جموں: کشمیر وادی کو ملک کے باقی حصوں سے جوڑنے والی جموں-سری نگر قومی شاہراہ پر کئی مقامات پر موسلادھار بارش کی وجہ سے زمین کھسکنے اور پہاڑیوں سے پتھر گرنے کے پیش نظر 250 کلومیٹر طویل راستے پر گاڑیوں کی آمدورفت منگل کے روز دوبارہ معطل کر دی گئی۔

افسروں نے بتایا کہ سال بھر کھلی رہنے والی اس شاہراہ پر بارش کی وجہ سے سمرولی اور بانہال سیکٹر کے درمیان کئی جگہوں پر بھوسکھلن اور پہاڑ سے پتھر گرنے کے بعد ٹریفک روک دیا گیا ہے۔ ٹریفک محکمے کے ایک افسر نے بتایا کہ خراب موسم اور بھاری بارش کے پیش گوئی کو دیکھتے ہوئے احتیاطاً گاڑیوں کی آمدورفت کی اجازت نہیں دی جا سکتی۔

موسم محکمہ کے ایک ترجمان نے پیر کی شام کو جاری ایک پیشن گوئی میں 2 اور 3 ستمبر کو جموں ڈویژن کے زیادہ تر حصوں میں درمیانی سے بھاری بارش ہونے کے امکانات ظاہر کیے تھے۔ ترجمان نے بتایا، ’’خاص طور پر 2 ستمبر کی دیر رات یا 3 ستمبر کی صبح سے دوپہر کے آخر تک کٹھوعہ، جموں، ادھم پور اور ریاسی میں بھاری سے بہت بھاری بارش ہونے کا امکان ہے اور جموں خطے کے ڈوڈہ، سانبہ، راجوری، پونچھ، رامبن، کشتواڑ اور جنوبی کشمیر کے اننت ناگ اور کولگام میں درمیانی سے بھاری بارش ہونے کی توقع ہے۔‘‘

انہوں نے کہا کہ کئی حساس مقامات پر بادل پھٹنے، اچانک سیلاب آنے، زمین کھسکنے یا پہاڑیوں سے پتھر گرنے اور دریاؤں و نالوں میں پانی کی سطح بڑھنے کا اندیشہ ہے۔ انہوں نے لوگوں سے اپیل کی ہے کہ آبی ذخائر سے دور رہیں اور بھوسکھلن والے علاقوں سے پرہیز کریں۔

افسروں نے بتایا کہ چھ دن تک بند رہنے کے بعد شاہراہ کو پیر کو جزوی ٹریفک کے لیے کھولا گیا تھا اور کشمیر میں ضروری اشیاء لے جانے والے ٹرکوں سمیت زیادہ تر پھنسے ہوئے گاڑیوں کو آگے جانے دیا گیا تھا۔ انہوں نے بتایا کہ آخری رپورٹ آنے تک جموں خطے کے زیادہ تر حصوں میں بارش جاری تھی۔ محکمہ موسمیات کے مطابق منگل کی صبح ساڑھے آٹھ بجے تک گزشتہ 24 گھنٹوں میں کٹھوعہ ضلع میں سب سے زیادہ 25.2 ملی میٹر بارش ریکارڈ کی گئی۔

اس کے بعد جموں (17.8 ملی میٹر)، رامبن کے بٹوٹے (17.6 ملی میٹر) اور کٹرا (15.8 ملی میٹر) کا نمبر رہا۔ ترجمان نے بتایا کہ کشمیر وادی میں جموں-سری نگر قومی شاہراہ پر قاضی گنڈ میں رات بھر 23.2 ملی میٹر، شمالی کشمیر کے گلمرگ میں 14.8 ملی میٹر، جنوبی کشمیر کے پہلگام میں 11.4 ملی میٹر اور سری نگر میں 6.1 ملی میٹر بارش ریکارڈ کی گئی۔ تاہم، صبح ہونے سے پہلے ہی بارش رک گئی اور بعد میں وادی میں دھوپ نکل آئی۔