نئی دہلی/ آواز دی وائس

مسلسل موسلا دھار بارش کے باعث لینڈ سلائیڈنگ  اور سیلاب جیسے حالات پیدا ہونے سے ملک کی چھ ریاستوں میں عوام کو شدید مشکلات کا سامنا ہے۔ ہماچل پردیش، اتراکھنڈ اور جموں و کشمیر میں لینڈ سلائیڈنگ سے جانی و مالی نقصان ہوا ہے، جبکہ مہاراشٹر، گجرات اور اتر پردیش میں سیلاب جیسی صورتحال بنتی جا رہی ہے۔ مہاراشٹر میں کئی لوگوں کو محفوظ مقامات پر منتقل کیا گیا ہے۔ اس دوران محکمہ موسمیات نے ممبئی میں بھاری بارش کی پیش گوئی کرتے ہوئے ریڈ الرٹ جاری کیا ہے۔ بارش کی وارننگ کے پیش نظر ممبئی میں اسکولوں کو بند کر دیا گیا ہے۔

ہماچل میں لینڈ سلائیڈنگ 

ہماچل پردیش کے کُلّو میں لارجی-سینج روڈ پر بڑا بھوسکھلن ہوا ہے۔ پاگل نالے میں آئے ملبے کی وجہ سے سینج روڈ بند ہو گئی ہے۔ شملہ-منڈی روٹ پر سنی-تتّاپانی سڑک دھنس گئی ہے، جس سے آمدورفت پوری طرح ٹھپ پڑ گئی ہے۔ مقامی لوگ اور مسافر اب متبادل راستوں کا سہارا لینے پر مجبور ہیں۔ انتظامیہ نے عوام سے اپیل کی ہے کہ وہ فی الحال شملہ-منڈی کے سفر کے لیے دیگر محفوظ راستے استعمال کریں۔

مہاراشٹر میں سیلاب جیسے حالات

مہاراشٹر کے کئی علاقوں میں سیلاب جیسے حالات بن گئے ہیں۔ محکمہ موسمیات نے ممبئی کے لیے ریڈ الرٹ جاری کر دیا ہے، جس سے خطرہ مزید بڑھ گیا ہے۔ ناندیڑ میں این ڈی آر ایف کی ٹیمیں پانی میں پھنسے لوگوں کو باہر نکالنے میں مصروف ہیں۔ لینڈی ندی کے بیک واٹر نے تباہی مچا دی ہے۔ مکرم آباد گاؤں میں سیلاب کے پانی میں 40-50 بھینسوں کے ڈوبنے کی خبر ہے۔ گریٹر ممبئی پولیس کمشنر نے عوام کو وارننگ دیتے ہوئے کہا كہ پیارے ممبئی واسیوں، بھاری بارش اور اورنج الرٹ کے پیش نظر غیر ضروری سفر سے بچیں، اپنی منصوبہ بندی احتیاط سے کریں، اور صرف ضرورت کے وقت ہی گھروں سے نکلیں۔ ہمارے اہلکار چوبیس گھنٹے مدد کے لیے تیار ہیں۔ کسی بھی ایمرجنسی کی صورت میں 100/112/103 پر رابطہ کریں۔"

لینڈی ندی نے 5-6 گاؤں کو گھیر لیا

واشیم میں بالکھیڑ گاؤں کے قریب نالے میں طغیانی آنے سے مہاگاؤں-بالکھیڑ روڈ بند ہو گیا ہے۔ رتھڈ گاؤں کے پاس ندی میں بار بار سیلاب آنے سے گاؤں کا رابطہ ٹوٹ گیا ہے۔ مالیگاؤں تعلقہ میں بارش کی وجہ سے جانگیر مہاراج ادارے جانے والا راستہ بند ہے۔ اوکولی پین گاؤں جانے والے مرکزی راستے کا پل بھی پانی میں ڈوب گیا ہے۔ سیلاب میں پھنسے شہری کل سے بھوکے ہیں۔ جے پور گاؤں کے قریب پل پر پانی بہنے سے ٹریفک روک دی گئی ہے۔ لینڈی ندی کا پانی پانچ سے چھ گاؤں کو گھیر چکا ہے۔ کاریگروں کے گوداموں میں پانی بھرنے سے گنیش کی مورتیاں خراب ہو گئی ہیں۔ بھاری بارش سے کسانوں کی فصل تیسری بار برباد ہوئی ہے اور وہ معاوضے کا مطالبہ کر رہے ہیں۔

یوپی کے باغپت میں پانی بھرا

یوپی کے بڑوت میں صبح سے موسلا دھار بارش ہو رہی ہے۔ سڑکوں پر کئی فٹ پانی جمع ہو گیا ہے۔ گاندھی روڈ، جین کالج مارکیٹ اور ڈاکخانہ روڈ تالاب جیسے دکھائی دے رہے ہیں۔ پانی گھروں اور دکانوں میں گھسنے سے عام لوگ اور تاجر پریشان ہیں۔ کئی بائیکس اور اسکوٹیاں پانی میں ڈوب کر خراب ہو گئی ہیں۔

گجرات کے امباجی میں صورتحال

ملک کے سب سے بڑے شکتی پیٹھ امباجی میں موسلا دھار بارش سے نشیبی علاقوں میں پانی بھر گیا ہے۔ سڑکیں ندی میں تبدیل ہو گئی ہیں۔ امباجی کے مرکزی بازار میں ڈیڑھ سے دو فٹ تک پانی بھر گیا ہے۔ امباجی قصبے کا ہمت نگر روڈ اور امباجی پولیس اسٹیشن کے سامنے والا ہائی وے بھی ندی میں بدل چکا ہے۔