیان میں کہا کہ کمیشن نے 9 جولائی کو ہریانہ کے مختلف اضلاع میں اینٹ بھٹوں سے متعلق مبینہ بندھوا مزدوری کے 86 معاملات کی آن لائن سماعت کی۔ جسٹس وی راما سبرمنیم کی صدارت میں ہونے والی اس سماعت میں ریاستی حکومت کے کئی سینئر افسران اور ہریانہ کے مختلف اضلاع کے ضلع مجسٹریٹ شریک ہوئے۔

انہوں نے کہا کہ بیشتر معاملات میں متعلقہ سرکاری افسران نے ریکارڈ کی مناسب جانچ نہیں کی، جس کے باعث ان کے پاس مزدوروں کو بندھوا مزدور قرار دینے کے لیے قابلِ اعتماد شواہد موجود نہیں تھے۔ کمیشن کے چیئرمین نے حکام کو ہدایت دی کہ بندھوا مزدوری کے معاملات کی جانچ کرتے وقت پوری احتیاط برتیں۔

انہوں نے یہ بھی کہا کہ شکایت کی جانچ کے لیے ٹیم تشکیل دیتے وقت وزارتِ محنت و روزگار کی جانب سے 14 مئی کو جاری کیے گئے "بندھوا مزدوروں کی شناخت، ان کے ریسکیو اور قصورواروں کے خلاف قانونی کارروائی کے لیے معیاری عملی طریقہ کار (ایس او پی)" میں درج رہنما اصولوں پر عمل کیا جائے۔ انہوں نے اس بات پر بھی زور دیا کہ ایک ہیلپ لائن قائم کی جائے تاکہ ضرورت کے وقت مزدور آسانی سے مدد طلب کر سکیں اور بندھوا مزدوری کے واقعات کی بروقت نشاندہی ممکن ہو سکے۔